Covid 19 pasana hri-iah vâ dei châleipa ta Nopi vaw lie aw ta, Marasawzy thapadâhna nata apalypa-uasana lâ ta tha eima padâh daihti a châ ha heih. He he chyhsapa nata khizaw tao zie cha ha tlôh ta.
Chyhsapa he rai ngalah châleipa ta thapadâh veichâhzy angiah kaw. Cha hawhpa eima châpa vâta helâ he eima râh ta apachâ peimawh kaw awpa sâkh a châ tlai hra.
MADC sawhkhâ thatlô kawpa chata nachâh pahno kawpa ta Mara Typical Village, Chedôlômathu, zyhno lia vaw padua ta, Marasaw apachaipa ta thyutlia hluhpi ta alypa ta ama tly tlai hra.
Facebook nata WhatsApp profile nohthla liata alâluah chaipa sâkha a châ heih. Zâkô 2020 lyuva khutla cha-ypi kha Tipa RD block ry liata alyna zy chhao Mara Typical Village liata hmâpa a cha.
He hawhta Mara thyutlia zyta eima lypa nata tha pathyu ngaitapa he atahmâ rohrypa ta a y haipa alyu.
Biehneituhpazy ta eikha zie ma ama chahlô? He su he Marapa dei châleipa ta Marapa cheirâh nata chei-ô zy mo awpa ta foreign tourist zy taih ama vaw tly.
Atlytuhpazy pahana phapa y leipa ta, Ti do awpa y hra vei. Tyuduana a-ichapa (parament) y hra leipa ta, sao nota car zy sie thei hra vei.
Asu he lyubipa a lyu daihti a y thlah ha tyh.
Chavâta ta he su he MADC ta he hlâta thaviapa ta mohôh sala, a mohôdâhzy chhao public-corporate-private ta zy tlyma lâta thla a ngiah ngaita kaw.
A o zy sa tyh hrei sihla, Meizy ti beihleipa avaw cha khiah thlaita a hmy lymâ tahpa pahnotuhpa châtlôh pi ta, chavâta biehneituhpazy ta uasa via sihla, Palâ tipo atlypazy, tlâh akiahpazy ama tlei/chapia daihti liata Mara cheirâh palâsana supi lâta rie pachâsa thei ei sala kho a chhih ngaita kaw aw dia.
(He Article pha kawpa arohtuhpa he St. Apa VB. Beitâ a châ.)