Atanoh KHP aduana ei 43-na eima vaw tlô thei heihpa vâta Abeipa moh cha reithaipa ta y mawh sy.
Atanoh KRIZYHPA HAWTI PY Aduana noh ei 43 ahmâhtuhpa hawtizy nata hawti nah âlykheituhpa zydua, daihti pha kawpa nata daihti ngiatlâh châpa nâmâ hmâhkhai awpa ta khokheina â sâh chaipa chhao ei cha hlâ hra ei.
Biehmiapa:-
K.H.P. Â dua kô nata noh he reizie nata pahnozie â lyu tlâ leipa ta, norai hlarai chhao ä chhih ngaita. Thyutliapazy ta hmo dopa eima pahno thei laih lymâ n’awpa ta cha châ ropa he y thei tlai lymâ sa la cha, rairuna zy, tymána nata a eichhianazy chhao he hluh tu thlyu vei aw.
Thokha ta Tlôsai khih liata phorâpa hawhta reih ei ta, thokha ta deikua Amôbyuh khih tawhta a vaw thaotópa hawhta reipazy chhao ama y heih hra.
Khei hawhpa rai vaw châ sa la, Marâ Awnanopa Thâtih roh awpa ta cha eima khopa chhao kho leipa chhao Tlôsai khih tawhna heta eimâ laichadai pyly awpa a byuh.
Thyutlia lômaohpazy châta KHP â kaw duah laih-na thâtih a laichadai awpa he hmo rainaopa châ tiarâh leipa ta, Deiva Awhsi chakhei pathla a chhuahpa nahta ei palyusa kaw. Keima châta chhochhi cha hmo ru kaw pa, hâratiepa ta Bei zuah laihsa â ti tyh awpa ta sadu a thliepa nahta phie phie ei palyusa.
Anodeikua hnabeiseihna keima liata vaw ypa deikua cha:-
Chô Awhsi khaihpa dy pathla awpa ei chhuahna liata Saikao theithu chhâ ei vaw dy pathla tlamaw hapa chhao ta, ei lailáhzy heta na sikhô aw veih ei na tahpa he lôtláh ei paona a châ.
Zasâh manôhzy saih u, rie na sikhóh khuh vy.
Na deichhy awpa ta Marâ râh Awnanopa nôpaw phapa zy, Chi Thâtih lâ chhâta Marâ Riahpaw, Machhyu Mahrâhpa zy, Marâ Reihchâ liata Chaolia ki maihpa a ka hapa zy hluhpi y ei ta, eina vaw chakhei khei thlyu hr’aw ei na tahpa pachâpa ta, he châpaw he vaw chapai chapâ ngâhpa na ei châ e tahpa rie na vaw pahnokhei muh vy.
K.H.P. Bievaopa (Motto):-
“Abeipa china he novâhna â thaona a châ. (Biesozy 1:7)
Thyutôna (Background):-
Tlôsai / Saikao khih liata Hawti p’enawhzy cha Marâ râh missionary zy hriapasana nata tiamana vâta hrozie nôchâ liata zy, hla nata bie pahâhna kyh liata khiah, achuna kyh liata chhao rai châ sa la Missionary nahzy khata ama palôh vâro tlai ama vaw pahnie (influence) pata a zá lá.
Tlôsai khih liata hawti lômaoh p’enawhzy cha hlâhta uhthei viapazy chhóh nata zâ ta hla amâ chupazy cha moh tyh ei ta, ama tha a paw ngaita. He hla â chu p’enawhzy he SK&LK (SATLIA KAONA LAIHSA KAONA PY) manôhzy ama châ.
SK&LK he atahmâ ta KTP (Krizyhpa Thyutlia Py) eima tahpa he a châ.
Hawti nahzy cha Krizyhpa Satlia nata laihsa khochhih ngaitapazy ta alAbeipa reithaina hla ama sapazy cha lâpaw tawhta nahthlie ei ta,a ei tyh ei ta, ama palôh â eih ngaita. Khizaw pawngianazy ta ama palôh cha panano thei rimá vei.
Abeipa reithaina hlazy a chu tah, Beipa Achhyna Byureih pathaihpa liata kaohki khaipahliena taih ta, vâ chô sáhpa charaona taihta sa awpa khona pathipalôhzy chhao ama vaw hnei laih lymâ thlyu hr’aw na ta pangiasa â chhih.
SK&LK zy ta hla amâ chu châki ta, hawti nahzy ta khótho lá tawhta ama ao nata reihzy ahlykheipa ta lâpaw tawhta amâ vaw zi tyhpa cha H.Dyuchi (Lykhupaw, Ano he KTP founder Zacho Hnaihly unawhpa H.Hrâmâ Sawchapawpa a châ) heta hmô ru vaw tah ngaita ta, ama khopasana zy nata amâ ngiahpazy cha hmah lakhei awpa khohna pathipalôh vaw hnei ha ta.
Tlôsai hawti nah hnohta, “Hla cha pachu ei sala, nama khoh ma? tahpa ta hiahhrihna tapóh vaw tao ta.
Hawti nahzy chhaota, eima khoh ngâsâ na, ngiachhiepa ta hlazy bâh maniah pachu tlai la, eimâ ly ngâsâ aw (A dairy tawhta ei la pachhuahpa a châ) tahpa ta amâ chhypa vâna chata H.Dyuchi chhao heta pachâ peimawh kaw ta, hawti nahzy cha thlaita hla vaw pachu pathao lymâ ha hra ta.
Cha liata hla amâ chu tua chaipa cha Eima Khizaw Noh zy a lei tita Lei Lyna a lei ha aw tahpa he a châ.
Cha liata hla a chu p’enawhzy thokhazy cha:-
- Pihnô Pawhei, Puhpa Tluanga, Vety dawhty lahpinó.
- Pihnô Ngisa, puhpa Vawkhai, Maisâh khihpa lahpinó.
- Pihnô Chisô, puhpa Thalo, Satly khihpa lahpinô
4.Pihnô B.Sango, puhpa H.Dyulua, (police) Saikao khihpa, Tipâ liata khih a sa ngâpa lahpinó etc.
- Pihnô T.Pawhie, puhpa C.Lalhranga (L) lahpinô.
(A diary tawhta lapa a châ):-
Târi 3, Hmypi, kô 1963 ta SK&LK Saikao Branch liata Hawti Hlapypadua awpa ta châ pangia ta, committee chhaota a vaw parysa ha hra ta, SK&LK ta a mohôh pazi.
Târi 5 Pachawh thlâpâ, 1964 liata HAWTI HLAPY or INDERMEDIATE HLAPY cha official kaw pata Tlôsai khih liata paduapa a vaw châ haw. Machâ H.Dyuchi he Hawtizy chhihtuhpa châta raopa a châ.
Sk&LK Saikao Branch ta Intermediate Hlapy tahpa cha Junior Hlapy tahpa ta vaw thla heih ta. Kô reipi a sie tawhta, SK&LK Saikao Branch zy ta SK&LK District Pakhypi Tisi khih liata hneipa liana chata *Hawti Py padua awpa ta a vaw ngiakhei ei ta, ama hianazy cha a pyhpa châ ta, a moh chhao he machâ Zaluaia, Tipá ta a bipa a châ. (Machâ H.Dyuchi nata eimâ paky nota eina chhopa a châ. Târi 2.10.2020).
Kô 1976 Zyhno Assembly liata K.H.P padua awpa ta biepachia awpa châ (agendâ) â vaw ngiapa cha a pyhpa a vaw châ haw.
K.H.P. Aduana Noh:-
Hawtizy kyh a pachâtuhpa India Râh Phopi Paw Mahatma Gandhi pinoh târi 2, phiata thlâpâ he Siku hawtizy nata Sawhkhâ raihripazy â pahâna noh (holiday) a châpa vâta ryhpaona châta hmâ pâpa ta K.H.P Aduana noh châta raopa a vaw châ.
H. Dyuchi thâtih chyupa:-
H. Dyuchi (Lykhupaw) he K.H.P. Founder tahpa ta pahnopa a châ.
H. Dyuchi he kô 1944, târi 26 phiata thlâpâ liata he chhaohlei lnoh khaihpa hmô awpata puhpa H. Hâmâ nata Pihnô Miriamizy likah liata vaw pih ta, piláh pachaki a hnei. A uhthei chaipa pazipa a châ.
Awnanopa châta chyhsa phahnai khoh ngaitapa a châ. Pachutuhpa châ ta, Marâpa Awnanopa kyh a pachâ tupa vâta, Lunglei liata pachutuhpa rai cha bâhsaipa ta, awnanopa liata lymâ chyh ta lapa ta, ICM/CCIM office liata typist rai vaw hria ta, a pension daihti taihta a vaw hriapa a châ.
Khazohpa chakaotuhpa ngáhchhipa a chá. SAIKAO KTP branch liata ano hawhta president patu pareipa y veih ei. (Kô 1979-1989, 1996-1999) President post he kó 13 tlai a vaw hria/patu. KTP liata kô 29 tlai daopathla leipa ta CHAKAONA RAI a vaw hria hrapa a châ.
Atanoh taihta maniah a hroláhpa he a saw nahzy, chhôhkha sanawh zy, khihsaw zy nata CCIM awnanopazy ta eimâ ly ngaita. Abeipa ta tlâhna phapa nata hriiah pathaihna a pie pazao lymâ awpa eima hnabeisei.
Daihti ei hnei leipa vâta â ki chochâ kaw pata vaw roh thei leipa na ta, nama pachâthaina ei châ haw ei.
KHP thâtih Roh awpa ta nâ vaw hawtuhpa ei chyhsa pasáhsapa Pachutuhpa Zachhihpa ei uhta T.A.BEIHNIA chô liata chhao alynabie ei hlâ.
May God Bless You All.
Rohtuhpa: Samuel Hnaihly
Dated: 2 October, 2020