SIAHA, 19 Thlazoh, 2021 – Mara Autonomous District Council, Dy. Chief Whip châta rao thiehpa Puhpa T. Seido, MDC, Laki biatuhpa cha atanoh dawh 12:00 Noon kha ta Environment & Forests Department Conference Hall, MADC Complex liata alykheina hneipa a châ.
He programme he Puhpa HC. Beikhai, Dy. Secretary (GAD) ta chhihtha ta, Rev. B. Beilua, Moderator (ECM) ta programme pavaosana daihti a hmâh.
Puhpa N. Zakhai, CEM zachhihpa ta biereina chyupa hnei ta, atamy liata eimâ chhaihpa Pihnô Ngenpari (L), Amôtlâh biatuhpa Puhpa HC. Lalmalsawma Zasai, MDC Nô ri â zia thlâna chô ta he liata alykheina programme hmâpa a châpa he, programme tao khai chiehpa a châ hapa vâta chhôhkha lâ liata pachâthaina ahaw ta, Pihnô Ngenpari (L) miah â pahâsaipa pei a tah zie nata, a siesaipa Puhpa HC. Lalmalsawma Zasai nata chhôkhazy palôh hmeiseihpa ta a taokhei zie a reih.
Puhpa N. Zakhai chata reih ta, eimâ lykheipa Puhpa T. Seido, Dy. Chief Whip châta raopa a châpa cha â lykhei zie reih ta, Puhpa T. Seido he achatliechakoh kawpa, function laipa hnei daihti liata Marasawzy ta eimâ pachy kawpa nata a theina zydua apapua tyhpa a châ tah ta, atanoh liata Dy. Chief Whip rai chhao, pahnie kawpa a hria thei awpa ta hnabeiseihna a hnei zie reih ta, ano nata 11th Term MADC liata a hrialâhpa zydua vyuhpa ta alykheina nata khokheina chhao a hlâ hra.
Puhpa T. Seido, MDC chhao alynabie reina nata biereina chyupa daihti piepa châ ta, ”A reisina nata ABEIPA china lymâ cha hneirôna zy, zana zy, hrona zy a châ” (Biesozy 22:4) tahpa Biehrai bie cha Politics liata â vaw ngia tawhta motto châta a vaw hmâ lymâpa thâtih nata hmâ pazi lymâ awpa â chhuah zie reih ta, atanoh duahmo liata a padua tuhpa Khazohpa, MDC nôpawpazy nata Laki bia zawpizy hnoh ta alynabie a reih. MADC ry liata Officer nata Staff zydua hnoh ta chhao hrialâh phapa châ awpa ta hruana nata ahawna a tao hra.
Daihti chhâna lâ liata Puhpa K. Chhihrau, Secretary to the District Council ta vote of thanks reipa ta alykheina programme khawpa a châ.
Atanoh alykheina liata Puhpa L. Zakhu, VCP, Laki nata a hrialâhpazy a kaw hlao thei hra ei ta, Puhpa N. Zakhai, CEM zachhihpa nata a hrialâhpazy amâ hlao hleikhô ta, hrua eihpa MADC ry liata HoD zy nata Political Party lâta nôpawpazy chhao ta COVID-19 hriiah tawhta avaina sawhkhâ dâh taopa SOP zyna chô ta programme he ahmâpa a châ.
( PRESS RELEASE NO.42/2021 )
ISSUED BY:-
Information & Public Relation Department
Mara Autonomous District Council
Siaha