SIAHA, 5 Pamih, 2025, Pakhynoh – Atanoh dawh 11:00 AM kha ta Puhpa T. Seido, Hon’ble EM i/c Sports & Youth Services Department, Mara Autonomous District Council (MADC) office chamber liata Mararâh chhôh liata Sports Discipline nano nanopa liata lymâ daopa Gold Medallist zy hnoh ta Incentive Cash Award raina programme ahmâpa a châ.
He daihti liata Puhpa T. Seido, Hon’ble EM ta biereina chyupa daihti hmâh ta, biehmiachhihpa liata “Marapazy pi he, khahlâ cha Mara bei nah amâ beina daihti liata suhrawh sukha – sabai sahaw piena kyh liata pachâ peimawh kaw pi ta, a pie pha leipa y beih hra ma pi. Thâtihpha â vaw ngia tawh deikua suhrawh sukha eima piena dâh he sianô thai khao leipa ta, Marasawzy eimâ mopakia a byuh” tahpa a reih.
Puhpa T. Seido, Hon’ble EM chata, “Biehrai Pathaihpa liata Nehemia thâtih eima reipa liata, paduapathina rai ama hriapa liata ama talent chyu ama papuapa hawhta keimo Marasaw zy chhao eima Talent nochâ liata Mararâh châta byhnâ châ awpa ta tiama papua chyu si la, eima talent hneipazy a chalihkhei thlâh leipa ta, akih tlôna taihta eima tiama awpa a châ.”
“Atanoh liata lymâ eima rai theina chhâpa he Coach nahzy tiamana nata Nô & paw nahzy ta ama sawnah ama deichhy thaina vâta a châ; ama hriapasanazy zydyua vâta alynabie eima reih. MADC ta taotheina eima hnei chyh kawpa lia deikua pachâthaina eimâ haw.”
“Eima râh liata thyutlia hluh via he cha pari theipa liata aboh ma pi. He hawhta paritheipa sei liata eimâ tâh lymâ khiatala eima chapaw nah vahpa châta hneitlâh ama y khao leina daihti liata cha eima laihsa hmipha khochih kawpazy he chi hropazy ta vaw hnei aw ei ta, Mara chapaw eima chyh via lymâ khiahtala Mara chi nata pho he a leidia pathlei aw tahpa he pachâ khi a y. Nâmo Sports lâta asiepazy deikua tiama papua u la, hmo pha leipa nata pari theipa arâsai lymâ teh u.”
“Marasawzy pi ta moh phapa he eima pahnie leipa a lyu kaw tyh. Chavâta asohsi kawna chô ta a chô lâ kiasâh via lymâ a chhuah u la, hriapasana nata keih chakâ patluana liata byhnâ a y tahpa pahno u la, atanoh liata Awardees nahzy, he hlâta hmahsie via awpa ta apachhuapanoh u la, eima hriapasana liata cha Khazohpa ta half ta byhnâ miah pie aw vei, full ta miah a pie aw tahpa pahno si la, hmialâ nama sie lymâ nawpa liata khokheina sâ chaipa ei cha hlâ ei” tahpa ta pasyuna nata khokheina bie pha kawpa a reihy.
Sports Discipline nano nanopa liata Gold Medal a lapa, lymâ raipazy ama raina zie zy: –
Boxing Senior – Men (Mizoram): –
1. Micky NT. Beipatla (46-48 Kg) = Rs.15,000/-
2. Vanlalhuala (71-75 Kg) = Rs.15,000/-
Boxing Junior Boys (Mizoram): –
1. Vabeichônôchai (55-58) = Rs.10,000/-
Boxing Sub Junior Boys (Mizoram): –
1. MH. Vabeihrobie = Rs.7,000/-
Boxing Junior Boys (National): –
1. L. Joseph (52-54 Kg) = Rs.20,000/-
Mizoram Open Athletics: –
1. H. Ngôhlâsô (5,000 m) = Rs.15,000/-
Weightlifting (Mizoram): –
1. Daniel Beichhuasa (89 Kg) = Rs.15,000/-
2. Silvan Beihrothatlô (67 Kg) = Rs.15,000/-
He daihti he Puhpa VT. Martin Vabeiduakhei, ASPO ta chhihtha ta, Puhpa A. Thazi, Instructor (Boxing) ta pavaosana a hnei. Puhpa T. Seido, Hon’ble EM ta biereina hnei ta, Incentive Cash Awardee-zy tawhta Puhpa L. Khaichyu, Ex-MDC nata F/o L. Joseph, Gold Medallist, Sub Junior (Boys) National Boxing Championship tawhta biereina chyupa nahthliepa a châ hra. Puhpa T. Seido, Hon’ble EM nata Puhpa BeiRôkhu Beitâ, I & PO, MADC zy ta lymâ raina ama hnei.
Daihti chhâna liata Puhpa S. Vabeihasa, S & YO, MADC ta Vote of Thanks reih ta, he khai tawhta Bei Zisu thlahchhâ pachupa reiparaohpa ta lymâ raina programme he pachhâsapa a châ.
PRESS RELEASE NO.26/2025
ISSUED BY:
Information & Publicity Department
Mara Autonomous District Council
Siaha