CHAKHEI, 8 June, 2024, Pachynoh (MNN) – Atanoh my dawh 11:00 AM kha ta Pihnô Lalrinpuii, Minister, Tourism Department, Government of Mizoram ta Chakhei khih kiapâh liata “Mount Mawma Ecological Park” cha zawpi hmâ thei awpa ta pahyna a hnei haw.
North East Council (NEC) tawhta ₹.236.17 sôh hmôpa tawhta taopa “Mount Mawma Ecological Park” he M & M Construction & Consultancy, Ramhlun Vengthar, Aizawl zy ta ama hriapa châ ta, târi 1 April 2023 tawhta hria pathaopa ta târi 5 February, 2024 liata patlôpa a châ tahpa Puhpa K. Lalruatsanga, AE, Tourism Department ta report a pie.
Mawma Tlâh laki taihta phei ta siena Trakking/Hiking route/step taopa châ ta, Suspension Bridge a y hleikhô ta Waiting/Rest shed sâ 3, Camping Ground – 5, Watch Tower sâkha & Entry Gate taopa châ ta, Wildlife Enclosure- Birds net-128, fencing 946 m, Artificial Pond-1 taopa châ ta, Orchid-460 tho bô hapa a châ hra.
Puhpa KT. Beichô, IRAS (Rtrd.) hmahlana ta “Mount Mawma Research and Development Society” (MODESTY) paduapa châ ta, he Society hmahlana ta “Mount Mawma Ecological Park” Project he taopa a châ.
Chakhei khihsawzy ta he pahyna nata alyna liata Seih (a tôhpa) sâ 1 nata Vao sâ 2 chhaota kyhchhina hneipa châ ta, alynabie reina châta Pihnô Lalrinpuii, Minister nata Puhpa KT. Beicho, IRAS (Rtrd.) hnoh ta Seih chi sa/pie raihriepa ama châ.
BAICHHIPA:-
“Mount Mawma Ecological Park” atly khohpa châta sievawna lâpi:-
1. Siaha-Chakhei via Tipa = 100 KMs
— He lâpi he a zydua ta Metal khaipa a châ.
2. Siaha-Chakhei via Chhaolô = 73 KMs
— He lâpi he a zydua ta Metal khaipa châ leipa ta, Car ta a sie awpazy châta ta Tipa lâ zi awpa a pha via.
(Admin, MNN. Sources & Photos: DIPRO, Siaha District, Siaha.)