SIAHA, 12 Thlarâh, 2020 – Atanoh zâlâ kha Mara Thyutlia Py (MTP) General Headquarters nôpawpazy ta MTP Branch: Thosai tlypa ta Branch nôpawpazy nahta apakyhna ama hnei hleikhô ta pasyupali biereina ama hnei.
Dawh 4:00 Pm pa Thosai khih angiapa châ ta, Thosai MTP zy ta zâpati amâ vaw chhuanohpa cha dôlâhna hnei tuapa châ ta, cha khai tawhta bielôhawhpa nata apakyhna hneipa a châ.
He dei châ leipa ta dawh 6:00 Pm pa ta Community Hall liata Programme taopa a châ hra.
He Programme liata Puhpa Martin L. Nôhro, Sr. Vice President ta chhihtha ta, Puhpa S. Vabeihasa, Vice President, Ls. Goldem Mary Solo, Treasurer, St. Beirôkhu Beitâ, Secretary i/c Info. & Publicity zy ta pasyupalina bie ama reih.
He Programme he COVID-19 Pandemic daihti a châ vâta chyhsa hluhpi hrua thai’pa châ lei ta, VC nôpawpazy nata MSO Leader zy dei hruapa ama châ. MTP Branch adviser zy chhao amâ hlao thei hra. Zawpi deikua O lâ tawhta ama vaw nahthlie thei hra nawpa ta Loudspeaker hmâpa a châ.
Puhpa N. Lalrinmuana, President, MTP Branch: Thosai ta daihti chhâna lâ liata alynabie reina a hnei.
MTP Gen. HQ nôpawpazy ta Thosai Branch ama za tlypa he ta Thosai MTP thatlô via nawpa a châ hleikhô ta khitlâh reiraona kyh liata deichhyna chhaichhi pha kawpa a châ nahta ama hnabeiseipa châ ta, Thosaih MTP cha MTP Branch hropazy amopâ tlâh châ lymâ awpa ta khokhei ei ta, ama pasyu hra.
Thosai MTP Branch zy he COVID-19 adyuhna kyh liata ama theina zydua vaw papua lymâ ei ta, atakô May thlahchhâna lia kha ta Noaotlâh râhri-Beinô chavah liata hâta ei kha tlai ârie ta ama vaw duty haw hra.
Thosai MTP Branch nôpawpazy ta zâpati pahâh kawpa amâ vaa chhuanoh vâta nata pasyupali bie rei theina daihti Programme pha kawpa ama vaw pachhuahpanoh vâta MTP Gen. HQ nôpawpazy ta alynabie ama reih.
(Source: Beirokhu Beita, Secy. i/c Info. & Pub. MTP Gen. HQ.)