SIAHA, 7 Pamih, 2025, Chutynoh (MNN) – Atanoh kha Mizoram Governor General (Dr) Vijay Kumar Singh, PVSM, AVSM, YSM (Retd) ta âlâh ta kaw tly ta, Smart Classroom project ry liata ITI Ltd. nata implementing partner Living Thoughts organisation zy ta Numaligarh Refinery Limited (NRL) zy Corporate Social Responsibility (CSR) fund siepahliepa ta ama pachhuapanohpa Smart Board cha Siaha District chhôh liata School sâ 6 atlypazy hnoh ta hlâ ta, Sawhkhâ Department hyutuhpazy nata pachutuhpazy apakyhna a hnei.
Governor zachhihpa chata Prime Minister ta India râh su chaki chaipa liata ypazy chhao ta India râh su pi viapazy raohpa ta hmahsiena ama hmô lymâ thei hra nawpa ta hmahla a pachâ peimawh zie nata athôh-na nata rypaohna ypazy chhao ama hnei lymâ thei nawpa ta tiama papua awpa a pachâ peimawh zie reih ta, “Atanoh liata Smart Board raipa chhao he thotlâh khichaki viapazy nata khihpi liata apahrâpa achuhaipazy hmahsiena lâthlôh liata akhokhâh awpa ta pachhuapanohpa châ ta, hehe ta achuhaipazy hnohta achuna phapa hleikhô ta hlaotlohna a pie cheingei nahta ei hnabeiseih” tahpa reih ta, Siaha District he âki chochâ viapa ta tly heih â chhuah zie a reih hra.
He Smart Board raina châta daihti chyupa Circuit House, Siaha liata ahmâpa he Puhpa V.L. Hruaizela Khiangte, Siaha DC ta chhihtha ta, Living Thoughts Organisation vyuhpa Puhpa Prem Roy ta report a pie.
Puhpa S. Lalremthanga, Hon’ble Dy. CEM, MADC ta biereina chyupa daihti hmâh ta, Puhpa Vanlalchhuanliana, SDO (Sadar) ta alynabie reina a hnei khai tawhta programme he pachhâsapa a châ.
He khai tawhta Governor he ta Sawhkhâ Department hyuthpazy nata baona a topa School teacher zy apakyhna a hnei hra.
Smart Board adaopa School-zy: –
1. Phura High School, Phura
2. Z.M. High School, Chapi
3. Border High School, Laki
4. Siasi Middle School, Siasi
5. Theiva Middle School, Theiva
6. Lopu Middle School, Lopu