SIAHA, 21 Di, 2019, Pachynoh – Zâhnia my dawh 11:00 Am liata Zyhno khih kô 100 a tlohna Centenary cha Kôlai Opi, Zyhno Tlyliah liata a noh 2-na châta ahmâpa châ ta, Puhpa N. Zakhai, CEM, MADC cha Chief Guest châta hruapa a châna hawh ta Centenary alyna Programme he hmâkhei ei ta, biereina chyupa chhao a hnei.
Puhpa N. Zakhai biereipa tlâhpi viapazy:-
“Puhpa T. Chamaw, Meeting Chairman, Rev. T. Salaw, Executive Secretary i/c Mission(ECM Assembly), Puhpa L. Prisila, EM i/c SW, Zyhno khih puapa – su nano nano tawhta Centenary Alyna Programme ahlao awpa ta avypa zydua, khichhai lâ tawh nôpaw zachhihpa zydua nata he liata zawpi avypakhypa zydua, anaohna Samaw cha hlâ ei na ta, keima nata MADC liata ei hrialâhpa zydua vyuhpa ta Zyhno Khih Centenary alykheina ku chachâh lâ ei cha hlâ ei.”
“Vâhnei kawpa ta tovyuh pha kawpa nâ pie tuhpa Khazohpa nata Centenary Celebration Organising Board hnoh ta alynabie ei reih.”
“Atanoh khih kô 100 atlohpa eimâ lyna noh liata Khazohpa ta Zyhno khih châta hmopha ataopa he eima my lei awpa apha kaw aw. “
“He raohpa ta Zyhno khih Bei zy palôh liata eimâ thei chyu nahta ei pangiasa hra; Mara chi nata pho zachhihna pabohsa tuhpa eima Mara Bei – Zyhno Bei zy hriapasana nata chi tuna vâta atanoh reiraoh kawpa ta he hawhta khih kô 100 alyna eima tlô theipa he arônah tah na ta, atanoh liata palyupalihna nata zachhihna zy cha eima Zyhno khih Bei nata nôpaw hmiatuapazy hnoh zana chô ta ei hlâ ei.”
“Marasaw ta Political Party eima paduapa Mara Freedom Party he Mara nôpaw hmiatuapazy T Zyhno liata tlôpakhypa ta ama paduapa a châ. District Council hnei awpa kyh kha Party Policy lai chaipa châ ta, â dua tawhta kô 8 liata Marazy pi ta, Council eima vaa hnei thei hapa a châ; Zyhno khih he my thai’pa a châpa ta pahno vana.”
“Kao totie liata Zyhno he hmia asahpa nata chyhsa hmiatuapa hluhpi ama vaw puana a châ; achuna, business, sawtei nawtei phapa, Miss Mara taihta ama puana khih nata Algebra, Mathematics athai kawpa ama puana a châ; Mararâh liata ngasa pahâh chaipa ta reipa Tisi Chavah chhao akaw kawpa ta atyuhniena khih nama châ.”
“Atanoh khih zâ ngia chy; Centenary Gate tawhta eima vaw hmôpa ngiatlâh a châ kawpa cha lâlai nata khichhôh a pathaih zie he a châ; Zyhno he Mararâh liata khih pathaih chaipa lymâ, atliata liata nama dao; amopâtlâh nama châ hmeiseih; khitlâh nôpawpazy nata NGO zy ta khitlâh namâ vao pahnie zie nata rei namâ raoh zie chhao â lâ pasia kaw; khih luhchô lâ liata Forest Reserve râh he a pha kawpa ta nama pabohsapazy mokhaoh ta hmô theipa ta a ypazy he ta amopâ tlâh nama châ zie a palâsa pasia kaw.”
“Siaha lâ liata O sa lyu taona kyh liata Mistiri ngâchhih kawpa ta pahnopa cha Zyhno khih puapazy ama châ; Tipa liata sôhpalie hmiatuapazy kha Zyhno khih puapazy ama châ hra; khih moh paphatuhpa nata Marasaw moh paphatuhpa nama châpa he apalaikhei namâ chhih ngaita.”
“Zyhno khih liata O nata Lyu phapazy he Zyhno khih Bei hmiatuapazy kha ta vaw hmô ei sa la, ama no-âh kaw nahta ei pangiasa; sasyh ativyna kyh liata chhao amopâ tlâh nama châ zie eima hmô thei. Mararâh liata Economy lâ chhao namâ sâh chaipa ta ei pahno.”
“Kô vâro asie hapa liata Theivâ Bus Accident liata khitlâh nôpaw, kuhria chhao ta avaw tlô tua chaipa cha Zyhno khih nôpawpazy nama châ; Theivâ khihsawzy thlah nama palôhna kha my thei rimâpa châ vei.”
“Election daihti liata NGÂCHHIHNA eima pahlei tyhpa lyu kaw ta, cha chata ngâchhina nata eima chi nata pho zachhihna nata ngâchhihna thata a pahlei.”
“NGÂCHHIHNA tahpa Centenary biepipa he apha hmeiseih; palôh liata eima my lei awpa nata hro liata khâchâ eima vao awpa deikua peimawh kaw ta, thina taihta ngâchhihpa ta ypa ta, hrona lakho miah pie awpa ta Khazohpa ta bie miah â taih tahpa Bible liata eima hmôpa hawh ta ato liata ngâchhih kawpa ta hro eima hmâ pazao lymâ awpa eimâ khokhei ngaita.”
“Atanoh khih Centenary tlohna noh ta aly kawpa ta ahmâ chyu awpa ta cha khokhei ei na ta, ngâchhihna chabapa ta hmialâ tôh lymâ awpa ta khokheina ei cha hlâ ei. Ei châ ly kaw ei.”
Siaha tawhta Pihnô Napaw Hlychho (w/o Puhpa N. Zakhai), Puhpa Pasa T. Azyu, MDC, Puhpa Beirokhu Beita, I & PO, MADC, Puhpa T. Pabua (I & P Dep’t) zy ta Puhpa N. Zakhai, CEM he ama za zi thei hra.
(PRESS RELEASE No.50/2019)
Issued by:-
Information & Publicity Office
Mara Autonomous District Council
Siaha