SIAHA, 28 August, 2024 – Atanoh dawh 1:00 PM kha ta Puhpa S. Lalremthanga, Dy. CEM, i/c Information & Publicity Department, Mara Autonomous District Council (MADC), Siaha ta thâtih thiehpa lapakhytuhpa – Mizoram Journalist Association (MJA), Siaha District, Siaha member zy apakyhna nata thopi dokheina a hnei.
Puhpa S. Lalremthanga, Hon’ble Dy. CEM chata 12th Term MADC siehaipa liata portfolio rairuah thiehpa liata Information & Publicity Department mohôh awpa ta maophaohna a vaw pietuhpa CEM zachhihpa Puhpa M. Laikaw, Hon’ble CEM, MADC hnohta alynabie reih ta, he portfolio a vaw to tawhta rairuna nano nanopazy vâta Press Meet he aw palâh thei leipa ta, atanoh liata daihti phapa a ypa cha â lyzie reih ta, MJA Siaha members nata atyuduakheipa official zy hnoh ta alynabie a reih.
Dy. CEM chata MADC ry liata Department peimawh kawpa Information & Publicity Department he ei kha a mohôh nawpa a châ tah ta, he department he MADC sawhkhâ nata Mararâh zawpizy likawh liata department peimawh kawpa a châ vâta maophaohna a sâh kaw ta, thathyu chhao â chhih kaw tahpa a reih. MJA Siaha member zy hnoh ta pasyuna bie reih ta, media chyhsazy cha zawpi ta ngâna pahnieh ei ta, ama châ ropazy cha bie hmeiseihpa hawhta apypa a châ tyh vâta chyhsa hropa ama reipachhuahpa tly ma, lâpaw bie tlyma ama pahnopazy cha newspaper liata roh thlâh leipa ta ama pôhpa tly ma, a châna dopa ama pahnopasia khai tawhta roh tyh awpa ta pasyu ei ta, MJA Siaha zy cha hrialâhpa phapa châ awpa ta ahawna nata hruana chhao a tao hra.
He daihti liata Puhpa S. Lalremthanga, Dy. CEM zachhihpa chata a kawh thei chaina hawhta a pahypa hawhta hiahrina nata achhyna daihti hmâ pazipa a châ. MJA Siaha zy chata ama office, Press Club Siaha cha daihti rypaohpa liata vaw tly awpa nata mokhei awpa ta Dy. CEM he hrua ei ta, amâ haw pâ hra.
He apakyhna liata MJA member, khitlyna lâ asiepa tah deileipa cha vaw pua khai thei ei ta, official lâ tawhta Puhpa Beirôkhu Beitâ, I & PO nata Puhpa Pawsa Lava, AITO zy ta Dy. CEM he ama chakaochahlâh thei hra.
(Photo & Sources: I&PO, MADC, Siaha)