LÔPU, 29 Chhiepa, Pachynoh – Zâhnia Chytynoh my kha ta MADC Education Department nata MSO Sub-Headquarters: Zyhno apakaohpa ta Lôpu khih liata Educational Awareness Campaign pachhuahpanohpa châ ta, he liata Vahia MDC bia biatuhpa Puhpa K. Chhuabei, EM i/c PWD etc. cha Chief Guest châta hruapa a châna hawhta â hmâkhei ei.
He Campaign liata Guest of Honour châta hruapa Puhpa K. Vanlalliana, Senior Education Officer, MADC nata biereina chyupa hnei awpa ta hruapa Puhpa Beirokhu Beita, I & PO, MADC zy chhao amâ hlao thei hra.
MSO Sub-Headquarters: Zyhno tawhta manôh 15 zy ta sie thei ei ta, MSO Branch: Khôpai tawhta manôh pa 2 zy ta ama zi. MSO Sub-HQ: Zyhno vyuhpa ta Puhpa C. Robert, President ta biereina chyupa a hnei hra.
He Educational Awareness Campaign he Lôpu Primary School-II liata hneipa châ ta, Chairman Puhpa Thaikhu Syhly, Vice President, MSO Sub-Headquarters: Zyhno chhithana ry liata my dawh 7:00 Am tawhta 10:00 Am taihta Programme pha kawpa ahmâpa a châ.
Chief Guest Puhpa K. Chhuabei bierei peimawh viapa thokhazy:-
1). Ei bia liata achuna lâ hmahsiena châta a châ theina awpa ta Educational Awareness Campaign he apeimawh kawpa ta pahno na ta, a eih pachaipa ta Lôpu khih he apeimawh kawpa ta ei pahno tyh; he hawh ta eima duahmo maniah pahnokheipa ta MSO Sub-HQ: Zyhno ta thla 1 asie chiehpa tawhta ryhpaohpa tluapa ta daihti eimâ vaw pahawhpa hawh ta a adaihtita liata he hawh ta atahmâ Awareness Campaign eima hnei theipa he ei ly kaw.
2). Chi nata pho aduah papua awpa ta achuna – Education he apeimawh kawpa a châ. Politician, Officer, Doctor, Engineer etc. awpa zy he Khazohpa ta arao chhieliepa y hlei vei; achuna ta a sa papuapa sai ama châ tah thei’pa a châ.
3). Atahmâ he Mararâh liata Teacher la thiehpa eima y chielie tahpa eima pahno chyu; Teacher a châ ngâhaipa, hlao hluh kawpa, duty a pahnie leipa hawh ta a ypa eima hluh kawpa ta eima khitlâh nôpawh nawh tawhta bie eima dao tyh, he kyh liata atao pathi abyuh hmeiseih. Teacher la thiehpazy amopâtlâh châ awpa ta tiama papua abyuh kaw aw.
4). Tamil Nadu, Kerala nata India râh su nano nanopazy liata chyhsazy ta hlao chyh kawpa hlaopa ta eima khihpi Siaha liata tiama kawpa ta ama kaw hria. Teaching rai ama pahâna kao achâ hleikhô ta ama rai liata ngâ amâ chhih tahpa pahnopa ta âmo tao zie hawhta eima tao abyuh kaw bâ.
6). Keimo Marasaw Teacher hry liata hlao hluh kawpa tlaw 10 (lakh 1) hlei ahlao hapa ama chielie no ta he hluh kawpazy he ta achuna kyh liata hawtizy ta kheihta ma hmah ama sie via aw tahpa pachâ rai tai leipa ta hlao khati ta ma eima la aw tahpa apachâ via thlâhpa eima y pathlei khiah eima râh châta apei kaw aw; ataopathi ei suh u.
7). Pachutuhpa pha leipazy cha khitlâh nôpawpa VC zy ta biehneituhpa Education Department, MADC lâta eima report ngâh awpa a châ – Action cha biehneituhpazy ta eima la ngâh awpa abyuh hra. Teacher hry liata Pachutuhpa pha leipa ama y pathlei khiah lâpi zy achhihpa ta Thâtihbu nata social media zy hmâpa ta Politician zy nata nata Mara zawpi eima pahra thei; cha chata hmo phapa a sa papua awpa a châ.
8.). Teacher cha chyhsa pakha chhâ chyhsa phapa ta eima papua awpa a châ. Eima sie chiehpa zydua cha taopathi thai’pa châ vei; atahmâ tawhta eima sie lymâ n’awpa lia deikua Teacher zy ta nama tiama awpa apeimawh hmeiseih.
9). He Awareness Campaign he taona chhâpa he Achuhaipazy châ dei ngâlâh châ leipa ta Teacher nata Nô nata Paw zy châ chhaota a châ. Eima zydua hriaparaona apeimawh ngaita. Nô nata Paw zy pi ta eima sawnah zy he Khazohpa tawhta byhnâ eima daopa a châna hawh ta ama pitlohna taihta thlahchhâna chô ta eima deichhy lymâ awpa a châ.
10). Teacher thiehpazy cha missionary palôh phaopa ta tiama ngaitapa ta hawti pachuna rai ama hria awpa abyuh. Teacher zy ta ama pachuna liata a diathlâpazy chata tâkô leipa ta luh lana a châ tahpa eima pahno awpa apeimawh kaw.
11). Thaina sona liata eimâ nai tu khiah cha, eima Lôpu râh zy he khi hropazy ta vaw hnei aw ei ta, ama ry liata eimâ hlawfah aw. Atahmâ bawlaw chhao Lôpu khih liata Teacher post sâ 6 pabie byuhpa liata Lôpu khih chyhsa tawhta mo pakha chhao avaw hlao thei mapi; achuna lâ eimâ hnai tah leithei’pa châ vei.
12). Student zy ta achhuahna hnei eimâ chhuah awpa apeimawh kaw. Eima Biehrai liata eima hmôpa hawh ta chyhsa ta achhuahna eima hnei byuh ta, hlaotlohna deikua cha Khazohpa tawhtapa a châ.
13). Hawtizy cha Sunday school ama kiah pha awpa abyuh; Khazohpa bie he eima hrona chhihthatuhpa châ tlôh ta, Sunday School kia tiama viapazy cha ama kaw pitloh ti chhao ta chyhsa hmâtlâh viapa liata amâ hlao lymâ.
14). Eima rai chyu liata tiama kawpa nata pahâh kawpa ta hria awpa hlâta rai hropa liata eima pahâsa via khiah cha, he râh he aphana lâ hlâta hnoh asyna lâ eima pangai awpa a châ. Chavâta tiama abyuh hmeiseih.
15). He Educational Awareness Campaign he Lôpu khihsawzy châta nata a chheipâh khihsawzy châta athôhkheina y cheingei awpa ta khokheina sâh chaipa ei cha hlâ ei. Ei châ ly kaw ei.
He Programme liata school hawtizy puapha kaw ei ta, amâ thôhkhei kawpa ta pahnopa a châ. Khitlâh liata VC nôpawpazy nata achuhaipa nô nata paw zy chhao hruapa ama châna hawh ta ama pua chyu hra.
(Written by BeiRôkhu Beitâ, I & PO, MADC)