SIAHA, 12 Pamih, 2021 – Mara zy ta Chaypi eima hneipazy hry liata rônah chaipa ta eima hmâ tyhpa Lyuvakhutla Chaypi ei 19-na cha MADC Office tlyliah, Siaha liata aly kawpa ta ahmâpa a châ.
Puhpa S. Hiato, Ex-CEM & Ex-Minister cha Chaypi Azipa châta hmâpa a châ.
Puhpa Pachi Hlychho, Chairman, Lyuvakhutla-2021 Organising Board ta zawpi alypangiana daihti hmâh ta, Puhpa FC. Zakhai ta Lyuvakhutla-2021 Chaypi pahyna châta hladyuh pathluah ta, Puhpa K. Ngiabei nata Puhpa K. Thansiama zy ta chiahmie aparo kawpa ta tôpa ta Lyuvakhutla-2021 ahmâ awpa ta avypa zawpizy amâ ly pangia hra.
MTP Branch: Meisavaih East zy ta Lyuvakhutla-2021 pahyna hla sa ei ta, Rev. AZ. Beirôna, General Secretary, CCI(M) Headquarters: Saikao ta daihti pavaosana a hmâh.
Azipa Puhpa S. Hiato chata Lyuvakhutla-2021 poh chaluahna daihti a hmâ khai tawhta bieriena chyupa hnei pazi ta, “Marapazy pi he mahnô mahpaw chhâ tawhta abu-asai nata niedo ativypa châ pi ta, cha chata chipho achahra kawpa nata tiama kawpa eima châ tahpa palâsa ta, atanoh Lyuvakhutla Chaypi eima hmâna daihti liata eima mahnô mahpaw taozie phapa, sasyh ativyna zydua kha eima palôh liata thieh heih sala, sasyh hriapapuapa pala hmâpa ta poh asa thai kawpa, eima chi nata pho atobina eihrâhpa ahneipa eima châna nata eima chi nata pho taozie (culture) hleikhô ta pho lâ nano nanopa ahneipa eima châna chhao, he Lyuvakhutla Chaypi he ta eima palôh liata vaw pathieh via lymâ sa la, eima chi nata pho taozie zydua cheichalo via lymâ mawh sy” tahpa ta a reih.
“Marapazy pi ta chi hro pho hropazy taozie nata culture hâ ala lymâ sila, chipho hropazy biehneina ry liata eima y laih lymâ khia deikua cha eima chipho taozie zydua he tlao eima pahlei khai ha aw tahpa ei chi kaw tyh” tah ta.
Puhpa Hiato chata “atanoh Lyuvakhutla Chaypi eimâ hmâna daihti liata Myanmar liata eima unawh sietanô zy ta, pheisaih ryureina vâta amâ rôh haina zie zy eima phano khai,” tah ta “nochhi lâ ta eima Mara heihpazy athei pi ta, riethei ama taona zydua chhao pahno pi ta, palôh chhôh chaipa tawhta chhao thlah eima chhâ khei hra” a tah. “Khizaw râhri ta miah pachhaih hrasala chi kha phuapa eima châna he ta kyh apachâ raihriena tlao sa papua via sa la tahpa he eima my awpa châ vei” tahpa ta a reih hra.
“Atanoh Lyuvakhutla avaw hmâh tuhpa zydua, he Mara Chaypi eima hmâpa he ta Mara chipho châna liata miah pahra pathi heih sa la, Marapa ta paduapa eima châna liata aly-thaphana miah pie via rili sa la, Marapa he chipho tiamapa nata zachhihpa eima châ tahpa liata miah pasia via rili heih sala ei khoh kaw. Hlâno mahnô mahpaw zy tiamana, hriapasana paluahsa tuhpa châ ta he Chaypi Lyuvakhutla he hmâh lymâ thei achhuah ei suh vy.” tahpa ta Chaypi avaw hlaopa zydua nata Marasaw zydua hnoh ta bietapa pachhohpa a reih.
Puhpa Kesavan R, IAS, DC, Siaha chhao, biereina chyupa hnei awpa ta raopa châ ta, tovyuh phapa araotuhpa Lyuvakhutla Organising Board lâta alynabie reih ta, Lyuvakhutla Chaypi eimâ hmâpa he ta hlâno mahnô mahpaw hrozie thata chhopasia ta, chhâ avaw y awpa taihta a sie lymâ awpa a châ; Mara pho lâ chi nano nanopazy, Mara atobina pha kawpa zydua chhao Khizaw kawh viapazy lâ liata palâsa mawh sy tahpa ta reih ta, Lyuvakhutla Chaypi avaw hmâhpa zydua hnoh ta khokheina a hlâ hleikhô ta, Mara atobinazy a pasâhsa zie reih ta, atanoh liata â vaw tobina chhao Mara atobina ta â vaw tobi hra.
Atanoh Lyuvakhutla-2021 Chaypi ahmâna liata thai kawpa nata pahnie kawpa ta bie aphuahpatuhpazy kha ary liata palâsapazy he ama châ:-
- Laihsa Ornella Khithie
- Satlia MC. Beihrohmô
Atanoh liata pho lâ lâh awpa hruapa, apamosa theipazy”-
- MTP Branch: Meisavaih ‘W’ (Sawlâkia)
- MTP Branch: Council Vaih (Athih lâ)
- MTP Branch: Siahatla (Vâia lâ)
- MTP Branch: New Colony (Awhkhy lâ)
- MTP Branch: Siaha (Khohcheinô lâ)
- MTP Branch: ECM Vaih (Pazita lâ)
Atanoh liata Mara Artiste hlaa awpa ta hruapa, asa theipazy:-
- Vasty Azyu
- Chhingpuii Azyu
- MC. Mathai
- Jessica B. Khuhly
- T. Merisa
- John Beizachhi Phuto
Daihti chhâna lâ liata Puhpa JB. Chozah, A&CPO nata Member Secretary, Lyuvakhutla-2021 Organising Board ta alynabie reina daihti hmâh ta, Puhpa Pachi Hlychho, Executive Secretary nata Chairman, Lyuvakhutla-2021 Organising Board ta Chaypi poh lopa ta atakô Lyuvakhutla-2021 Chaypi cha khawpa a châ.
Atanoh liata hrua eihpa nata tovyuh ahneipa zy ta sawhkhâ ta dâh nata phôh ataopa zyna chô ta Chaypi he ahlao ei ta, COVID-19 hripipa vâta zawpi lâ hruana taopa a châ leipa deikua Lyuvakhutla-2021 Organising Board ta Mara zawpi zy pachâthaina amâ haw.
(PRESS RELEASE No.21/2021)
ISSUED BY:-
Information & Public Relation Department
Mara Autonomous District Council
Siaha