CHAKHEI, 31 Phiata, 2024, Pobienoh (MNN) – Atanoh dawh 12:00 Noon kha ta Chakhei Zone Football Association (CZFA) Tlyliah, Chakheitlâh liata Siaha District Football Association (SDFA) pachhuapanohpa 40-Palak (ST) A/C MLA Cup 2024 final programme ahmâpa châ ta, he liata Puhpa K. Hrahmô, MLA, 40-Palak (ST= Scheduled Tribe) A/C (Assembly Constituency) ta Chief Guest châpa ta biereina a hnei.
Puhpa K. Hrahmo, MLA zachhihpa chata biereina a hneipa liata “MLA Cup he achhuahna sianôpa hneipa ta pachhuapanohpa châ ta, a eihpachaipa ta Thyutliapa, talent ahneipazy ta District, State nata National level liata amâ khaih thei nawpa thaohpapua awpazy, Thyutliapazy apôhkhana hmiapahnona phapa hnei awpazy a châ.”
“Khazohpa ta chi & pho ta miah a tlyh, kao to liata Khazohpa ta byhnâ miah pie ta, eima thyutlia nahzy chhao kô 2036 India liata Olympic a vaw y awpa hnabeiseihla châta apatohpatia tah sports lâ he tiama eima papua via awpa a peimawh kaw.”
“Hlaotlohna hnei awpa ta keimo lâ chhao tao awpa eima hnei. Paripa nata drugs taopa he sports hmiahao lai chaipa a châ. Hlaotlohna a to tyhpazy he zawpi ta eima theina rakha khô lâ ta a tiamapazy ama châ tyh. He rakha châ leipa ta tiama lymâ awpa a châ.”
“Thyutliapazy châta ei theina rakha hmah la ngâ hai na ta, eima MLA bia liata khihpi chaipa Tipa tawhta pathaopa ta tahmâ he MLA Fund tawhta Tipa liata ₹.32.00 Lakhs hlei chhâpa ta Football akhaih theina awpa playgroud tao ngâhaipa châ ta, a byuhna hawhta Pala Bia liata khihpi viapa liata tao via laih awpa achhuahpa a châ.”
“Atanoh Final akhaih awpazy team 2 liata a tlôpa ama y aw; a tlôpazy a tlôna dâh thai u la, a tlô leipazy chhao a heihpa liata hlaotlohna to awpa ta eimâ pachhuah awpa ta eimâ khokhei.”
“District pôpalôh pahlypa ta taopa MLA Cup he Chakhei liata cha a eikhana nawpa châ ta, aly â chhih kaw. Chahleikhô ta Chakhei khih liata Siaha District pahlypa ta tournament a tlô ei khana a châ vâta a rônah ei tah kaw. MLA Cup he â rypaohna hawhta kôchareih taopazao eimâ chhuah aw.”
“Atanoh Final akhaih awpazy mo ngiapa nata Sportsman spirit hneina chô ta officials nata rules zy zyhpha u la, â ngia kawpa ta akhaih awpa ta khokheina ei cha hlâ ei” tahpa ta pasyuna nata bietana a reih.
Atakô MLA Cup 2024 he Mawhrei FC nata Siaha United FC (Siaha Vaihpi) zy ta Final akhaih ei ta, minute 120 amâ khaih khô lâ liata Penalty kick liata Mawhrei FC ta Goal 1 ta pahniena ama to.
Final programme he Puhpa T. Vabeichhuakhu, Sr. Vice President, SDFA ta chhihtha ta, Machâ BH. Sibei, ECM Chakhei Vaihpi Awnano Hyutuhpa ta devotion a hmâh. Puhpa F. Vanlalmuanpuia, Honorary Secretary ta welcome speech reih ta, Puhpa C. Beireithai, Chakhei Zone FA ta short speech reih ta, Pupa KT. Neikha, Vice President, SDFA ta vote of thanks a reih. Final match he Puhpa N. Ferdinand, Match Commissioner chhihthana ry liata akhaihpa châ ta, Chhingpuii Azyu, FC. Suna Chanô, Rovina Khaimeichho nata AZ. Vabeihruasa zy ta hlasa ei ta, Chakhei hawtipazy ta lâpa (dance) ta zawpi ama palôpahawh.
Puhpa K. Hrahmo, MLA he Puhpa Tiahlei Syuhlô, EM (i/c Forests etc.) MADC, Puhpa M. Chiadung, EM (i/c Soil etc.) MADC nata a lahpinô Pihnô K. Sangi zy ta zi ei ta, a lahpinô Pihnô B. Ngiasô nata a sawnahzy hleikhô ta, Pihnô NG. Fanchun, DEO & DPC, Samagra Shiksha, Siaha District, Siaha nata Chakhei liata khitlâh nôpawzy ta ama chakaochahlâh thei hra.
(Admin, MNN