SIAHA, 18 Hmypi, 2025, Hriaheinoh – Atanoh dawh 10:30 AM kha ta MADC Forest Conference Hall liata MADC Sports & Youth Services Department pachhuapanohpa ‘Diploma in Fashion Designing’ Certificate Raina 2025 programme ahmâpa châ ta, he daihti he Khichai Laipa Puhpa M. Laikaw, Hon’ble CEM, MADC ta a hmâkhei ei.
Puhpa M. Laikaw, Hon’ble CEM chata biereina chyupa daihti hmâh ta, “12th Term MADC ta Maraland vision eima hneipa hry liata hmialâ eima râh thyutliapazy atyudua nawpa nata nietluana phapa ama hnei thei nawpa kyh ahlao ta, Sports & Youth Services Department siepahliepa ta kô 2023 liata Steel fabrication training piepa châ ta, 2024 liata fashion designing training piepa châ heih ta, atanoh liata Certificate rai thei awpa a châpa he aly â chhih hmeiseihpa achâ. Maraland Vision asie lymâpa hawhta Sports & Youth Services Department lia he ta Youth Services he eima pachâpeimawh (focus) kawpa a châ. Teacher rai hria awpa ta Pre-service training hnei tua awpa byuh ha ta, chahawhta sawhkhâ rai LDC etc. rai angia awpa ta Computer Training Certificate hnei a byuh tua laih bâ vâta eima râh liata zawpi ta Computer basic course eimâ chu thei nawpa ta NIELIT Study Centre he MADC Complex liata eima pachhuapanohpa châ ta, tahmâ he student 160 hlei tlai ta asaipa ta achupatlôpa ta Certificate ama hnei hapa a châ.”
“Atanoh liata student-zy ta apha kawpa ta Fashion Designing amâ chu patlô theina Vocational School of Education (VSE), Siaha Pricipal Puhpa LH. Thatha, he chyhsa areisi kawpa nata tiama kawpa châ ta, Mara thyutliazy niebaw tluana lâthlôh apahmôtuhpa châ ta, a chô liata alynabie ei reih.”
“Sports liata tao awpa ei khotlypa Martial Arts liata Second Dan (Nidan) ei dao no ta eima master ta bietapa ei na chhopa cha chanô nata sahma liata a sohsi awpa na tah ta, achuna deikua pazao lymâ awpa tahpa a châ. Atanoh liata Certificate nama dao hapa he a chhânâ châ leipa ta, chyhsa pitlohpa, raihria pathao thei awpa ta Certificate hlâpa nama châ tahpa tlao a pahno u la, achu pazao lymâ namâ chhuah awpa ta ei cha khokhei hra ei.”
“Marasawzy ta Thathina sei liata a tâh leipa ei si la, my thyu patoh via lymâ a chhuah si la, pari theipa sei liata a tâhpa he pua a rairu kaw vâta pari theipa kheihawhpa hmo rai tao lei awpa a châ.”
“Eimâ râh liata sawhkhâ rai hriapa hluhpi cha hlao hnei hluh via pi, leibâh hnei hluh via pi tah pi ta, eima sawnahzy Class-X, XII pass pazy supi viapa lâ achu pazao nawpa phusâ apachôpa hnei tyh ma pi. Chavâta skills nama hneipa tawhta sôh nama vaw hmô ti ta savings pachâ peimawh u la, eima hriapapuapa tawhta phusâ tâkâ hmâ dâh a chado si la – sôh byh a vaih thaipa – management athaipa eima châ awpa a châ.”
“Ku raihriapa ta eima rai liata tiama kawpa ta hria si la, Pachutuhpa ta eima rai chyu liata tiama kawpa ta pachu thlâh ha ei suh u – he kyh liata Paduapathi/Taopathi awpa hluhpi eima hnei.”
“China râh chyhsazy amâ pachuna cha – ‘eima O lyu nata eima hneipa a to zydua lei khai ha hra sa la, niebaw tluana châta thaina eima hnei awpa a châ tahpa a châ’. Atanoh liata thaihna eihrâhpa a hneipa vaw châ ei chi ta, Skill nama hneipa he aduapapuana châta nama hmâh cheingei thei nawpa ta tiama papua u la, râh châta chyhsa phahnaipa châ thei awpa nata bao ngiahpazy bao theina taihta talent papôhsa via lymâ awpa ta khokheina sâh chaipa ei cha hlâ ei” tahpa reih ta, student-zy hnoh ta pasyuna nata thapatlôna bie pha kawpa a reih.
Atanoh programme he Puhpa VT. Martin Vabeiduakhei, ASPO, MADC ta chhihtha ta, Revd. NC. Vabeilua ta pavaosana daihti a hmâh.
Puhpa T. Seido, EM i/c Sports & Youth Services ta Welcome Address reina hnei ta, laihsa Priscilla Nôtlia, Mara Idol 2024 Top 7 ta hlasapa ta zawpi programme a hlaopazy a palôpahawh.
Puhpa LH. Thatha, Principal, VSE tawhta report nahthliepa châ ta, he VSE tawhta student 600 hlei vaw papua ha ei ta, foreign lâ chhao ahlaohna hneipa ta asie hapa ama y haw hra tahpa report pie ta, students lâ tawhta daihti piepa liata aduahpa Pihnô Ruati Jothyu tawhta Feedback Report (Successful Story) nahthliepa a châ hra.
Chairman chhihthana ry liata Certificate raina hneipa châ ta, Puhpa M. Laikaw, Hon’ble hleikhô ta he programme liata ahlao thei hrapa Puhpa T. Seido, EM i/c S&YS, Puhpa Beihu Nohro, Dy. Chief Whip, Puhpa BeiRôkhu Beitâ, I & PO, Puhpa Jeffrey Khara, Editor (Moonlight Daily Newspaper) zy ta Student-zy hnoh ta Certificate raina ama hnei.
Daihti chhâna liata Puhpa S. Vabeihasa, S & YO, MADC ta Vote of Thanks reih ta, zawpi ta Zisu thlahchhâ pachupa reiparaohpa ta programme he pachhâsapa a châ.
Atanoh liata Certificate adaopazy cha Student 30 châ ei ta, amâ chupa Course he 6 months (June – December 2024) chhôh a châ.
Source:
PRESS RELEASE NO.23/2025
ISSUED BY:
Information & Publicity Department
Mara Autonomous District Council
Siaha