CHAKHEI, 11 Pamih, 2023, Pachynoh – Atanoh dawh 2:30 Pm kha ta Puhpa Tiahlei Syuhlô, EM i/c E & F, MADC ta Chakhei Range Office (E & F Department) tlypa ta amâ tyuduana a moh.
He office a tlyna liata Chakhei Range ôna liata hriapa Foresters nata staff nahzy ta vaw y dy ei ta, a lahpihnô Pihnô Lucy Solo, AE, MADC nata Puhpa K. Hrahmô, EM i/c Revenue, MADC zy y pâ hra ei ta, Puhpa Derrick Salai Solo, Under Secretary, DP&AR, MADC, Puhpa Beirôkhu Beitâ, I & PO nata Puhpa NT. Beithlapalô, FRO, Chakhei chhao amâ hlao hra.
He a tlyna liata Chakhei Range Office kiah liata Puhpa C. Robin O nata a râhzy moh pâ ta, he private râh he Office O nahta â hnia kaw vâta ryhraona taopa ta su hro lâ apasiepa ta ama O yna su cha Forest Department ta hnei awpa ta khona a yna kyh zy, azipa Puhpa C. Robin nata a lahpinô zy reikheipa châ ta, Puhpa C. Robin chata a râh a thyusai vyuhpa ta a saw pakha lilaw sawhkhâ rai pie awpa nahta su hro lâ liata O thiehpa a sa awpa liata mokhei awpa ta ahawna zy tao ta, Puhpa Tiahlei Syuhlô, EM zachhihpa chata abyuhna hawhta raizy mokhei awpa cha apha a tahzie reih ta, O sa nawpa compensation deikua, MADC duahmo mopa ta hmo rairu kawpa a châzie reih ta, ama Ohmo, rai ta ri awpa kyh chhao MADC Executive nata biatuhpa MDC zy asaohiahna chôta mo laih awpa a châ aw tahpa a reih.
Biatuhpa MDC Puhpa K. Hrahmô chata biereina chyupa hnei hra ta, Chakhei khihsaw vyuhpa ta Puhpa Tiahlei Syuhlô, EM zachhihpa hnohta alynabie reih ta, a theina hawhta hmah la khei awpa ta ahawna a tao hra.
Puhpa Tiahlei Syuhlô, EM zachhihpa he chhôhkha lâ hmo vâta Chakhei lâ akhy achhuah ta, he â chhuahna daihti liata Chakhei liata nôpawpa Puhpa FC. Ngotlei (L) â pahâpa vâta Chakhei biatuhpazy chhao ta, Chakhei FRO office he, ri ama kiah khai tawhta ama tlypa a châ.
Puhpa FC. Nahlo, VCP, Chakhei-II ta Chakhei Joint VC vyuhpa ta Puhpa Tiahlei Syuhlô, EM zachhihpa nata a lahpinô, Officers & staff zy hnoh ta alynabie a reih.
Source: I & PO, MADC