SIAHA, 2 Phiata, 2020 – Siaha liata BSNL Service a chhie tuhapa a zie-y via thei n’awpa ta MSO Gen. HQ ta hmah ala ngâhaipa liata yzie a hnei via thei n’awpa ta BSNL Office khawpa châ ta, cha zawhzi ta BSNL liata ama hyutuhpa Aizawl lâ tawhta avypazy nata MSO Gen. HQ chhihthatuhpazy ta MSO Opi liata atanoh târi noh 02.10.2020 (Chutynoh) khata atyuhpahmaohna hneipa a châ. BSNL hyutuhpazy ta ama theina zydua papuapa ta hmahla awpa ta ama paryhsapa vâta BSNL Office khaw ngâhaipa cha pahy awpa ta paryhsapa a châ.
He atyuhpahmaohna he Pp. CH. Beikhochhi, President MSO Gen. HQ ta chhihtha ta, Pp. T. JB Rona, Vice President MSO Gen. HQ ta hmiapahnosa daihti a hmâh khai tawhta Pp. Judson KT. Zephatha, Gen. Secy MSO Gen. HQ ta MSO ta BSNL Office ama khawna chhâpa nata, MSO Gen. HQ ta Network Service Provider zy hmah ama sie via thei n’awpa ta MSO hmahlana kyh a reih hra. BSNL vyuhta ahlaopazy ta ama rairuna nata hmahla ngâhaipazy reina hnei hra ei ta, Mizoram liata General Manager vâro tlai ama hnei khao leipa vâta hnôh amâ sy zie zy ama reih hra. BSNL vyuhta avaw hlaopazy he Pp. Biakthianghlima, AGM (HQ), Pp. H. Lalhmingliana AGM (TK), Pp. C. Lalawmpuia SDE (BSNL) nata Siaha liata BSNL raihriatuhpazy ama châ.
BSNL nata MSO Gen. HQ aryhna point zy cha:
- Optical Power Ground Wire (OPGW) ta Siaha a vaw tlô thei n’awpa ta MSO Gen. HQ nata BSNL Office ta hmah ama la khoh aw. (He he Electric Wire nata Fiber Wire apakaohpa chi châ ta, Lunglei nata Serchhip zy ta ama hmâh ngâhai)
- BSNL, Aizawl tawhta Broadband Bandwith Hardware thiehpa ama vaw phaopa cha atanoh meeting khai tawta installation rai hria pazaopa châ ta, he heta Internet speed hma apasiesa via nahta pangiasapa a châ hra.
- BSNL Microwave Team zyta Thingfal liata Microwave Tower tawhta Line of Sight clearance ama tao thei n’awpa ta a chatliena lâta BSNL zyta hmah ama la aw. (Microwave Team zy he Tripura tawhta kaw tlô awpa ama châ.)
- Siaha liata Broadband Subscriber zyta network pha viapa ama hmâh thei n’awpa ta, Total Line Check BSNL zyta hnei awpa ta paryhsapa châ ta, Door to Door inspection ama hnei aw. (He he thla 1 chhôhta patlô awpa ta paryhsapa a châ.)
Eima pahno chyupa hawhta, MSO Gen. HQ heta Airtel nata Jio zy chhao ama hmahlana mokhei pazi lymâ ta, Airtel he Tower 2 pahy thei awpa ta patlô ha ei ta, ama worker pano (2) zy covid positive ama châ vâta rai ama hria chatlie thei lei zie ama reih hra. Jio deikua ama raihria liata kho akhina hmô awpa y vei. Airtel nata Jio he MSO Gen. HQ Executive Meeting ta ama chôchâh a pachia pathi heih aw.
(Source: Vyhphao Info.)