SIAHA, 19 Di, 2024, Pobienoh – Atanoh my dawh 11:00 AM kha ta Puhpa S. Lalremthanga, Hon’ble Dy. CEM, MADC ta ano Department mohôhpa Information & Publicity Department (I & PD) ry liata Officers nata Staff nahzy, Dy. CEM office chamber liata awpakhypa ta 2024 kô chhâna a pha kawpa ta ama tlô thei vâta Khazohpa lâ alynabie reina nata thlahchhâ paraohna a hneikhei ei.
Programme he Puhpa Beirôkhu Beitâ, I & PO ta chhihtha ta, Pihnô Melody Zothanzuali, UDC ta pavaona thlahchhâna a hnei.
He daihti liata Puhpa S. Lalremthanga, Hon’ble Dy. CEM chata biereina chyupa daihti hmâh ta, “Khazohpa ngiachhiena vâta atakô 2024 January thlâpâ tawhta apalâ kawpa ta office rai zy hria thei pi ta, kô chhâna lâ eimâ vaw ngia laih hapa vâta Khazohpa lâ alynabie reina eima hnei awpa khoh na ta, atanoh liata programme chyupa eima hmâpa a châ.”
“He hawhpa daihti liata thokha cha office kia khoh kaw hra ei sala, ama sapa chieh leina vâta thei vei ei, thokha ta chhôhkha ta apha kawpa ta Christmas ahmâ awpa ama khoh kaw no ta, rairuna nano nanopazy vâta thei vei ei. Keimo sahlaozy deikua Khazohpa ngiachhiena vâ deita ta atanoh daihti tlô thei pi ta, Khazohpa liata eimâ ly kaw awpa a châ. Khazohpa liata eimâ lyna cha eima thatlôna a châ – vâduana, chhiena, rairuna a vaw y hapa chhao ta Khazohpa liata eimâ ly awpa a châ.”
“Awnano chyhsa châ pi ta, eima Awnanopa liata Christmas nata Kôthiehpazy programme y daihti no ta Awnano khôtho lâ ahmâ lei awpa a châ. Cha hawhpazy liata alyna hmeiseihpa y hlei vei – Alyna hmeiseihpa cha Awnanopa liata a ypa a châ. I & PD ry liata officer nata staff zydua Awnanopa chhôh liata Christmas nata Kôthiehpa he ahmâ awpa ta akhokhei pi ta, eimâ hrua.”
“Pulpit nata Office dawhkâh rônah viapazy lia ngâlâh he chakaona châ leipa ta, eimâ dady chyu liata maophaohna eima hneipa liata a pha kawpa ta taopa he chakaona a châ.”
“Sawhkhâ rai liata regularization nata promotion zy he Khazohpa liata apahnieh awpa a châ. Khazohpa ta a paryhsa hapa cha officials nata biehneituhpazy ta pakhâ thei awpa châ vei. Chavâta, rai phapa hriana chô ta thlahchhâ eima tiama awpa a châ.”
“Department sâkha liata ahriapazy cha Family member hawhta hriaparaoh ta kyh eimâ pachâ awpa a châ. Raihriana ahniahnipa kyh nata eima hrialâhpazy liata rairuna eima hneipazy a y thei aw – cha hawhpa kyh liata kyhchhie arei thlâh leipa ta, hyutuh viapa nata puhpazy tlôkhei awpa a châ.”
“Atakô cha, he hawhta vaw chhâ laih aw ta, kô 2025 eima kaw tlô awpa he Khazohpa liata apavaosa sila, kô 2024 hlâta hmahsie via awpa ta eimâ phana rakha tawhta hmialâ eima sie awpa a châ” tahpa reina hnei ta, I & PD ry liata officers nata staff zydua hnoh ta Christmas nata Kôthiehpa Alypa nata Thapha kawpa ta a hmâh chyu awpa ta khokheina a hlâ chyu ei.
Daihti chhâna liata Abeipa lâ alynabie reina thlahchhâ paraohna nata Zisu Thlahchhâ pachupa reipazina hneiparaoh khai tawhta programme he pachhâsapa a châ.
Puhpa S. Lalremthanga, Hon’ble Dy. CEM he ta I & PD nata ano personal branch ry liata Grade-IV, fixed nata contractual ta hriapazy hleikhô ta staff thokhazy hnoh ta Christmas anaohna nata alynabie reina châta sôh (Christmas Present) a hlâ chyu ei.
