Puhpa L. Khaichyu & Chhôhkha tawhta alynabie reina

Jeno Hlychho ( L)

SIAHA, 14 Khihpa, 2021 – Eima nô khoh ngaitapa Jeno Hlychho ta Dt. 8.7.2021 (Thu) nohta maniah â pahâsaina kyh liata ngiachhie tuhpa nata kypachâtuhpa hluhpi hnei pi ta, alynabie rei awpa eima hnei hluh ngâsâ.

Pasana khiakhi kawpa â vaw tyhpa vâta Aizawl Civil Hospital liata operation tao awpa achâ daihti liata Puhpa N. Zakhai, CEM MADC nata a hrialâhpazy ta phusâ hluhpi ta maniah bao ei ta. Chahleikhôta chhôhkha sanawh nata viasa richâh zy nata eima Awnanopa zy ta thlahchhâ kheina hleikhô ta sôh nata thih lâ zy taihta maniah bao ei ta, nama zydua chô lâ liata alynabie eima reih hmeiseih.

Zemabawk Cancer Hospital, Aizawl lâ maniah referred ei ta, thla hluhpi eimâ mohôh chhôh ta eima pihnô M. Siali nata chhôhkha zy nata chhôhkha sanawh rinô zy ta tha ta maniah buakhei ei ta, ama chô liata eimâ ly ngâsâ.

Aizawl tawhta Delhi AIIMS la referred pa vaw châ ta, saihei kawpa ta Air Ticket chalei nawpa phusâ maniah bao tuhpa zy nata thohna a mohôh nawpa phusâ maniah bao tuhpa zydua hnohta alynabie eima reih hra.

Delhi thohna O lâ siekhei tuhpa a narônô HC. Roveli nata John M. Beilaisei zy, Delhi liata vaw buakhei tuhpa Rev. Benjamin L. Khai-u nata Delhi liata eima nawhta zy chô lâ liata alynabie eima reih hmeiseih.

Delhi tawhta hnabeidyhpa ta a kaw tlô tawhta Awh pahu awpa maniah pie tuhpa zydua nata nie nata do awpa maniah pie tuhpa zy, phusâ lâta maniah bao tuhpa zy hnohta alynabie reih pi ta. Delhi tawhta a kawtlô tawhta O lâta kyhpachâ kawpa ta maniah mohôh khei ta ato liata maniah buakhei tuhpa a nô L. Dawhlei nata a narônô HC. Roveli nata a vahpa L. Beirangia zy nata chhôhkha sanawh nata kyhpachâ kawpa ta zâ hluhpi khih miah padei khei ta, maniah mohôh khei tuhpa zydua hnohta alynabie eima reih hmeiseih.

Thohna â mohôh nawpa tahpa ta USA liata State nano nanopa tawhta zy, Australia, Canada nata China tawhta zy phusâ ta maniah za bao ei ta, chahleikhôta a pasa thaoh no tawhta maniah â pahâsaina taihta a byuhna nata â ngiana hawhta phusâ maniah zâ paphao tyh tuhpa eima saw uhthei chaipa L. Lawngsang, USA zy hnohta a lynabie eima reih.

UPC (NEI) District Superintendent nata a hrialâhpa zy, UPC (NEI) District Headquarters Local zy, UPC (NEI) College Vaih Local nata College Vaih LAD (Nô py) zy ta thlahchhâ kheina hleikhô ta phusâ zy chhao ta maniah tly ei ta, eimâ ly ngaita.

Lockdown vâta khihsaw zy ta a ma zatly theileipa vâta Iana nata Siata I & II VC nôpaw nata MTP chhituhpa nata MCHP chhituhpa zy ta Iana nata Siata I & II khihsaw vyuhpa ta za tly eita, Phusâ nata hmosai piepa hluhpi maniah hlâ ei ta, ama chô liata eimâ ly ngâsâ.

A hrona vaw chhâ ta, maniah â vaw pahâsai tawhta ri vaw kiah ta; hmosai piepa hluhpi – poh, pawpi nata phusâ zyta maniah taokhei tuhpa zy, O chhô lâ liata atyuh duana â ryh leina chôta riethei miah tao khei tuhpazy nata tlyhmia lâ lia taihta atyuduana â ryh leina chô ri a vaw kiah tuhpa zydua nata khichhai lâ tawhta ri a vaw kiahpa zydua  chô lia chhao ta alynabie eima reih hmeiseih.

Khichhai nata viasa richâh zy ahmie awpa Vao pôhpa sâ 7 dua nata Sahphâ zy maniah pie tuhpa zydua hnoh ta alynabie eima reih.

A pasana zy vaw paru via lymâ ta, College Vaih MTP Branch nata Laila Section MTP chhihthatuhpa nata member zy ta maniah tyudua lâhpa ta thlah miah palôh ei ta, â vaw pahâ tawh chhao ta ato miah buakheipa ta, thobyh pha kawpa maniah ama taopa hleikhô ta, â zia nawpa su phakawpa zy maniah paryhpa ei ta, saihei kawpa ta thlâ pha kawpa zy miah ama chaopa vâta eimâ ly ngaita.

He zydua eima chô liata nama saiheina nata kyh maniah nama pachâna zydua vâta eima Beipa Zisu Krista moh ta alynabie cha reih hmeiseih pi ta, ato taotheituhpa eima Beipa Zisu Krista chata byhnâ hluhpi cha pie hri mawh ei sy tahpa he keima nata ei chhôhkhazy eima thlahchhâna nata alynabie eima reina a châ.

Eimâ châly ngâsa ei.

Nama ngiachhiena a daotuhpa,

~ L. Khaichyu nata a sawnah

College Vaih-II,

Siaha.

Leave a Reply

Your email address will not be published. Required fields are marked *