SIAHA, 14 Chhiepa, 2024, Chutynoh – Atanoh my dawh 11:30 AM kha ta Board of School Education(BML), MADC ta Model Students Scholarship Examination 2023-2024 cha MADC Golden Jubilee Hall liata raina hnei ei ta, he daihti he Chief Guest Puhpa S. Lalremthanga, Deputy CEM, MADC ta daihti chhâna taih ta a hmâkhei ei.
He daihti he Puhpa BM. Khaimeichho, Secretary, BML ta chhihtha ta, Rev. Phosa Chozah, ECM New Colony Biatuhpa ta devotion a hmâh. Puhpa John VT. Hniehu, Controller of Examination, BSE ta report pie ta, Jeremy BD. Hlychho nata Rovina Khaimeichho zy ta hlasapa ta zawpi ama palôpahawh.
Puhpa S. Lalremthanga, Deputy CEM zachhihpa chata biereina chyupa daihti a hmâna liata, “Education a hnaina Râh zy he cha Râh hmahsie tahpa rei awpa y leipa ta, chavâta atanoh liata Scholarchip hmô theipazy nata achuhaipazy he eima hmialâ daihti liata râh hmahsiena peimawh chaipa châ ei chi ta, eima râh a hmahsiena awpa nata hmahsie leina awpa cha nama ku liata a y tahpa pahnona chô ta ngâchhihpa nata tiama kawpa ta châ achupa ta nama hlaotloh khiata cha Râh châta chyhsa hmâtlâh achâpa pua hluh aw pi ta, Râh ta hmah eima sie aw” tahpa ta pasyuna bie reih ta, achuhaipazy cha hmialâ ama sie lymâ nawpa liata khokheina a hlâ hra ei.
Chief Guest hleikhô ta ano a chakaochahlâhpa MADC nôpawpa tawhta Puhpa N. Lalrosanga, Vice Chairman (Planning), Puhpa M. Chiadung, Chairman (Town Committee), Puhpa B. Dawpho, MDC zy ta lymâ raina hnei hra ei ta, MADC School Education Department official tawhta Puhpa K. Beingiachhie, Sr. EO (PS) nata Puhpa JB. Chozah, Sr. EO (MS) zy hleikhô ta MSO Gen. HQ tawhta Puhpa Elson Eliasa Nôtlia, President chhao ta lymâ ama raikhei hra.
Kô to ta BSE, MADC ta MADC ôna chhôh liata Primary School nata Middle School Student zydua châta Model Students Scholarship pachhuapanoh tyh ta, Examination liata ataophapazy atlypa ta lymâ he rai tyhpa ama châ.
Primary Section tawhta Students 25 nata Middle Section tawhta Students 73 châ ei ta, atakô liata Scholarship Examination liana heta Scholarship dao awpa ta tlypazy cha ama zydua ta Students 98 ama châ.
Lymâ he mopakha ta thlato ta Rs.500/- hihsâpa ta kô kha châta Rs.6,000/- raipa ama châ.
Daihti chhâna liata Pihnô Jean Roseti Nana, OS, BSE ta vote of thanks a rei khai tawhta zawpi ta Zisu thlahchhâ pachupa reipaparaohpa ta program he pachhâsapa a châ.
