SIAHA, 4 Pamih, 2023, Pachynoh – Atanoh dawh 11:00 AM pa ta Centenary Hall, Lôtai (Zyhno) khih liata kô 2022 liata sâh nata âhiah ahnei hluh viapazy lymâ raina programme liata Puhpa K. Chhihrau, Executive Secretary, MADC cha khichhai laipa (chief guest) châpa ta â hmâkhei ei.
Puhpa TT. Khaihlu O liata my pati pahâh kawpa avaw chhuanohpa ei ta, aly kawpa ta my pati ama dôh khoh.
Programme he first session liata Puhpa C. Chamaw, VCP Lôtai ta chhihtha ta, second session liata Puhpa B. Kiala, Vice President, VC, Lôtai ta a chhihtha. First session programme he machâ TT. Khesa, Awnano hyutuhpa, Lôtai ta Abeipa lâ pavaosana thlahchhâna hnei ta, second session liata machâ TT. Pawla, Lôtai Local secretary ta thlahchhâna ta daihti a pathao.
Puhpa B. Lawhe, Secretary, Lôtai VC ta report piena nata Sâh hnei hluh viapazy lymâ raina hnei ta, Puhpa B. Lawhe, Secretary, Lôtai VC ta report piena nata Âhiah hnei hluh viapazy lymâ raina a hnei.
Lôtai VC Tawhta kô 2022 pa daihti liata Lyu taopazy hry tawhta Sâh a pavei hluh chaipazy cha 1. Puhpa S.Tlaisa châ ta sâh a hneinazie he (tin) 385 a châ. 2. Puhpa TH. Thlabua, sâh a hneinazie cha (tin) 330. 3. Puhpa BV. John, sâh a hneinazie (tin) 253 a châ. Lôtai VC Tawhta kô 2022 pa daihti liata Lyu taopazy hry tawhta Âhiah a lapapua hluh chaipazy cha 1. Puhpa TT. Pawla châ ta âhiah a hneina zie (Qtl) 11.67 châ ta, a mâ lâta pachâsapa ta Rs. 3,49,999 a châ. 2. Puhpa TH. Thlabua, âhiah a hneinazie 7.5 Qtl, a mâ lâ ta pachâsapa ta Rs. 2,25,000 a châ. 3. Puhpa C. Pawtha, âhiah a hneinazie 7.08 qtl., a mâ lâ ta pachâsapa ta Rs. 2,12,499 a châ.
Lôtai Village Council/Court ta Puhpa K. Chhihrau, ES, MADC hnohta ryuchâ ama hlâ pâ hra.
Laihsa VT. Belinda, Pihnô HC. Zingia nata laihsa Centenery zy ta pahnie kawpa ta hlasapa ta zawpi ama palôhpahawh.
Kô 2022 liata Lôtai Village Council chhôh liata sâh hnei hluh viapazy pathôh lymâ he laihsa Sepi Solo (Api) ta USA tawhta â vaw tôh (sponsor).
Guest of honour Puhpa Pheiki Solo, Sr. R&SO, MADC chhao ta pasyunabie pha kawpa reina a hnei hra. Puhpa Pheiki Solo chata hâkô Lôtai Village Council chhôh liata âhiah ahnei hluh viapazy lymâ â tôh (sponsor) awpazie chhao a reih/phuah pâ hra.
Puhpa K. Chhihrau, Executive Secretary, MADC ta pasyunabie a reipa tlâhpi viapazy:
“Atahmâ he duasu liata ei vaw duah theina chhâpa cha Lôtai khihsawzy nama deichhyna nata nama thlahchhâkheina vâ deita châ ta, nama chô lâ liata a hmia tua ta alynabie ei reih. Chahleikhôta, atanoh he programme liata khichhai laipa ta na hrua ei chi ta ei ly hmeiseih.”
“Nama raihriana liata tiama kawpa ta nama hriapasana theilâpa cha Abeipa ta byhnâ cha pie ei ta, atanoh lymâ dao thei awpa ta Abeipa ta hnatlâna cha pie ei ta, lymâ alapazy chô lâ liata Abeipa ta cha ypâ lymâ ei sala, kei chhaota châ lykhei hmeiseih ei na ta, nama raihriana liata a palâ kawpa ta nama hria lymâ thei nawpa ta khokheina sâh chaipa ei cha hlâ ei.”
“Atahmâ ta hehawhpa ku raihriapazy lymâ piena programme he a eithôhna châ ta, hâkô lymâ piena programme liata sâh ahnei hluh viapazy lymâ cha kei ta ei vaw tôh (sponsor) aw. Khazohpa hmiapasahna chôta nama raihriana liata tiama nama vaw papua via lymâ awpa ta ei châ haw ei.”
“Lôtai khihsawzy pi heta Khazohpa byhnâ to kaw pi ta, Khazohpa khoh dâh hawhta y ta, hriapasa via lymâ namâ vaw chhuah lymâ awpa ta ei châ haw chanei ei.”
“He lymâ raina programme heta a pôhkhana vaw patlôsa via lymâ sala tahpa he ei reih khoh kawpa a châ. Eima missionary ta Thyu la, khaih teh tahpa bie miah amâ tlyhpa hawhta, Khazohpa hmiapasah lymâna chôta, tiama eima papua via lymâ awpa he a peimawh ngaita kaw.”
“Tiama kawpa ta ku raihriapazy lymâ raina programme nama vaw pachhuahpanoh tyhpa he a pha ei vaw tah hmeiseih. Nama tao pazao lymâ awpa chhaota ei châ haw pâ hra ei. Ei châ ly kaw ei.”
Puhpa FC. Pa-u, Puhpa RC. Beilaizi Bohia, Puhpa TT. Khaihlu nata Puhpa TT. Pawla zy ta short speech pha kawpa reina ama hnei hra.
Puhpa Ruben N. Lyno chata O nah lyu nata compound pathaih chaipa lymâ cha Pihnô HC. Beihne hnohta a hlâ.
Zyhno khih pôhpalôhpa liata âhiah hnei hluh viapazy:
Zyhno B – 220.42 qtls.
Zyhno – 120.50 qtls.
Lôtai – 89.50 qtls.
Total: 430.42 qtls.
Puhpa K. Chhualai, VC member ta vote of thanks reina a hnei khai tawhta Abeipa thlahchhâna reihparaohpa ta daihti pachhâsapa a châ.
Daihti pachhâsa khai tawhta aly kawpa ta kyhchhina pati dôh khohpa a châ.
Lôtai MCHP zy ta Puhpa Pheiki Solo, Sr. R&SO lahpinô Pihnô LC. Rita hnohta Mara poh ângia kawpa ama present.
Puhpa K. Chhihrau, Executive Secretary, MADC he Official lâ tawhta Puhpa Pawsa Lava, AITO nata Puhpa Michael Lalhmangaihthangzuala, Cameraman zy ta ama chakaochahlâh.
PRESS RELEASE
NO.50/2023
ISSUED BY:
Information & Publicity Department
Mara Autonomous District Council
Siaha.