Puhpa V. Vanhupa ta Mara Pho Dâh Châbu palâhâhna hnei

Puhpa V. Vanhupa, EM i/c Law & Judicial, MADC, Siaha

SIAHA, 29 Patôh, 2019, Pakhynoh – Atamy dawh 11:30 Am liata Puhpa V. Vanhupa, EM i/c Law & Judicial Department ta Hlâno Mara dâh, châbu liata rohpa Mara Pho Dâh (The Mara Customary Law), a ei 1-na cha CEM’s Conference Hall, MADC Main Complex liata palâhâh-na a hnei.

He palâh-na liata Puhpa V. Zacho, Executive Secretary, MADC ta Chairman châpa ta Programme chhihthana siekhei ta, Rev. Dr. FC. Beicho, Moderator Elect, ECM Assembly, Siaha ta Devotion hmâpa ta thlahchhâna a hnei.

Puhpa TA. Chhohu, Member Secretary, Mara Customary Law Committee ta châbu thâtih reipasiana hnei ta, ama vaw patohpatia laih-na dâh reina a hnei hra. Puhpa Pachi Hlychho, Court President & Recorder, District Council Court ta biereina chyupa hnei ta, Puhpa C. Siatha, Judicial Officer, Subordinate District Council Court ta alynabie reina a hnei.

He Programme liata Puhpa John Beizachhi Phuto, Senior Artiste chhao hruapa a châna hawh ta ahlao hrapa ta Pho hla pha kawpa a sa hra.

A palâhâhtuhpa Puhpa V. Vanhupa chata châbu avaw patohpatiatuhpa Mara Customary Law Committee member zy hnoh ta alynabie reih ta, Law & Judicial Department liata Officer zy hnoh ta chhao alynabie a reih hra. Puhpa Vanhupa chata reih ta, hmialâ daihti liata dâh ama vaw tao hapazy he tao baichhi byuhpa nata thy byuhpa y laih tyh ta, chavâta Amendment Bill zy avaw pi laihtyhpa hawh ta, atahmâ liata Dâh eima palâhâhpa he âki chochâh kaw khiah ma eima tah no ta avaw ki leipazy chhao avaw y thei; hmialâ daihti liata panano abyuh khiah eima panano laih heih hra awpa a châ a tah.

Atanoh liata MADC Office liata Head of Department zy aki kaw ei ta, chahleikhô ta Siaha Town Joint VC lâ tawhta nôpawpazy chhao avy thei ei ta, he nôpaw zachhihpazy he ta he dâh he reihpachhuah laihpa ta apahno leipazy pahnosana kyh liata phahnai ngiah awpa ta Puhpa Vanhupa ta a pasyu ei.

Puhpa Vanhupa chata biereina hnei pazao ta, he eima dâh bu palâhâhpa he chi nata pho lôbô a châ tah ta, hlâno manôh nata mahpaw zy ta Mara Dâh nata Phô ama vaw taopa cha saw tliapazy ta ama vaw pahno lei pathlei hapa chhao ta hawh ta châ rohpa ta a y hapa bâ vâta ama pahno thieh lymâ heih awpa vâta arônah a tah zie a reih.

He hawh ta Mara Pho Dâh palâhâhtuhpa a châpa he Puhpa Vanhupa chata âlyzie reih ta, Khazohpa byhnâ a châ tahpa zawpi avypazy hnoh ta a reih.

He programme liata Joint VC(Siaha Town), MJA nata All NGOs zy hruapa châ ei ta, Official lâ ta MADC ry liata Head of Department zydua hruapa ama châ.

Mara Pho Dâh he Law & Judicial Department ta ama papuapa châ ta, Mara Customary Law Committee zy ta ama pachhuahpanohpa a châ. A chhôh liata Pachhaihpachhuahpa Bo 19 y ta, tho 55 a y.

Achalei khohpa châ ta GAD, MADC liata Rs.50/- ta Office Hour chhôh chalei theipa a châ aw.

(Written by BeiRôkhu Beitâ, I & PO, MADC, Siaha)

Leave a Reply

Your email address will not be published. Required fields are marked *