SIAHA, 27 Hmypi, 2020, Pobienoh – Puhpa K. Chhuabei, Executive Member (EM) i/c PWD etc. MADC ta târi 24-26 Hmypi, 2020 chhôh ta a bia (Vahia MDC bia) tlypa ta a bia zawpizy hnoh ta kô 2020 anaoh-na, khokheina bie nata pasyupalina biezy reina a hnei.
A bia liata khih ypazy cha Vahia, Miepu, Supha, Lopu nata Khaikhy zy châ ta, atliata liata ano-eihta a tly hapa Khaikhy deikua atahmâ liata a tly leipa a châ.
Khi to liata VC zy ta vaw ydypa ta Public Meeting zy avaw chhuanohpa ei ta, Public Meeting liata Odyh pawhrâhpazy ama puapha kaw hleikhô ta VC zy ta niedo zy apasai kawpa ta amâ vaw chhuanoh chyu hra.
Puhpa K. Chhuabei he ta kôchareih kôthiehpa maih liata a bia chahryhpa ta Kôthiehpa anaoh-na nata khokheinazy hlâ awpa ta sie tyh ta, atakô lia deikua ryhpaoh leina nata hmo hrohria nano naopazy vâta bâhta ahawh viapa ta a bia he a chahryhpa a châ.
Ary liata palâsapazy he khito liata a bierei tlâhpi viapazy a châ.
- Ei bia liata apahrâpa zawpi zydua, kô thiehpa anaoh-na ei cha hlâ ei. Ti nata râh chakaona rai hria thei awpa ta a ngiachhiena nâ patosa tuhpa eima Khazohpa hnoh ta alynabie ei reih hmeseih. MDC zy châ pazao chy awpa ta nâ khokheituhpa ei bia zawpizy hnoh ta palôh hmeiseihpa alynabie ei reih.
- Chi hro phoropazy uahva ta vâ lei awpa ta Khazohpa ta eima Missionary Rev. RA. Lorrain hmâpa ta chipho ta miah padua ta, he dei châ leipa ta eima Missionary ta miah a khokhei kawpa ryureina eih-hrâhpa District Council chhao hnei pi ta, aly âchhih hmeiseihpa a châ; eima Khazohpa lâta alynabie khâ reih ei suh u.
- He hawhta Chipho, reih hropa nata ryureina eih-hrâhpa eima hnei no ta eima thati vâ nata eima hriapasa lei vâta eima reih laiseihna kyh liata kho akhi leipa ta, rai hria hoh leina vâta khihsa tôhtuna kyh liata chhao, hmah eima siena awpa hawh ta hmahsie thei mapi.
- Thathina nata Rai hria hoh leina ta a tlôkheipa cha dyhchhiena nata paru hmâna, ngâ achhih leinazy a châ. Aizawl pangaina lâthlôh liata ‘hâ leipa daoh’ eima hmô tyh; Marasawzy ta ngâchhihna kyh liata eimâ mopâ awpa apha kawpa ta ei pahno.
- India Central sawhkhâ he ta eima râh hmahsie nawpa ta Scheme nano nanopa miah taopa ta, eima thati vâ nata eima hriapasa lei vâta Scheme zy achhuahna hawh ta eima râh châta cha hmahsiena châta hmâh thei mapi tah thei awpa ta hmahsiena achyh kawpa ta pahnopa a châ.
- Kôthiehpa liata lyu tao awpa nata rai hria awpa eimâ chhuah vei khiah niebaw liata ativy thei leip’aw pi ta, Mission chakaona nata suhrawh sukha chhao soh thei leita eima y aw. He hawhta eima duasu a châ khia mo hropa, khinarâh nata chhôhkha châta byhnâ châ thei aw mapi. Eima theina chyu liata hriapasa awpa apeimawh hmeiseihpa a châ.
- Eima khih ativyna – Economy apha leipa ta a châ khiah khih odyh apôh-na lâ hlâta apaina lâ a pangai lymâ aw. Chyhsa eimâ pôh leipa ta a châ khiah VC sâ 2 sâ 3 a y haipazy cha sâ 1 lâta pahlyh vaw byuh laih aw ta, hmahsiena rai (development works) hria awpa chhao achyh via laih awpa a châ.
- Ei bia liata Ti rairuna y hryuh leipa ta, râhmâhpa chhao apha hleikhô ta Mararâh liata chichei bialo taona awpa apha chaina suzy a châ tah thei awpa taihta eima râh he pha ta, eima vâhnei ngaita kaw; anodeikua eima hriapasa lei vâta sôh lana châta hmâh thei lei pi ta, ativyna châ chhao ta eima hmâh thei leipa a châ.
- Leipalie eima hneipazy keimo ta tao hoh leipa ta kô veipa tawhta a percent zy apahawh laih ta, chi hro pho hropazy eima pataosa laih khia achhâna lâ cha eima leipalie râh taihta zua khohna palôru eima hnei thei; thapasana eima hnei thei nawpa ta keimo tlaita eima hria awpa apeimawh hmeiseih.
- Rakhine chyhsa ta eima râh liata chichei bialopa thata chhei ta, tahmâ cha eima chheipâh khih zydua liata kaw zuah laih ta, eima chalei chyu – he he keimo a râh leilô hneituhpazy ta eima tao theipa a châ; eima hriapasa a byuh.
- Israel râh cha râh chawhpa châ ta, arâh chhao Mizoram hlâta bâhta ngâlâh alai viapa achâ tarawpa ta ama hriapasa vâta khizaw liata alâluahpa ta râh hmahsiepa nata hneirôhpa ama châ. Keimo chhao eima hriapasa khiah Khazohpa ta byhnâ miah a pei cheingei nahta ei hnabieseih.
- Mararâh zawpi ta MADC ry liata Biehneina lai viapa eima khoh vâta 6th Scheduled Amendment eima hia ngâhaipa cha atahmâ he alaichadai pazi lymâpa châ ta, hnabeiseihna chhao eima hnei lai kaw. He hawhta a châ no ta Biehneina lai viapa vaw to ha ei si la, eima khih/vaih liata deparment peimawhpazy vaw y sa la, eima khih/vaih chyhsazy he khokhei viapa châ si ei la, ahria thei awpa eima y aw ma? Eima khih/vaih liata châ thaipa BA/MA zy eima y ma? Nôpaw zy ta eima sawzy châ achuna kyh liata eima pasyu via awpa nata eima tiamakhei via awpa apeimawh ngaita.
- Achhâ chaina liata atakô 2020 liana he ta hnatlâna phapa hnei chyu u la, kô vei avaw pôh sala, sawteih nawhteih phapa vaw tlô sala, niebaw tluana nano nanopa zy châta kôpha kô vaw châ sala, siku hawti zy châta hlaotlohna phapa vaw tlôkhei mawh sy.
Puhpa K. Chhuabei he a viasanô Pihnô Nakho Solo nata Officials – Puhpa C. Beichhua, AE(PWD), Puhpa Beirôkhu Beitâ, I &PO nata Puhpa K. Nehemia Cameraman zy ta ama zi.
(PRESS RELEASE No. 10/2020 of 27-02-2020)
Issued by:-
Information & Publicity Office
Mara Autonomous District Council
Siaha.