TIPI FERRY, 31 August, 2024 – Tipi Ferry MTP zy ta kho pasa kawpa ta ahawna ama taopa zawhzi ta, Secretary Art & Culture MTP General HQ Puhpa T. Beihronga chata rypaohna taopa ta Empanel leaders Cultural Troupe thokhazy hruapa ta SAWLAKIA he târi 29th August, 2024 tawhna kha ta achuna hneikhei pathao ei ta, Pachutuhpazy cha St. K. Chatlaisa Hlychho, St. Felix HC. Beidaopha nata St. Pathie Azyu ama châ; âmo sahlao ta veiseih kawpa ta pachuna hneikhei ei ta. He daiti liata Puhpa S. Beirotha, President MTP Branch: Tipi Ferry ta Alynabie Reina nata Abeipa lâta pavaosana thlahchhâna hneipa ta Daihti pathaopa a châ.
Tipi Ferry Branch Chhithatuhpa zydua nata sahlao zy ta he eima pholâ he pasô thai kawpa ta ama pua pha ngai ta.
Tipi Ferry Branch President Puhpa S. Beirotha ta amâ lyzie he hawhna heta biereina ahnei, “Tipi Ferry khih he â vaw duana vaw rei kaw bâ ta, Mararâh/ Siaha District hawka châ pi ta, Mawrâh nata India râh pôpalôhpa lia chhao ta zakhei achhih leipa he eima Pholâ SAWLAKIA rônah kawpa achu theipa nata athai hapa eima vaw châ hrapa he aly achhih hmeiseih ta, he khih liata MTP Branch â vaw dua tawhta SAWLAKIA achuna he ei kha (1) eima hneina châ ta, ngiatlâh châpa Record hmeiseihpa a châ” tahpa ta amâ ly zie a reih papua.
(Source: B. Lalngaihawma, Information & Publicity Secretary, MTP Branch: Tipi Ferry)