SIAHA, 12 June, 2024, Pakhynoh – Atanoh my dawh 10:30 AM kha ta MADC Social Welfare Department to tuhpa Puhpa T. Seido, Executive Member Official Chamber liata Thopi nyu (Tea Cup) nata Tray raina daihti ahmâpa a châ.
Pihnô Patricia T. Azyu, Social Welfare Officer, MADC ta chhihtha ta Thopi nyu nata Tray he Puhpa N. Viakhu, Chairman, MADC nata Puhpa T. Seido, EM zy ta raina ama hnei.
Puhpa N. Viakhu, Chairman, MADC ta biereina chyupa a hneina liata MADC ry liata Social Welfare Department he Department chynawh kawpa châ hrasala zawpi a tlôpha pa châ ta, hmialâ daihti liata cha Machâ hlao raituhpa Department hawh deita ta pachâ tyhpa châ ta, atanoh lia deikua atotuhpa EM nata Officer zy apakaoh thai kawpa ta Mararâh zawpi châta ama theina ama papua lymâpa he aly’pa a châ kaw tahpa a reih.
Atanoh liata Thopi nyu nata Tray he raipa he MDC bia 25 zy liata biatuhpazy siepahliepa ta rai chyupa châ ta, bia kha liata Thopi nyu 50 nata Tray sâ 1 chyu raipa a châ. Biatuhpa MDC zy ta a pha ama tahna hawhta ama bia chyu liata a peimawhpazy hnoh ta rai awpa ta Department tawhta raipapuapa a châ.
He daihti liata MJA Siaha tawhta Puhpa Jeffrey Khara, Editor, Moonlight chhao pahnokheipa ta â hlao thei hra.