SIAHA, 1 Phiata, 2020, Pobienoh (MNN) – Atanoh my dawh 11:30 Am pa ta Puhpa Beihlaotlo Syuhlô ta a rohpa châbu “MOTHLAW” tahpa cha Puhpa Laicho Nôtlia, Vice Chairman, Board of Mara Literature, MADC ta E & F Conference Hall, MADC Complex liata zawpi rei thei awpa ta a palâhâh.
Programme he Mara Writers Club (MWC) ku liata pahniehpa a châna hawh ta MWC ta ato zydua buakhei ta, Chhituhpa Puhpa Z. Siachô, Adviser, MWC ta pahnie kawpa ta Programme chhihtha ta, Pihnô Patricia T. Azyu, Vice President, MWC ta Programme pavaosana daihti a hmâh.
Satlia Aaron Chhachhai, EC Member, MWC ta châbu thâtih reina hnei ta, Laihsa NC. Ngôpawngia nata Laihsa FC. Beiawrili zy ta hlasapa ta zawpi avypazy ama palôhpahawh hra.
Daihti chhâna lâ liata Puhpa Beihlaotlo Syuhlô, Author ta alynabie reina daihti hmâh ta, Zisu thlahchhâna reipa ta programme khawpa a châ.
Châbu palâhâhtuhpa Puhpa Laicho Nôtlia chata biereina chyupa hnei ta, ary liatahpazy he a bierei tlâhpi viapazy a châ:-
- Reih he pachiatuhpa py (Committee) tlyma ta ama tao chhyhpa châ leipa ta, Khazohpa hmosai piepa a châ; eima pasô kaw awpa a châ.
- Reih he chyhsapa chi nata pho ngiana a châ.
- Marasaw thokhazy pi ta Mizo reih acheihpazy hmiakô liata Mara reih he zakhei pi ta, ama thei theina su liata cheih ngâ tyh ma pi. English nata Hindi reih ahmâhpazy hmiakô liata cha Mara reih he zakhei leipa ta eima cheih ngâh thlâh ha.
- Marasaw phahnai ngiahpazy ta mokuhsaihpa ta Mara reih alei lei nawpa tahpa ta châbu vaw roh ei ta, areih tuh awpa nata achaleipa tuh awpa y khao tyh ma pi; Marasaw ta eima chalei leipa ta a châ khiah chi hropazy ta vaw chalei aw vei ei; Marasawzy ta chalei lymâ ei si la, reih patlô lymâ hra ei suh u.
- Kô 2007 (Maraland Gospel Centenary Edition) liata Mara Bible avaw puapa kha Board of Mara Literature, MADC khozie ta rohpa châ ta, Mara reih chhao âdo kawpa ta pahnopa a châ; Thyutliazy ta Mara reih a test nawpa ta 2007 Mara Bible he vaw hmâh u la, ao paropa ta reih u la, Mara reih nama thai nahta thai lei namâ pahno thei aw.
- Mararâh liata reih hropa ta thata miah a khu – a eih pachaipa ta Mizo reih he eima khoh kaw saipa ta â lâ – atahmâ tawhta la Mara reih he pasôpa ta cheih via lymâ ei suh u.
- (Reikah ngia leipa châ hraoh leipa sala) eima vaw thi ti ta cha eima thlâlô liata eima moh aroh aw ta, thlâsu atly leipazy ta cha miah pahno khao aw vei ei. Eima moh ta Châbu ropa a y ha khiah deikua eima vaw thi ti chhao ta chyhsa pahno hlao aw pi ta, thlâlô pha kawpa abôpa hawh eima châ aw.
- Marasaw châthaipa B.A. chô lâ 1000 hlei eima y ha bâpa hawhta reipa châ ta, he nahzy he ta Mara reih ta châbu miah nama ropa hra awpa ta ei châ haw ei.
Atanoh châbu palâhâhna liata social distancing taopa châ ta, COVID-19 Pandemic daihti a châ vâta zawpi hluhpi hrua thai’pa a châ lei vâta hrua eihpazy deita amâ hlao.
He MOTHLAW châbu he Rs.100/- ta zuapa châ ta, achalei khohpazy cha MWC nôpawpazy tawhta nata BML, MADC Office liata â chalei thei aw.
(Arohtuhpa, Beirôkhu Beitâ, Admin, Maraland.net)