SIAHA, 15th August, 2024 – Machâ K. Chhihrau nata a chhôhkhazy ta ama sawchanô khongaitapa, 13.06.2023 noh ta chhâzaw râh lâta maniah a disai hapa Jocelyn K. Lyrili a thei thlâh nawpa ta Siaha Youth Centre liata Rest House ama sapa cha Rev. K. Laichhua Azyu, Moderator ECM Assembly ta aly kawpa ta a pahy.
Moderator ta Machâ K. Chhihrau nata a chhôhkhazy siepahliepa ta Abeipa ta SYC liata hmo rônahpa maniah a taopa vâta eimâ ly ngaita kaw tahpa bie a tlychakapa ta Rest House he moto châta huhiehna O châ awpa ta Abeipa liata a hlâ.
Machâ K. Chhihrau & a lahpinô Pihnô N. Margarette chô liata ECM KTP ta alynabie reih ei ta, amâ pasaina he Abeipa ta a lie hluhpi ta byhnâ pie awpa ta khokheina ama hlâ.