SIAHA, 23 Chhiepa, 2019, Abeipanoh – Ary liata palâsapazy he târi 16-22 Chhiepa, 2019 chhôh ta Evangelical Church of Maraland Headquarters, Siaha – General nata Mission News zy a châ.
- MODERATOR:
Rev. C. Beima, Moderator cha târi 22 June, 2019 khata Siata Local Church liata chakaona hnei ta. Târi 23 June (Sat) khata Châkhei Local Church liata zy Biatuh Pastor chhihthana ta chakaona a hnei.
- EXECUTIVE SECRETARY (EDN):
Rev. Dr. S.T. Zawsi, ES (Edn) cha târi 23 June, 2019 (Sat) khata Theiva liata Thlahchhâna O a pahy.
- EXECUTIVE SECRETARY (MISN):
Târi 22 June, 2019 (Fri) khata Rev. T. Salaw, ES (Misn) nata Machâ KH. Beithie, F.O.M zy ta Chakma Mission Field tlypa ta sie ei ta, târi 23 June (Sat) khata Siaha lâ amâ kaw lie ha he tahpa bie daopa a châ.
- NEPAL MISSION:
ECM Mission Field Kakarvitta liata krizyhpa nô pakha Dinu Kisan cha thisaih thlôpa pasana vâta târi 8 June, 2019 (Hriaheih zâ) liata â pahâ haw. He nô he sawchanô 4 hnei ta, uhthei he kô 20 tloh mâh leipa châta, a hropazy cha hawtipa sai ama châ. Hawti chaipa he kô 9 pa rachhô châta, paw hnei leipa châ ei ta, ama duasu a chhie kaw. A ri pabuna program he Kakarvitta Mission Pastor Biatuhpa, Pastor SBC.Beireikhei Nôhro ta hmâh ta, daihti chhâna châta Field Director, Rev. Henry C. Lalenkawla ta byhnâ awna ta daihti hmâh ta, pabuna su liata Local Evangelist Chandra Samser Rai ta thlahchhâna ta hnei ta pabupa a châ. A siesaipa sawnazy he ama duasu ngiachhie a chhi kawpa ama châ vâta thlahchhâ eima bao chyu awpa ta eimâ haw hmeiseih.
- ODISHA MISSION:
1). Pasana vâta Pihnô K. Maduati nata Puhpa Beirona Hlôvy eima rah lata daihti khacha rakhama ama mohôh khai khôla liata atla kawpa ta ama chakaona su ama zatlô ha hei. Thla chhâkhei tuhpa awnano zawpi chô la liata alynabie ama reih.
2). Mission Pastor Dr. S. Lamo nata a chhôhkha zy chhao eima râh lâ thla kha chhôh furlough daihti ama hmâ khai tawhta a tla kawpa ta ama chakaona su Sambalpur ama za tlô ha hei hra.
3). Pastor Kailash Digal lapinô cha tahmâhlâ apôhpa zydua pasapa ta thata thisaih aphahla ta ama mohôh ngâhai. Awnano zawpi zy thlahchhâkhei na amâ ngiah ngaita kaw.
4). Eima hnôlâ hâta liana khata Temangi khih liata pihnô Sarati Digal cha Zisu Krista cha Abeipa nata pachhatuhpa a châ tahpa angiapâpa ta Kri avaw zyh. A vahpa nata asawnah deikua Hindu liata y chy ei ta, thlai ta Kri ama vaw zyh theih nawpa ta thlah chhâkhei suh vy.
5). Târi 16th June 2019 liana khata Karnetpur liata krizyhpa Sukru Digal paw athipa thlahpalôhna ‘Sudho programme’ ahmâpa a châ. O tawtaw ta a châpa vâta khôtho liata program ahma awpata pachhuapanoh ta raw ei ta, anodeikua karnetpur khih liata Kri azyh lei penawh ta ama pakha pa vâta o chhôh liata Missionary Beirôna Hlôvy ta Bible reina nata a thihpa chhôhkha chata thlahchhâna hnei ta. Pati niepahmaona ama hnei pâ hra.
6). Missionary James K. Beirachhô cha Udepur khih la thâtihpha chhopa ta sie ta, Abeipa bie a châkheina nata a tlâleipazy châta thlahchhâna ta daihti a hmâh. Riethei sipasapazy chôta hmosaipiena chhao a hnei pâ hra. A chakaona tha a vaw tlô via lymâ thein’awpa nata, krizyh leipazy ta Krista ama vaw ngai thei n’awpa ta thlahchhâ khei lymâ suh vy.
7). Târi 25, 26 June 2019 pa liana heta, Odisha mission field station Sambalpur khih liata Odisha Evangelical Mission ry liata missionary zy field committee cum seminar hnei awpa chata, ama daihti zy phata ta amâ hmâh thei n’awpa ta thlahchhâ bao chyu suh vy.
- CHAKMA MISSION:
1). Târi 14. June 2019 kha ta Edenthar Awnanopa Work camp Board manôh 12 zy ta Damlui liata Achhyna O na n’awpa Survey ama za hnei.
2). Târi 14 June 2019 lia pyly ta Mara Police Officer Pasia Lâpih, SDPO Lawngtlai ta Chakma Mission field liata Damlui Awnanopa za tly ei ta, rairuna zy a y khiah a byuhna dâh hawhta missionary-zy pathlâkhei awpa ta chho ta, amâ ly hmeiseih.
3). Târi 14-16 June, 2019 chhôh liata Major Outreach Ministry Damlui liata hneipa a châ hra.
4). Târi 20 June, 2019 liata Missionary B. Vâki tlô awpa, Missionary zy suhrawh sukha pa tawhta sapa cha liahsa patlô hapa a châ hra.
5). Siaha Vaihpi Local zy ta Borapansury liata Quarter Rs. 3,00,000/- mâpa sa awpah cha sa pathao hapa châ ta, Châhvâ lâ ta patlô thei awpah ta hnabeiseihpa a châ.
6). Rev. T. Salaw, ES Mission nata a viasa thokhazy cha târi 21. June, 2019 liata Chakma Mission field za tly ei ta, field châta hmo peimawhpazy reikhei ei ta amâ ly hmeiseih.
7). Missionary C. Ngôha cha Awnanopazy thlachhâkheina vâta Hospital tawhta a pua ha ta, a tha zy a patlô via chy awpa ta Siaha lia a y chy.
8). Donations
(1). Edenthar Awnanopazy ta Damlui liata Achhyna O hmo JCB ta pachaosa n’awpa ta ama pocket tawhta Rs. 7,200/- pie ei ta amâ ly hmeiseih. Cha hleikhô ta a hmie chalei n’awpa ama pocket tawhta pyly ta Rs. 2,700/- pie heih ei ta, hriatuhpazy amâ ly kaw.
(2). Thlahchhâ bao byuhpa: Silsury liata Ngiapâ thiehpa, Prem Chakma mochaopa cha Bâti a châpa vâta a uhtapa ta a râh tawhta papuapa ta, a O phie awpa ta bie pie ta, ama nôpo kaw ta, Awnanopazy thlachhâkhei awpah ta maniah amâ haw.
- MISING MISSION:
1). 16.6.2019 liata Panbari tawhta manôh pano(2) zy cha Zisu Krisu Abeipa nata pachhatuhpa ta angiapâpa ta Pastor C. Khaisa ta bâti a pachâsa ei.
2). Koliya liata Achhyna o Paha USA ta a donate pacha patlô hapa châta, 29.06.2019 pa ta Rev. L. Lychhua F/D ta a pahy aw.
3). Atahmâ he holy grace school hâti zy half yearly exam ama hnei ngâhaino a châ.
4). Holy Grace School headmaster C. Khaihmosa cha achuna tawha vaw tlô ta, târi 20.6.2019 pa ta eima râh lâ chhuti awpah ta a kaw sie.
- THÂTIH LAPAKHYPAZY:
- Machâ B. Pakhai, kô 78 cha târi 18.6.2019 nota Siaha liata apaha ta, Lôbô liata târi noh 19.6.2019 ta Biatuhpa Rev. K.C.Thangching ta a pabu. Ano he Lôbô Awnanopa liata a Machâ a châ ngâhaipa a châ.
- No-aotlâh Awnanopa liata Crusade Hatâ ei 2 na Evan Lenchunga hmâpa ta hnei ngâ haipa a châ. Crusade he târi 23rd June, 2019 ta pachhâpa a châ aw. Awnanopa manôh zy ta amâ thôhkhei kawpa ta bie daopa a châ.
- Târi 21st June,2019 ta Rev K.C.Thangching Biatuhpa ta Sharon KTP Branch, Chhaolô zy Leadership Training ahneikhei ei. KTP manôh zy ta amâ thôhkhei kawpa ta bie daopa a châ.
- Târi 21 June, 2019 khata Pu. J. Chakhu, dak runner, ECM Assembly cha a nô ta a pahâsai ta, târi 22 June (Fri) kha ta Amôbyu liata a ri he pabuhpa a châ. Abeipa thlahlôhna ama to thei n’awpa ta thlahchhâkhei suh vy.
- Târi noh 21 June, 2019 tawhna khata KNP Headquarters chhituhpazy ta Town Branch-zy tlyna ama hnei. KTP apakhypa zâ maih ta he program he hnei laipa a châ. Headquarters chhituhpazy Group sâ 3 ta apachhaihpa ta tlypa a châ.
- Târi 25 June, 2019 heta Preaching Station, Meisatla, Siaha KTP-zy ECM KTP Headquarters OB nata TEC Member, chhituhpazy ta ama tly aw. KTP Headquarters President, Puhpa Lungmuana Hrahu ta bietana a reih aw.
- Târi 22 June, 2019 (Sat) khata Theiva su liata Thlahchhâna O sapa cha pahypa châ ta, Rev. Dr. S.T. Zawsi ta he Thlahchhâna O he a pahy.
- Târi 21 June, 2019 khata Edenthar Local Church tawhta chyhsa pa 4 zy ta Saikao, Missionary Bungalaw liata Electric wiring hria ei ta, târi 22 June khata Edenthar KTP zy Missionary Bungalow pathai awpah ta ama sie hra. He liata sôhthih hmâ awpa châta ECM Edenthar Local Church ta Rs.45,000/- sanctioned pa ta â tôh khai tahpa bie daopa a châ.
- MARALAND GOSPEL CENTENARY HOSPITAL:
Târi 14 June –20 June, 2019 chhôh report.
i). Tlâhleipa apamosapa zie – 62
ii). Tlâhleipa admitpa zie – 29
iii). Ultrasound mopa zie – 49
iv). X-Ray – 19
v). ECG mopa zie – 8
vi). Endoscopy mopa zie – 8
vii). Hawsaih pihpa zie -nil
viii). Athipa – 3
ix). Emergency Case – 12
x). Operation hneipa zie –nil
(Published by J. Lalvarliani, on behalf of Communication Department, ECM Assembly. Edited by BeiRôkhu Beitâ, Admin, MNN.)