SIAHA, 13 Pachawh, 2021 – Atanoh dawh 11:00 Am liata Puhpa HC. Lalmalsawma Zasai châbu ropa “BIE HROHPA – Abeipa ta eina piepa” cha Puhpa K. Hrahmo, Chairman, BML nata EM (i/c Edu.), MADC ta Farmers’ Training Centre, MADC Complex, Siaha liata zawpi rei thei awpa ta a palâhâh.
Programme he Board of Mara Literature (BML), MADC ta pachhuahpanoh ta, Puhpa MC. Pabei, Asst. Secretary, BML ta chhihtha ta, Puhpa JB. Khaisia, Proofreader, BML ta Pavaosana thlahchhâna a hnei. Pihnô N. Elizabeth (Dy. Secy. DPAR&P, MADC) ta Châbu thâtih rei chhieliena (saichhieliena) hnei ta, Satlia A. Beilaipha, Meisavaih West ta mo pakha hlasana a hnei.
Khichhai laipa Puhpa K. Hrahmô chata châbu a palâhâh khai tawhta biereina chyupa hnei ta, Puhpa HC. Lalmalsawma Zasai he râh chakaotuhpa (MDC – Amôtlâh Biatuhpa) a châ hleikhô ta Awnano Machâ (ECM Bethel) pakha châ ta, sapa nata thlahpa liata nôpaw pakha châ ta, Awnanopa nata a bia chyhsa zy buakhei awpa hluhpi ypa ta a rai zy a bua kaw tyh awpa hry liata he hawhta Châbu pha kawpa nata ryutlohpa a vaw roh papua theipa he amopâ tlâh a châ zie reih ta, mo hropazy hro taopathi tuhpa nata pahaona pha kawpa a chapa ta a pahno zie a reih hra.
Puhpa K. Hrahmo chata biereina hnei pazao ta, “a châbu he Khazohpa bie hrohpa, Abeipa bie pachuna lâchhâh châ ta, aly â chhih hmeiseih.”
“BML ta he hawhta sawhkhâ kôthiehpa (April) â thao pata nahta châbu sâ 1 eima palâhâh theipa he arônah tah hmeiseih na ta, BML he ta kôchareih châbu 10-15 palâhâh tyh pi ta, atakô lia chhao eima papua hluh awpa hawhta hnabeiseihna eima hnei vâta Mara reih ta ropa châbu a vaw hluh via lymâ awpa vâta eima thlah a vaw lôh kaw.”
“Atahmâ cha MADC biehneina sâh viapa hlâpa eima châ thaoh no hawh ta châ khao leipa ta, MADC he Class-12 taih avao thei awpa ta biehneina piepa châ ei si la, Class-12 taihta achu thei awpa Mara reih Châbu eima hnei ha bâpa ta ei pahno. Âthao no cha Middle School liata chu awpa Mara reih ta ropa châbu eima hnei lei vâta Primary School ngâlâh kha MADC ta eimâ vaw vao tuapa a châ. He he Marasaw zy ta Literature lâchhâh hmah eima sie zie ei roh khoh vâta ei vaw rei palâhâh pâpa a châ.”
“Châbu papua awpa he ta sôh hluhpi hryuh byuhpa a châ vâta Marasawzy ta châbu rona lâ hmah eima sie via nawpa tahpa ta MADC ta Art & Culture Department liata châbu papua nawpa châta sôh budget liata sopa châ ta, Marasaw, châbu aroh thei awpa, sôh nata thih lâ rairuna a hneipazy châta châbu zydua mâ tawhta 75% he MADC ta â tôhpa a châ. He hmâpa he ta, atahmâ cha chyhsa hluhpi ta châbu ama vaw roh thei haw; aly’pa a châ hmeiseih.”
“Mararâh liata Châbu arohtuhpa zydua hnoh ta deikua “Mo pakha hro châta zy, khitlâh châta zy nata Mararâh châta pachuna pha kawpa a châ awpa châbu zy roh achhuah via lymâ awpa nata achu tlâh châ awpa châbu roh achhuah chyu awpa ta ahawna ei tao khohpa a châ.”
Puhpa K. Hrahmo chata, “Palôhru liata phahnai ngiah kawpa ta achhuahna hmeiseihpa a y khiah hmo he â tao thei tlaina tahpa he, he châbu, atanoh liata eima palâhâhpa a rohtuhpa hmotaopa nata hro tawhta eima hmô theipa a châ.” tahpa ta a biereih chhâna liata a reih.
Daihti chhâna lâ liata Puhpa HC. Lalmalsawma Zasai, Author ta alynabie reina daihti hmâh ta, Châbu papua thei awpa ta thatlôna nata ryhpaohna a pie tuhpa Khazohpa hnoh ta alynabie reih ta, BML, Art & Culture Department, MADC nata Puhpa K. Hrahmô hnoh ta alynabie reih ta, atanoh liata avaw hlaopa zydua hnoh ta alyna bie a reih. COVID-19 vâta chyhsa hluhpi hrua awpa â ryh lei vâta saihei kaw tarawpa ta avaw hlao thei leipa zydua hnoh ta alyna bie reih ta, pachâthaina chhao â haw hra.
Châbu cover he ano Author Puhpa Lalmalsawma ta a design-pa châ ta, a chhôh liata biepipa chhaih/bo 37 lâta pachhaihpa châ ta, tho 207 ypa ta, bu kha ta Rs.150/- ta chalei theipa a châ. Author ta â pasaina hawhta nata palâhâhna alyna châta atanoh ta palâhâhna programme avaw hlaopazy deikua bu kha ta Rs.100/- ta chalei chyupa a châ. A copy a khohpazy cha BML, MADC office liata tly ma, ano Author hnoh ta tlyma chalei theipa a châ aw.
(PRESS RELEASE No.24/2021)
ISSUED BY:-
Information & Public Relation Department
Mara Autonomous District Council
Siaha.