SIAHA, 25 Khihpa, 2019, Pobienoh – Atanoh dawh 12:00 Pm liata LH. Beihneisa, 1st Sub-Junior Boy’s National Boxing Championship 2019 Bronze Medalist cha Puhpa Beirahmô Syhly, EM i/c Sports & Youth Services, MADC ta a office room liata alykheina a hnei.
He alykheina he Programme chyupa taopa châ ta, Puhpa JB. Beihnai, Sports Promotion Officer, MADC ta Chairman châpa ta chhihtha ta, Puhpa Beirahmô ta Beihneisa hnoh ta pasyupalina nata biereina chyupa a hnei.
LH. Beihneisa Nô nata Paw chhao, hruapa ama châna hawh ta, he programme liata amâ hlao thei hra.
He Programme he MADC Sports & Youth Services Department chhôh liata Officer & Staff zy ngâlâh châta taopa châ ta, khôtho lâ chyhsa hruapa châleipa ta, pahnokheituh awhpa ta Puhpa Beirôkhu Beitâ I & PO, MADC ngâlâh hruapa a châ.
Puhpa Beirahmô bierei peimawh viapa thokhazy:-
- Atanoh daihti pha kawpa maniah pietuhpa eima Khazohpa hnoh ta alynabie reih na ta, daihti sôh kawpa aparuapa ta he Programme chyupa avaw hlaotuhpa zydua hnoh ta alynabie ei reih.
- Sports discipline nano naopa liata Marasaw zy pi, kahlâ via tawhta hlaotlohna eima vaw to ngâ kaw tyh; Khazohpa ta phopipa ta maniah a tao tah thei awhpa ta Marasawzy pi ta machhyu mahrâh kawpa chyhsa châ pi ta, eima palôh chhao lai ta, chipho chynawh kawpa eima châ tarawpa ta chi hropazy nata chi asâh/lai viapa ta pachâpazy china he hnei hlei mapi.
- Marasawzy hry liata Hlaotlohna atopazy ta eima sie pasi thei leina chhâpa a châ tyhpa cha hro asohsi leina he a châ. He hmo vâna he ta eima châna awhpa zie hawh ta châ thei khao tyh mapi.
- Chhâ akhô hapa cha tao thai’pa châ khao leipa ta, Chhâ thiehpa liata deikua pari theipa nata pa-ôpazy he tao lei awhpa ta eimâ pasyu hluh awhpa apeimawh hmeiseih. Rathli pha kawpa eima hneipazy nata palôhru patuapaluana pha kawpa eima hneipazy apabua thei tuhpa cha pari theipa nata pa-ôpazy zy taona he a châ. He kyh liata Sports chyhsa ta eima sohsi kaw awhpa a peimawh hmeiseih.
- Daihti hmâ thai awhpa apeimawh. Amô daihti, pati nie daihti, châ achu daihti nata exercise lana daihti zy he adaihtita liata eima tao leipa ta a châ khiah chhiena nata rairuna maniah tlôkhei theipa sai a châ.
- Beihneisa he hâti kaw chy chi ta, national level liata nâma rihchâhpa, eima chyhsa, he hawh ta lymâ adao theipa ama y mâhpa ta pahno vana. Eimâ châ palaikhei kaw no ta nâma deikua nâ palai lei awhpa ta ei cha khokhei kaw. Apalaina he ta hro raona nata lâpi pha leipa tlyna a châ
- Boxing he Niebaw tluana châta a tloh tahpa my leipa la, anodeikua â sâh viapa tlô awhpa ta cha châ thai awhpa apeimawh. He liata baotuh phapa cha reihkah thai awhpa apeimawh tahpa eima pahnopa hawh ta achuna liata diathlâ lei awhpa ta ei cha pasyu.
- Atanoh liata hlaotlohna he Nô nata Paw deichhyna phapa a dao vâta a châ. A Nô nata Paw hnoh ta, Mara zawpi vyuhpa ta alynabie ei reih.
- Mara zawpizy hnoh ta pasyuna ei tao khoh kawpa deikua, Rev. C. Thalai, eima senior pastor biereipa – Chhôhkha chakaona papeimawhsa awhpa he a châ. Eima chhôh to avaw pha hapa ta a châ khiah vaih, khih nata eima râh avaw pha cheingei awhpa a châ. Chavâta chhôhkha chakaona he pachâ peimawh via heih ei suh u.
- Achhâ chaina lia deikua, Beihneisa hnoh ta alynabie ei reih hleikhô ta ei pasyu khoh kawpa cha Hlaotlohna pietuhpa he Khazohpa a châ tahpa my leipa sa la, Khazohpa pahnona chô ta keih a chakâ awhpa khokhei na ta, hmialâ a sie lymâna awhpa liata khokheina sâh chaipa ei hlâ.
LH. Beihneisa thâtih:-
- Moh – LH. Beihneisa L. Kima
- Paw Moh – LH. Vabei
- Khih – Meisavaih East, Siaha
- Achuna – Class-IX(DBS, Siaha)
Lymâ a lapazy:
- State Level – Gold Medal = 6
- National Level – Bronze Medal = 1
He Programme liata Sports & Youth Services Deparment, MADC tawhta Puhpa A. Thazi, Instructor ta pasyupalina biereina chyupa a hnei hra.
LH. Beihneisa ta atahmâ liata Bronze Medal a daopa he Boxing Federation of India ry liata pachhuahpanohpa 1st Sub-Junior Boy’s National Boxing Championship 2019 châ ta, târi 2nd – 8th July, 2019, SAI NBA, Rohtak liata Tournament he hneipa a châ.
PRESS RELEASE
No. 25/2019
Issued by:
Information & Publicity Officer
Mara Autonomous District Council
Siaha