SIAHA, 16 Thlarâh, 2020 – Atanoh dawh 2:00 Pm liata Beihrochhitha Azyu, Mara Idol 2017 Top 3 Music Video Album “Ei cha vâ ngâsâ tyh” cha NSV Studio, Siaha liata Puhpa K. Chhuabei, Executive Member (EM), i/c PWD etc. MADC ta Local Cable TV siepahliepa ta a palâhâh.
Palâhâhna Programme he Laihsa Angela B. Azyu, Executive Member, Mara Hlasa Py (MHP) General (Gen.) Headquarters (HQ) ta chhihtha ta, Puhpa A. Thazi, President, MHP Gen. HQ ta Programme apavaosana thlahchhâna a hnei.
Puhpa Pasa T. Azyu, Ex-President, MHP Gen. HQ ta saichhieliena hnei ta, Puhpa John Beizachhi Phuto, Vice President, MHP Gen. HQ ta MHP Gen. HQ vyuhpa ta biereina chyupa a hnei.
St. Sâhchô nata Ls. FC. Nipari zy ta hlasana hnei ei ta, daihti chhâna lâ liata Album hneituhpa Beihrochhitha Azyu ta alynabie reina nata album
presentation hnei ta, hla sana chhao a hnei pâ hra.
Khichhai laipa Puhpa K. Chhuabei bierei tlâhpi viapazy:-
- Atanoh daihti pha kawpa miah pietuhpa eima Khazohpa lâta alynabie reih na ta, Album palâhâhna liata avaw hlaopa zydua nata O lâ tawhta miah moh tuhpa zydua zana chô ta ei châ naoh aw.
- Chhôhkha lâ vâduana atyh hra ei si la, album ahneituhpa ta eina khokheina he hlao patloh lei awpa he apha tah leipa na ta, chavâta khih (Vahia) tawhta zâhnia kha kaw tlô na ta, atanoh he liata avaw duahpa ei châ.
- Khazohpa ta Puhpa Beihrochhitha hnoh ta bie reih ta, kei atloh leipa nata achieh lei chaipa ta he a video cassette release thei awpa ta khokheina rônah kawpa eina patosapa vâta ano nata a chhôhkha nah chô lia chhao ta alynabie ei reih hmeiseihpa a châ.
- MHP he â vaw dua tawhta eima râh liata hla sa thaipazy siepahliepa ta athata hmahsiena a tlôkheipa ta pahno na ta, chavâta atanoh chhao he cassette he release theipa a châpa ta ei pahno.
- Khazohpa ta chi nata pho hawh ta miah hmâh khoh ta, chi nata pho ta miah a rao. Kao totie liata hmah eima siena awpa nata eima chi nata pho pabohsapa eima châ thei nawpa ta chhaichhi hmâ/hnei awpa byuh ta, Mizoram nata eima chheipâh Lai râh liazy ta NGO nano nanopazy, keimo hlâta avaw duah tuapazy vaw y hra sala, eima râh liata MCHP zy, atlia via liata avaw duah ta, tahmâ cha Mararâh NGO zydua liata thatlô chaipa a châ khiah ma tah thei awpa ta Khazohpa ta miah pachhuahpanoh ta.
- MHP zy chhao atliata liata vaw duah ta, atanoh he thatlô kawpa ta vaw sie ta. MTP zy ta eima chi nata pho pabohsana kyh liata athiehpa ta thata avaw hra ta, ama (Gen. Conference 2019) resolution zy chhao MADC CEM liata vaw pie ei ta, MADC office liata ahriapazy ta Maw reih ama cheih khao awpa châ vei tahpazy pahlao ei ta, a rônah kaw.
- Eima Mararâh liata chi hro pho hropa hmozy ta miah disao thei tuhpa reih, hla, châbu zy hmâpa ta, economy hmâpa ta – kao totie hmâpa ta eima kiapâh liata ypa ta miah disao thei awpa châ ei ta, eima chipho pabohsana rai hria awpa ta cha Politician nahzy ngâlâh ku liata apahnieh leipa ta, NGO zy nata eima zydua – arâh liata apahrâtuhpa zydua ku liata â pahnieh. Eima taotheipa nata hria theipa zy deikua alyu vei; anodeikua he pabohsana rai hria awpa deikua eima zydua ku liata na â pahnieh tahpa atanoh he su liata avypazy nata miah saituhpa zy hnoh ta ei reih khoh ngâsâ.
- Maw hlasa thaipa Vanlalsailova ta Maw reih ta vâ-ia hla vaw sa chaimâh ta, eima râh doh nata hâ tlai khai ta, a hla sapa lâluah viapa zydua chhochhi cha eima sawnah, bierei achu thaohpazy chhao ta ama sa thai khai; Sailova hla hmâpa ta Mara reih he thata miah a disao.
- Cha no ta, MHP zy hmahlana zawhzi ta Idol zy vaw pachhuahpanoh ei ta, chacha ta eima Mararâh khi to liata thyutlia hla sa thaipazy vaw aw papua ei ta, atanoh lia chhao eima nawhta Beihrochhitha chhao Ahmyhpi khih tawhta vaw pua ta, Mara Idol Top 3 vaw châ ta, cha dei châ leipa ta eima reih pabohsa nawpa ta a uhta nahzy zawhzi ta Music Video vaw tao ta, he Cassette hmâpa he ta Mara chi nata pho reih disao awpa he athata miah a vaipa aw tahpa he ei hnabeiseih.
- Mara hlazy he vâ-ia hla hluh kaw bâ ta, byhnâ miah pie tuhpa Khazohpa lâ aheipa ta ano reithaina Gospel hla he tao hluh thei via si la tahpa kho â chhih kaw.
- Eima râh miah asiehnaopa hluhpi ama y tahpa eima rah nôpawzy bie reipa cha y zie za hnei tu tyh leipa a lyu kaw; Hla he ta chyhsa palôh hria kaw ta, râh luhzy bie rei hlâta hla biezy he ta miah pahnie via khiah ma tah thei’pa a châ; mothlihzy chhao miah a patlasa thei.
- Chavâta MHP nata Mararâh liata hla phi thaipazy ta tiama viapa ta Mara reih âboh thei nawpa ta hla thata phi ta, eima Artiste nahzy he ta Music video tao hluh via ei sala tahpa kho âchhih hmeiseih.
- Khazohpa ta he râh leilô liata pahrâ awpa ta miah rao ta, MADC chhao ta atheina zydua papuapa ta he ti nata râh hmahsie nawpa ta hmah a la lymâ. Anodeikua, atahmâ he Mararâh economy eima moh na ta palôh pasa âchhih kaw. COVID-19 vâta Mararâh khihzy chahryh laih pi ta, eima hmô papuapa cha thotlâh khih hluh via liata Vao, Awh, Mie, Viachao chalei awpa asôh kaw. Thokha cha Siaha lâ tawhta tlao ama phaopa hawhta reina a y.
- Khazohpa ta Mara chi nata pho pabohsa nawpa ta chhaichhi hluhpi miah pie ta, chahawh ta keih eima chakâ ngâhaino ta chi hro pho hropazy eimâ kho nawpa nata disaopa eima châ lei nawpa ta cha nietluana rai hria kyh liata eima tiama via awpa apeimawh hmeiseih.
- Chavâta he chi nata pho âboh nawpa nata Abeipa Khazohpa ta a paduapa Awnanopa laiseih lymâ nawpa ta cha eima zydua ta y chakhy, zia chakhyh khao leipa ta, eima nie tluana chyu liata Abei Khazohpa kho zie ta ypa ta, nie tluana nata ku rai hria zy he pachâ peimawh chyu si la, Khazohpa ta miah pabohsa awpa ta kao nano nanopa, py nano naopa hmâpa ta â chhuahpa cha a hlao eima patloh thei aw. Chataleipa ta cha Economy hmâpa ta he chi nata pho he disao pathlahpa eima châ pathlei aw tahpa ei vaw chi ngaita kaw. Eimâ dady chyu liata Mararâh châta nata Mara Chipho châta tiama papua via lymâ awpa ta eimâ haw hmeiseih. Ei châ ly kaw ei.
He Programme he MHP Gen. HQ ta a pachhuahpanohpa châ ta, MTP, MSO, MCHP Gen. HQ nata Mara Writers Club zy hruapa ama châna hawh ta ahlao chyu hra ei ta, saihei kawpa ta Album ama chalei chyu hra.
Source: IPRD, MADC, Siaha
