CHAKHEI, 30 Nawh, 2025, Pobienoh (maraland.net) – Chakhei liata High School â dua tawhta kô 50 a tlohna (Golden Jubilee) alyna nata MBSE ry liata Class-XII Exam Centre thiehpa alyna pakaohpa ta atanoh kha Government High School, Chakhei tlyhmia liata programme taopa a châ.
Programme he chhaih 2 lâta pachhaihpa châ ta, chhaih 1-na liata Puhpa K. Mosia, Headmaster, Government High School, Chakhei ta chhihtha ta, chhaih 2-na liata Hosts S. Beidaosa, Lecturer nata Lalneihchhingi, Teacher zy ta ama chhihtha.
Chief Guest châta hruapa Puhpa K. Hrahmô, MLA, 40-Palak (ST) A/C nata Guest of Honour châta hruapa Puhpa Albert TT. Sachu, MDC, Chakhei biatuhpa zy ta he daihti he ama hmâkhei thei hra.
He daihti liata kô 1984 pa ta Chakhei High School tawhta Class-X a pass tua chaipa Pihnô B. Ngiaso, D/o Puhpa B. Khilei ‘L’ & W/o Puhpa K. Hrahmô, MLA cha palyupalihna ryuchâ hlâ pâpa a châ.
Rev. C. Josia, ECM Chakhei biatuhpa ta devotion hmâh ta, AZ. Beihruakhai, Teacher & Celebration Managing Board Secretary ta report pia ta, Chief Guest nata Guest of Honour zy hleikhô ta Puhpa BH. Sibei, Retired Headmaster, Gov’t High School, Chakhei, Puhpa S. Neikhai, VCP, Chakheitlâh (Joint VC, Chakhei vyuhpa), Puhpa Beirôkhu Beitâ, I&PO, MADC, Puhpa Thatha Khaimeichho, Principal, Vocation School of Education, College Vaih, Siaha zy ta achuhaipazy hnohta pasyuna bie nata School lâ alykheina bie pha kawpa ama reih.
Puhpa K. Hrahmo, Chief Guest chata biereina chyupa daihti a hmâna liata, “He school tawhta Politician, Officer, Teachers etc. hluhpi eima pua haw – Puhpa Laima Choza, IAS (Rtd.), Puhpa KT. Beichô, IRAS (Rtd.), Puhpa KT. Rokhaw, Ex-MLA zy hleikhô ta keima bawlawpa chhao he School liata a vaw kiah hapa ei châ hra. Hlaotloh awpa he ta achuna supipa byuh hlei leipa ta, achhuahna liata tlap â pahnieh. Chavâta achhuahna hneipa ta khotlyna dopa tao awpa a byuh” tahpa achuhaipazy hnohta a reih.
“Tahmâ cha internet a vaw y laihna zawhzi ta mobile phone tawhta English achuna hluhpi y ta, thai akhoh hmeiseihpazy châta cha yna su lia maih ta a chu theipa a châ; â chu thei; chavâta thai cheingei awpa ta a chu chyu teh u.”
“Khizaw liata rairuna atyh leipa y tlâ aw vei ei; ama rairuna deikua a lyucho tlâ aw vei; rairuna maoh-oh hnolo tah, riethei atao papuapazy cha hlaotlohna khochhihpa ama hmô tyh.”
“Achuna kyh liata Nô & Paw zy ta saw nawh deichhy thai awpa a peimawh kaw – amâ chuna kyhzy liata zôpha viapa ta mokhei lymâ ei suh u.”
“Marasawzy pi ta, eima Missionary Vaili mahpaw he thâpha eima rei awpa ei khoh kaw – ano ryhrao thaina vâta eima Mara Bei nahzy siepahliepa ta District Council hiah laih pi ta, tahmâ cha India dâh bu liata a choh ha pi ta, chipho hawhta Marasawzy he eimâ bohpa a châ. Eima Missionary nahzy zawhzi ta A AW B nata Hlabu, Biehrai etc. zy vaw hnei pi ta; chahawhta achuna kyh lia chhao âmo zawhzi ta tahmâ cha thata hmasie pi ta, Chakhei liata High School paduapa chhao kô 50 a vaw tloh hapa he aly’pa a châ hmeiseih; Abeipa liata eimâ lyna kipazy cha y mawh sy.”
“Atanoh liata High School nata Higher Secondary School liata achuhaipazy, tiama papua u la, hmialâ eima râh chhituh awpa, politician rônahpa, officer, doctor, lecturer, engineer etc. rônahpa nama vaw châ thei nawpa ta khokheina sâh chaipa ei cha hlâ ei” tahpa reih ta, atanoh alyna programme apachhuapanohtuhpa Managing Board lâ ta alykheina nata baona châta sôh a hlâ pâ hra.
Achuhaipazy N. Dicey, C. Vangiazi, AB. Thlada, Fillisi Azyu, K. Esther, C. Mary John zy hleikhô ta Lalhnempuia, Science Lecturer ta mopakha hlasana hnei ei ta, Class nano nanopa tawhta special items nata cultural dance chi nano nanopazy palâsana ama hnei.
Puhpa AZ. Beihrokhai, Lecturer ta vote of thanks reih ta, Machâ C. Laichho, ECM Nazareth Hyutuhpa ta byhnâ awna hneipa ta programme he pachhâsapa châ ta, he khai tawhta alyna kyhchhi dôh chyupa a châ.
Chakhei High School he kô 1974 liata paduapa châ ta, zâhkô 2024 kha kô 50 tloh ha ta, rypaoh viana vâta atakô liata alyna programme hmâpa châ ta, ngiana lôbô chhao atanoh kha Puhpa K. Hrahmô, MLA he ta a pahy pâ hra. He school â vaw dua tawhta atanoh taihta Class-X he manôh 270 zy ta ama vaw pass haw tahpa report tawhta pahnopa a châ.
— Reported by: BeiRôkhu Beitâ, Admin, maraland.net