SIAHA, 27 Khihpa, 2023, Pobienoh – Atanoh my dawh 11:00 Am kha ta MADC ry liata Middle School 1st Headmaster Conference 2023 hnei pathaopa châ ta, he liata Puhpa S. Lalremthanga, Hon’ble EM (i/c PS), MADC cha 1st Session liata khichhai laipa châpa ta programme a hmâkhei ei.
Conference he Farmers’ Training Centre, MADC Complex liata ahmâpa châ ta, Puhpa JB. Chozah, Sr. EO i/c MS ta a chhihtha. Puhpa R. Israel Chozah, President, MSTA ta Bible Reading & Prayer daihti hmâh ta, Satlia N. Beichhotha, Gospel Artiste ta mo pakha hlasana hneipa ta zawpi a palôpahawh.
Puhpa S. Lalremthanga, EM nata CEM charge a la ngâhaipa chata biereina chyupa daihti hmâh ta, he hawhta Middle School Headmaster nahzy châta Conference pachhuapanohpa a châpa cha â lyzie reih ta, Headmaster manôh 52 liata atanoh liata a vaw hlao theipa manôh 49 zy hnoh ta alynabie reih ta, anaohna a hlâ ei.
“12th Term MADC ta New Maraland policy pha kawpa a hneipa ry liata School Education Department chhao hmahlana thiehpa hneipa ta atahmâ he eima official nahzy chhao ta pamphlet zy pachhuahpanoh amâ chhuah ngâhai; he hawhta Education Department liata New Maraland eima padua thei nawpa ta Headmaster nahzy hriaparaohna peimawh ta, miah hrialâh lymâ awpa chhao ta chahrua ei na ta, ei châ haw ei.”
“School Education Department liata peimawh chaipa nata râh hmahsie nawpa liata chhaichhi peimawh chaipa hry liatahpa cha Teacher nahzy nama châ. He hawhta a châ vâta râh hmahsie viapa râh liazy ta cha Teacher nah he ama pasâhsa hmeiseihpa a châ. Chahawhta pasâhsa thei awpa duahmo liata eimâ dua thei nawpa ta eima school chyu liata hmah eima la awpa a peimawh.”
“Headmaster nahzy he Teacher nahzy ta amâ mopâpa châ ei chi ta, Teacher nahzy he student nahzy ta amâ mopâ pachhuah heih hrapa ama châ. Chavâta kyh totie liata amopâtlâh châ awpa ta y si la, niedo, atobina nata hrozie nôchâ palâsana lia taihta palôh eima pie awpa a peimawh. Sleeper/Chapal/Sandal nata T. Shirt zy ta school akiahpa y tyh pi ta, apei hmeiseih; he kyh liata eimâ sohsi via awpa a peimawh hmeiseih.”
“School kiah daihti (time) nata routine/time table zy he pachâ peimawh si la, school hawti nahzy thapasana a hnei leipa Teacher eima châ khiah eima râh achuna a parao tuhpa dei eima châ aw. Chi hropazy tawhta eimâ boh nawpa cha Economy nata Education he a châ tahpa my leipa ta tiama papua si la, achuna liata eimâ hnai tu khiatala Mara chi nata Pho chô lia he ta chi hropazy ta ryu miah reih aw ei ta, a chhâna lia cha eima leidia pathlei aw.”
“MADC he ta Marapazy Education liata hmah eima sie via thei nawpa pachâpa ta Middle School nata Primary School zy Department pachhaihpa ta tahmâ eima theina hawhta hmah eima la ngâhai. Headmaster i/c nahzy chhao â ipa ta so thei awpa ta hmah eima la ngâhai hra. Chahawhta Teacher 79 zy chhao selection grade lâ kiah adaih hapazy ama kia thei nawpa ta hmah la ngâhaipa a châ hra. He hawhta eima school o paroh kawpazy chhao sa pathieh awpa ta project zy taopa ta hmah la ngâhaipa a châ.”
“Tusawzy kyh eima pachâ hmeiseihpa ta a châ khiah pachuna kyh liata eima tiama awpa a byuh. Nelson Mandela ta “Children of today are the leaders of tomorrow” a vaw tahpa kha my leipa ei si la, paripangana chô ta class a lapa teacher zy ama y khiah Headmaster nahzy ta official lâ nama vaw report cheingei awpa a châ. New Maraland ta Anti Drugs Squad zy padua awpa ta Awnanopa nata NGOs zy chhao ta hriaparaohpa ta hmah eima la ngâhai hra. MADC office staff hry liata paritheipa ataopazy ataih awpa chance pie ngâhaipa châ ei ta, ataih khoh leipa, parina chô ta office akiahpazy cha dâh hawhta eimâ chhorei lymâ aw. Teacher nahzy chhao he kyh liata ryureina cha â lyu aw.”
“Headmaster phapa cha ama school compound pathaihna kyh lia chhao ta pahno theipa a châ tyh. Ahy rai, atahmâ tahpa hlâta bâhta eima tiama via khiah hmahsiena eima hmô cheingei nahta eima hnabeiseih. Chavâta Khazohpa liata apahniehpa nata angiapâna chô ta eima sawnawhzy achuna kyh liata tiamakhei via si la, atahmâ Conference tawhta pachâna thiehpa, palôhru thiehpa phaona chô ta eima school zy mohôh awpa ta ahaw pi ta, he conference avaw hlaopa zydua ta phahnaikhei cheingei awpa ta khokheina sâh chaipa ei cha hlâ ei” tahpa pasyuna bie pha kawpa a reih.
Puhpa K. Beingiachhie, Sr. EO i/c PS chhao biereina chyupa daihti piepa châ ta, Headmaster nahzy hnoh ta pasyuna bie nata khokheina bie a reih hra.
Zawpi ta Zisu thlahchhâ pachupa reiparaohpa ta 1st Session daihti he pachhâsapa a châ. 2nd Session liata Reports & Introduction of Middle School Profile, NEP, 2020 zy apachuna nata reipahmaohna hneipa a châ aw. He Conference he atanoh noh 1 chhôh châta taopa a châ.
PRESS RELEASE NO.96/2023 ISSUED BY:
Information & Publicity Department
Mara Autonomous District Council
Siaha.