Pentecost Sunday Sermon – THLAHPA PATHAIHPA RAIHRIA
Biehmia:
Keimo Krista angiapâ ta, a zituhpazy pi, eimâ ngiah ngaitapa hmo sâkha cha Thlahpa Pathaihpa raihria pahnopasiapa he a châ. Chavâta atanoh, Penticost noh (5/6/2022) liata eimâ chu awpa ta a chyu ta ta ei vaw roh.
Biehrai parohpa liata ‘Khazohpa Thlahpa’ nata Biehrai Thiehpa liata ‘Thlahpa Pathaihpa’ tahpazy he bie miakhapa châ ta, he châpaw liata Bible bo nata châh palâsapazy he o lâta reih pâ lymâpa châ sala novâh âchhih via heih aw.
- Biehrai parohpa daihti liata:
He daihti liata Thlahpa Pathaihpa raihria cha Thlahpa Pathaihpa cha Khazohpa nata tlyzawpa a châna hawh tlai ta Abeipa Khazohpa ta alei nata avâ ataona liata Thlahpa Pathaihpa he âhlao hra (At. 1:1,2- He liata Khazohpa Thlahpa tah awpa liata Thlahpa tahpa he my pathleipa châ ta, a pei ngaita).
Bei Sawlawmaw hnohta sona nata pahnothaina a pietuhpa kha Thlahpa Pathaihpa châ ta; hrosopazy liata Khazohpa bie pahnosa ta, a paphuahsatuhpa chhao Thlahpa Pathaihpa a châ hra. Ryureituhpazy lâta chhao riahphana nata sapa lâ taihta thatlôna eih- hrâhpa a pietuhpa kha Khazohpa Thlahpa Pathaihpa a châzie ryureituhpa Samsawna hro nata chakaona tawhta eima hmô (Rt.15:14-17).
Anodeikua cha Biehrai parohpa daihti liata Thlahpa Pathaihpa tonazie cha angiapâtuhpa maih hnohta piepa châ leipa ta, Abeipa Khazohpa ta ahmâh khopazy hnoh deita ta piepa châ ta, cha chhao cha Khazohpa rei amâ ngiah chhôh châ deita châ ta, pie theipa nata la heih lilaw theipa a châzie Bei Sawla hro tawhta eima hmô (Sm. 10:10-12; 16:14).
- Biehrai Thiehpa daihti liata:
He daihti liata Thlahpa Pathaihpa raihria eima hmôpa deikua cha a vaw ki chochâ via lymâ.
Pamosa nawpa ta:
(a) Thyuheih Beipa, eima Beipa Zisu ta a reipa hawh tlaita Penticost noh liata Thlahpa Pathaihpa cha a biezyhpa ta su kha liata a hâ thlâh hapa chyhsa 120 chô liata a hmotaotheina chhaota vaw tlô ta; ngiapâtuhpa, ano a zituhpazy thlahpa lâ hro liata hrozie-nôchâ ânanona, riahphana nata ngiapâna kyh liata thatlôna thiehpazy hneina chôta Abeipa ama chakao lymâ.
Apôhkhana, kyhpachâna raihriana, riaphana nata palôh miakha phaohpa ta ama hro lymâ (Hmt. 1:6-8; 2:1-47).
(b) Krista ta eima vyuhpa ta chatlaina rai a hria khai hana zawhzi ta Biehrai Thiehpa daihti tawhta ahyrai Krista a ngiapâpa maih hnohta Thlahpa Pathaihpa he piepa nata patosa khaipa eima vaw châ haw (Zh 7:37-39; Rm. 5:5). Abeipa cha reithaipa ta y mawh sy!
(c) A chhana nata aly a chhih chaipa cha Biehrai parohpa daihti hawhta châ khao leipa ta, Thlahpa Pathaihpa he chhâzaw ta maniah a pahrâlâh awpa a dei châ leipa ta (Zh. 14:16), bie hmeiseihpa zydua liata maniah chhihthatuh awpa ta piepa eima châ hra (Zh. 16:13).
Chavâta, reithaina hla phituhpa ta maniah hrua ta- Thlahpa Pathaih hrua nota nahthlie leita y khah la, na leidia pathlei aw na, hawh khuh vy a tahpa he eima hro chyu ataopathina châta hmâh awpa ta eimâ pasyu.
Abeipa ta a bie byhnâ pie mawh sy, AMEN.
(Admin, MNN. Source: Goshen Voice Dated 5.6.2022, Vol-1, Issue No.9)