SIAHA, 8 Thlarâh, 2020 – Atanoh my dawh 11:00 Am kha ta Puhpa K. Chhuabei, EM i/c PWD etc. ta Maraland Theological College (MTC) Pangaina lâpi, ECM Vaih, Siaha liatahpa cha zawpi hmâ thei awpa ta a pahy.
He pahyna liata Pihnô Lynn. H. Ngohei, Vice Principal, MTP ta chhihtha ta, Rev. Dr. FC. Beicho, Moderator, ECM Assembly ta thlahchhâna nata hlâna a hnei.
He khai tawhta MTP Administrative Building lâ pangaipa ta 2nd Session ahmâpazipa châ ta, he liata Rev. Dr. Laiu Fachhai, Principal, MTC ta Programme chhihtha ta, Rev. Ch. Chhama, Asst. Professor, MTC ta thlahchhâna a hnei.
Puhpa K. Beichhua, JE, PWD, MADC ta Technical Report pie ta, Rev. K. Laichhua Azyu, Executive Secretary i/c Mission, ECM Headquarters ta thlahchhâna nata byhnâ awna a hnei.
He second session liata Puhpa K. Chhuabei, khichhai laipa cha biereina hnei awpa ta hruapa châ ta, ary liatahpazy he a bierei tlâhpi viapazy a châ:-
- Atanoh liata he hawh ta eima Awnano nôpaw chaipazy hry liata atyuduah thei hra awpa ta nâ khokhei tuhpa eima Beipa Khazohpa nata eima Awnano nôpawpazy hnoh ta alynabie ei reih.
- Keima EM i/c PWD ei châna daihti liata he hawhta lâpi tao theipa a châpa he arônah ei tah hmeiseih. Lâpi taona liata tha nata zâh, sôh nata thih apasaihpa manôh zydua hnoh ta zana hlâ ei na ta, alynabie ei reih.
- MADC hawhta cha eima raihria theina Budget sôh chynawh kaw ta, anodeikua eima Awnano nôpawpazy phahnai ngiahna nata tiamana zawhzi ta MADC 2020-2021 Budget tawhta tawhta Rs.2.5 Lakhs ngâlâh eima chavaw pie thei tarawpa ta, Awnanopazy thyupakhyna pahlyhpa ta Rs.5,37,250/- ta tao patlô theipa a châpa he aly’pa a châ hmeiseih.
- Keima mo pakha ta cha eima râh Awnanopa tha patlôtuh awpa ta Khazohpa ta MADC sawhkhâ miah a piepa hawh ta ei vaw pachâ tyh; he he Khazohpa ta eima Missionary R.A. Lorrain siepahliepa ta rai miah a hriapa na a châ tahpa he eimâ pyh thai chyu nahta ei hnabeiseih hra.
- MADC he Marasaw châta sawhkhâ Opi châ ta, Awnanopa nahta khâcharâh apazao hapa a châ; chavâta atanoh taih duahmo liata cha MADC he ta Awnano châta eima theina hawh ta hmah eima la lymâ hrapa ta eima phano tyh. Lorrain English School Building he Mararâh liata school ypa hry liata apha chaipa tah thei awpa châ ta, Rs.250/- lakhs ta MADC siepahliepa ta sapa avaw châ. Chahawhna hra chata MGC Hospital chhao eima theina hawh ta eima mohôh lymâ hra.
- He hawhta a châ vâta eima râh Awnanopazy ta Khazohpa ta MADC miah apiepa châta thlah khâ chhâ tyh awpa ta eima Awnano nôpawpazy hmiakô liata ei reih khoh kaw.
- Awnano lâ ta, khokheina bie nata khopasana bie ei reih khoh kawpa cha – eima Awnanopa he kô 100 hlei tlai vaw uhthei ha bâ hra ta, aly’pa a châ hmeiseih. He hawhta a châ no ta hnabei hnabâpa ta eima sie khei pathlei aw tahpa ei chi ngaita tyh; Assets pitlohpa nata infrastructure pha viapazy hnei lymâ awpa ta plan sianô kawpazy patuapalua lymâ awpa ta eima Awnano Headquarters nôpawpazy maohphaohna châ ta, Khazohpa angâchhâna chô ta tiama eima papua via lymâ awpa he apeimawh hmeiseih.
- Chahawh pyly ta Mission Field chakaona kyh chhao zôpha viapata siekhei apeimawh hmeiseih – Mission Field sâkha tawhta kô 1 chhôh liata thlahpa leidiapa pakhazie tlai ma eima pachha papua aw tahpa target zy taih eimâ tu awpa apeimawh kaw khiah ma i ei vaw tah pâ ngâ kaw tyhpa a châ; Khazohpa liata apahniehpa nata ano angâchhâna chôta Mission Field chakaona rai chhao tiama viapa nata zôpha viapa ta eima hria awpa peimawh ta, Mission Field chhao zôpha viapa ta eima mohôh awpa apha kawpa ta ei pahno tyh.
- Ei rei khoh kawpa deikua – ECM Awnanopa he atahmâ hlâta â icha viapa ta siekhei thei lymâ ei si la tahpa he a châ. Thlahchhâna liata chhao khâ eimâ thei lymâ awpa apeimawh hmeiseih.
- Achhâ chaina lia deikua MTC liata nôpawpazy nata eima Headquarters nôpawpazy hnoh ta alynabie reih na ta, he hawhta lâpi pahy thei awpa ta eina khokhei vâ ei ta ama hnoh ta alynabie ei reih chanei. Ei châ ly kaw ei.
Puhpa K. Chhuabei, EM he MADC Officials – Puhpa A. Viahra, EE, PWD, Puhpa Beirokhu Beita, I & PO, Puhpa K. Beichhua, JE, PWD zy ta zi ei ta, MJA lâ tawhta Puhpa M. Baithai, President, Puhpa B. Dawpho, Editor, TOM, Puhpa V. Pawhla, Editor, NSV, Puhpa C. Lalramnghaka, Editor, Kawl-eng zy ta ama zi thei hra.
He lâpi he MADC PWD tawhta Rs.2.50/- lakhs deita ta sanction pa ta pathao patôpa châ ta, ECM KTP Branch zy ta tlâhrai hriapa nata boulder lô zy thyu pakhy ei ta, cha hleikhô ta Awnanopazy nata chyhsa phahnai ngiahpazy ta thazâh nata sôhzy ama vaw thyu pakhypa tawhta atanoh liata apatlô theipa ama châ zie Meeting Chairman Rev. Dr. Laiu Fachhai, Principal, MTC ta a reih.
MTC he Senate of Serampore tawhta Affiliation hmô ha ta, atahmâ tawhta kô rei leipa liata B.Th chhao pathao thei awpa ta hnabeiseihpa a châ.
He lâpi thiehpa he ECM Vaih thlâsu pangai nawpa châta hmâ theipa a châ hleikhô ta Thosaih lâ siena lâpi châta hmâ theipa a châ hra. Zawpi châta hmâ pahnai kawpa a châ nahta hnabeiseihpa a châ.
(Source: IPRD, MADC, Siaha.)