CHAPI, 29 Thlazoh, 2021 – Atakô târi 17.02.2021 khata Gov’t Saiha College, Siaha Adventure Club nahzy ta Chapi khih liata Chô Khazoh kuzô rônah viapa nata alâluah viapazy mopasiana nata a thâtih achupasiana hnei awpa ta manôh 14 tlai Chapi khih ama tlô. Khihtlâh liata Joint MTP nata Joint VC zy ta ama vaw y dy.
Tichhei Tisao (Waterfall) âsâhna thlie awpa ama khopa vâta nata a thâtih achupasia awpa ama khohpa vâta he Adventure Club nah he Chapi khih atlôpa ama châ. VC,MTP,Z.M High School Students nata phahnai angiah viapa hluhpi zy ta asu taihta ama zi thei hra.
A thâtih chyupa :
Tichhei Tisao/Lôkâh he eima mahnô-mahpaw daihti tawhta ama chahi-chaba(chihuh) kawpa châ ta,apahno viapa zyta ama reina dâh ta cha,he Tisao/lôkâh he ahripa (Vâhiah) nah pahrâna châ ta, hlâno viata cha ama pôhpa chhao ama hmô tyhpa hawhta ama reipa a châ. He vâna heta ama vaw chi kaw tyhpa châ ta, Kri eima zyh tawhta kô 113 nata thla 5 daihmâ apha tawh chhaota he Lôkâhpa china thlahpa cha, a chheipâh khihsawzy palôhru liata chi hawhta atanoh taihta a rie ngâtlâh ha chy.
 sâhna zie ama thlie :
Gov’t Saiha College, Siaha Adventur Club nahzy ta Chaori (Rope) hmâpa ta a su liata ama thlie laihna cha he hawhta a châ. Thyudyu thisaih lalôh lichih sai ama châna ta hawhta Tisao/Lôkâh liata apangie ta achô tua awpa âchhu ta achhu ei ta, ama ngâh kaw sai. Avaipa apha chai tahpata ama Team Leader Lalchampuia,No-aotlah, Mizoram Adventure Wing liata Training aza hnei hapa nata Experience ahnei chaipa ta hmia achhih ta, Chaori hmâpa ta achô lymâ haw. A viasa sahlao ta ano hnoh ama za pazi lymâ ha hra. Apahlei pabainay hrao leipa ta achhana taihta ama chô pathla thei.
Tichhei Tisao/Lôkâh âsâhna he record hmiatuapa liata 343 Feet châ ta, Gov’t Saiha College, Siaha Adventur Club nahzy ta ama thlie pathina liata cha 489.4 Feet a châ.
Courtesy : LV. Zahe
Photo source: Benny Photography, Siaha.