SIAHA, 5 Khihpa, 2024, Chutynoh – Atanoh dawh 11:00 AM kha ta Siaha District Co-operative Union (SDCU) 25th Annual General Assembly cum Election 2024, 1st Session programme cha Environment & Forest Department Conference Hall, MADC Complex liata ahmâpa châ ta, Puhpa S. Lalremthanga, Hon’ble Dy. CEM, MADC cha khichhai laipa châpa ta programme a hmâkhei ei.
Programme he Puhpa N. Vabeilai, President, SDCU, Siaha ta chhihtha ta, Rev. K. Laichhua Azyu, Moderator, ECM Assembly ta Kalatia 6:9-10 reipapuana nata thlahchhâna daihti a hmâh. Puhpa N. Lalhmingmawia, Executive Officer (SDCU)/ARCS ta Annual Reports pie ta, Laihsa Ajalia Beingiarili Solo ta hlasapa ta zawpi palôpahawh ta, Guest of Honour châta hruapa Pihnô N. Maki, SRCS, MADC ta biereina chyupa nata MADC ry liata Co-operative Society duahmo tlâhpipa nata hmahlana reina a hnei.
Puhpa S. Lalremthanga, Hon’ble Dy. CEM chata biereina daihti chyupa a hneina liata Cooperative Society he khihsa riethei viapazy ta a châna dopa hawhta ahmâh thaipa châta cha aduapapuana taihta hmâ phahnai theipa a châ tah ta, Co-operative Society â duana chhâpa Hriaparaohna phapa hnei awpa pahno awpa a peimawh zie a reih. Chyhsa pakha hlâta pano pha via ta, mopakha ta tao thei leipa pano ta â tao thei tah ta, Hriaparaohpa phapa hneipa ta Society eima hmâ phahnai khiah eima râh hmah a sie aw tahpa a reih. “Viarâh lâ liata cha khihsa riethei viapazy ta Society paduapa tawhta amâ duah papua lymâ; keimo Marasaw pi cha hriaparaohna liata eimâ phahlâ kawpa ta â lâ – sawhkhâ tawhta baona hmôna awpa tahpa deita hawhta a mohta ta Society apaduapa lyu pi ta, hlaotlohna hmeiseihpa hnei thei tyh ma pi. Hneirôh awpa eima khona kyh liata kao nano nanopa liata tei laih pi ta, a chhâna liata rietheina khaotlô lia pyly eima tla heih tyh” tah ta, Society tawhta adua papua awpa ta cha hriaparaohna phapa a byuh tahpa a reih.
“Prime Minister of India chhao ta khihsa rietheina pahlei tah, India he Co-operative Society siepahliepa ta râh hmahsiepa ta tao a khoh. Society phapa, loan a pie phapazy cha Bank nahzy chhao ta khokhei via laih ei ta, amâ pahy kawpa a châ. Kheihawhpa Society rai, â thôh chaina hawhta hmâ achhuah chyu si la, eima hyutuhpazy tawhta tao awpa miah ama tahpazy cha apha thei chaina hawhta tao lymâ awpa ta ei châ haw ei; MADC chhao ta a theina hawhta Society zy eima cha mokhei lymâ aw” tahpa ta pasyuna bie pha kaw reih ta, 25th Annual General Assembly cum Election 2024 avaw hlao theipa zydua apalâ kawpa ta programme hmâ awpa nata election hnei awpa ta khokheina a hlâ ei.
He daihti liata Best Society zy lymâ raina hnei pâpa châ ta, cha nahzy cha:-
- New Colony East Agriculture Farming Co-operative Society.
- Km. 10 Strawberry Farmers’ Co-operative Society.
- Mawhrei Coffee Planting Co-operative Society.
- New Colony Handloom Co-operative Society.
- ECM Vaih Sericulture Farming Co-operative Society.
He daihti he Second Session liata Training nata Election hnei awpa châ ta, MADC Co-operation Department ry liata Registered Society ypa 152-zy tawhta SDCU 25th Annual General Assembly cum Election 2024 he avaw hlao ei ta, Apex Bank, Siaha nata Mizofed, Siaha tawhta vyuhtuapazy amâ hlao thei hra.
PRESS RELEASE NO.40/2024
ISSUED BY:
Information & Publicity Department
Mara Autonomous District Council
Siaha.