SIAHA, 20 Di, 2023, Pakhynoh – Atanoh dawh 2:00 Pm pa ta MADC ry liata office a ypa zydua, atakô 2023 chhôh châta khawna ‘closing function’ cha MADC Golden Jubilee Hall, MADC Complex liata programme ahmâpa a châ.
He daihti he Puhpa K. Chhihrau, Executive Secretary, MADC ta chhihtha ta, Rev. Z. Hrohmo, Executive Secretary i/c Education, CCI(M) Headquarters ta devotion a hmâh. Puhpa M. Laikaw, Hon’ble CEM, MADC ta biereina hnei ta, zawpi hlasana ei 2 lâta hneipa châ ta, zawpi ta Abeipa lâ alyna bierei thlahchhâna hneipa a châ hra.
Krista Hrialâh phapa châ awpa ta
Atanoh liata Puhpa M. Laikaw, Hon’ble CEM bierei tlâhpi viapazy:-
- Kô chhâna daihti tlô pi ta, office khawna programme pha kawpa hmâ thei awpa ta Khazohpa khokheina eima topa he eimâ ly kaw sai nahta ei hnabeiseih. He hawhta a châ no ta manôh 9 zy ta kô chhâna tlô thei leipa ta miah siesai ei ta, ama chhôhkhazy eima taokhei hmeiseih.
- MADC office liata a hriapazy he pôhpa nahta ei pakhopâ tyh – eima tovyuh/maophaohna chyu liata apeimawh leipa y ma pi. 12th term MADC tawhta eima khopa cha hmo pha leipa siesai awpa ta New Maraland viaion eima hnei. Chavâta officers nata staff zy ta office kia daihti he pachâpeimawh awpa a châ. HoD meeting lia chhao ta eima rei hapa hawhta office staff paritheipa a taopazy mopazi tah, kô 2024 liata cha aparipa y leipa ta apathaih kawpa ta office kiah tah, chapter thiehpa pahy eimâ chhuah awpa a châ. Department achievement review hnei awpa tahpa kha financial year chhâ hlâta review hnei awpa châ aw ta, a bu taihta papua awpa ta eimâ patohpatia awpa a châ.
- 12th term MADC ta New Maraland vision a hneipa liata hmahsiena hmô pathao lymâ pi ta, atliata liata Pala Tipo liata Mini Hydro-electricity power plant pahypa châ ta, Phura liata Agriculture Department site pahypa a châ hra. MADC NIELIT Study Centre pahy hapa châ ta, atahmâ he manôh 60 hlei tlai asaipa ta computer amâ chu ngâhai. MADC Golden Jubilee Building chhao pahy hapa châ ta, Lunglei liata Mara Girls Hostel MADC ku liata hlâ hapa châ ta, Delhi liata râh eima hnei hapa liata chhao House hawhta hmâ thei awpa ta sa pathao awpa a châ. ZMC liata râh hnei ha pi ta, viavi leipata he lia nata Delhi, Guwahati, Shillong, Lunglei, Aizawl lia zy ta Marasaw viavi leipa ta eima y nawpa hmah la lymâ â chhuah. He kyh liata ahniahnipa 11th & 12th term MADC nôpawzy, officers nata staff hriaparaohna zydua hnoh ta alynabie ei reih.
- Kôthiehpa 2024 liata hriaparaohna pha viapa hnei awpa ta bie eimâ tah khoh kaw. Pakhynoh maih liata Mara cheio palâsa tah Mara Dress atao chyu awpa tahpa zyhpha lymâ awpa ta eimâ haw.
- Kô chhâna eima tlô thei vâta Abeipa lâ alynabie reih na ta, 12th term MADC Executive vyuhpa ta Christmas nata Kôthiehpa alypa nata palôtlâh kawpa ta ahmâ chyu awpa ta khokheina ei cha hlâ ei.
Atakô 2023 chhôh liata MADC Siaha ry liata hriapa manôh 9 apahâpa, atanoh liata taokheipazy:-
- T. Mopaw, Peon, School Education Department
- V. Ngôngô, Sweeper, LAD
- Nali Syhly, LDC, Land Revenue & Settlement Department, Tipa
- LC. Nazi, Sweeper, LAD
- L. Luakhu, G/S, Agri. & Farmers Welfare Department
- K. Pathai, O/S, Road Trasport Department
- Pawbi Chozah, EE, PWD
- HC. Chhuasia, Peon, Social Welfare Department
- NT. Rimi, Peon, Rural Development Department
Âmo taokheina châta minute sâkha chhôh achalihpa châ ta, Meeting Chairman Puhpa K. Chhihrau, Executive Secretary, MADC ta athipa chhôhkhazy châta thlahchhâna a hnei.
Daihti chhâna liata Zisu Krista thlahchhâ pachupa reiparaohpa ta office closing function programme he pachhâsapa a châ.
MADC ry liata office zydua atanoh tawhta khawpa châ aw ta, hâhkô 2024 Nawh thlâpâ târi noh 5 pa ta pahy heihpa a châ aw.
PRESS RELEASE NO.154/2023, ISSUED BY:-
Information & Publicity Department
Mara Autonomous District Council
Siaha