SIAHA, 29 Khihpa, 2019, Hriatuanoh – Atanoh dawh 10:30 Am liata noh 2 chhôh ôpa Mara Autonomous District Council(MADC), Budget Session 2019 cha MADC Session Hall, MADC Main Complex liata a noh 2-na châta hnei pazaopa a châ.
Puhpa N. Zakhai, CEM chata kô 2019-2020 chhôh châta MADC sôh hmâna awpa châta patohpatiapa Budget, Chutynoh liata a vaw phuah hapa Rs.14,726.77 cha rei pakawhna hneipa ta Budget Speech a hnei.
CEM chata reipakawhna a hneina liata “atahmâ Budget liata ‘MDC Area Development Fund’ tahpa ta MDC zy ta ama bia(Constituency) chyuh liata ama hmâh awpa Rs.2.00 Lakhs cha sohpa châ ta, he he hmothiehpa châ ta, hmialâ daihti liata tao mâh leipa a châ” tahpa ta a reih. He sôh he MADC Revenue hmôpa tawhta piepa a châ awpa a reih.
He hleikhô ta Elected Officer Holder zy châta Discretionary Fund Rs.1.5 Lakhs chyu sohpa châ zie areih hra.
Member zy hry tawhta MADC Budget 2019-2020 chôchâh liata pachâna nata atahmâ Budget he ta Mara râh châta hmahsiena thata maniah a tlôkhei nahta ama hnabeiseih zie zy reih chyu ei ta, Budget cha apha ama tah zie ama reih chyu hra. Chatanachata kô 2019-2020 MADC Budget cha lôhraoh kawpa ta pass pa a châ.
Zâhkô hlâta kô 2019-2020 Budget â pôhna zie cha Rs.1,855.53 a châ.
Opposition Members (MNF Party) zy deikua sawhkhâna siekhei ngâhaipazy ta dâh chakhiapa ta ryureina ama siekheipa ta ama pahno vâta atakô MADC Budget Session liata ahlao khoh lei(boycott) pa ta ama y.
Târi 26 Khihpa, 2019, Chutynoh liata Session pathao noh liata Puhpa KL. Bana (L), MDC, Tôkalô biatuhpa, târi 23 Patôh, 2019 liata chhâzaw râh a pangai hapa taokheina hneipa châ ta, Puhpa K. Pawhnie, Chairman ta a thâtih tlâhpipa rei papuana a hnei: member zydua Minute sâ 1 chhôh achalihpa ta ano zana nata taokheina hneipa a châ.
MADC Budget Session 2019 he Chairman a châpa Puhpa K. Pawhnie, Deputy Chairman chata atanoh dawh 12:15 Pm liata Session he a pachhâsa.
PRESS RELEASE
No.27/2019
Issued by:
Information & Publicity Officer
Mara Autonomous District Council
Siaha.