Norway râh pôhpalôhpa liata zâhkô 2018 liata Worship Song aphipasuana taopa châ ta, he liata chyhsa pa 4 hla phipa atlypa châ ta, cha nahzy hry liata Laihsa Elizabeth Awmi Khaimeichhô hla phipa “Du er ikke alene” (You are not Alone) â hlao hra.
Laihsa Elizabeth he Nochhi Mararâh Lailaita khihpa châ ta, kô 5 a châ no ta a nô nata a paw chhao ta Delhi lâ azâ pasie ei ta, kô 9 a châ no ta ama chhôhka ta Norway a ma tlôpa a châ.
Tahmâ he Youth Fellowship liata Praise & Worship Leader châ ngâ hai ta, Worship Pastor châ awpa ta Khazohpa lâ apie ta, B.Th kô 2-na â chu ngâ hai.
A yna â chu lei vâta Mara reih thai tu leipa ta, a thei deikua a thei khai.
Ano he Gospel singer châ awpa ta decision tao ta, hla sa thaipa nata a phi thaipa hleikhô ta Photography, Sports nata Business zy a pahâh kaw hra.
A no Paw he hlasa thaipa châ ta, Mara hla sa thaipa K. Sida he a paw sietanô a châ.
Mara reih thai awpa khoh kaw ta, Marasaw yna su liata y thei hra awpa a khoh zie a reih tyh.
Âhmie liata a pahâsa chaipa cha Ngasa (Fish) châ ta, rôh(Colour) liata a khoh chaipa cha a râhpa(white) a châ.
Atahmâno he Single châ ta, a hnabeiseihpa cha Mara Satlia a châ.
Leader châ awpa ta Khazohpa nata nohtato ta bie eimâ chho byuh ta, thlahpa ta pabiepa eima châ awpa a châ tahpa ta a reih.
Atahmâno he MEC Pakhypi, USA liata ahlao awpa ta hruapa a châna hawh ta sie ta, târi 3 September, 2019 liata a yna su Norway râh lâ â lie heih aw.
(USA liata MEC Pakhypi ahlao awpa ta a siena liata Interview hneipa tawhta he châ bie he lapachhuahpa a châ.)
Ary liatahpa Elizabeth hlasapa video mo theipa a châ:-
Elizabeth Awmi Khaimeichhô – Du er ikke alene