SIAHA, 27 Thlarâh, 2019, Chutynoh – Mara Autonomous District Council (MADC) ry liata Cooperation Department nata Siaha District Cooperative Union, MADC apakaohpa ta noh kha(1) chhôh châta pachhuahpanohpa “Cooperative Education Training” cha MADC Forest Department Hall liata atanoh dawh 11:00 Am pa ta hnei pathaopa a châ.
Training hnei pathao hlâta Pahyna Programme ahmâtuapa châ ta, Puhpa N. Lalhmingmawia, E.O, SDCU, Coop. Dep’t, MADC ta Chairman châpa ta Programme chhihtha ta, Puhpa J. Lalthianghlima, CEI, SDCU, MADC ta Devotion a hnei khai tawhta Pihnô N. Maki, ARCS, MADC ta pahyna hnei ta, biereina chyupa chhao a hnei hra.
Pihnô Maki chata reih ta, “Cooperation Department he Mizoram sawhkhâ ry liata a y no tawhta nata atahmâ MADC lâ ta hlâpa a châ tawh chhao ta Department peimawh kawpa châ ta, State sawhkhâ nata MADC sawhkhâ likaw biehneina ahlâna kyh liata asianôpa y palâh lei vâta Department amôpa hawh dei ta eima châ” a tah.
“MADC ry liata avaw y tawhta Budget liata sôh chyhta hmâpa ta eima theina rakha hawh ta raihrian lymâ pi ta, hmahsiena chhao eima hnei lymâpa ta eimâ pahno. Atliata liata New Colony Agriculture Cooperative Society zy ta Apex Office pahy ei ta, eimâ ly khei kaw. He he hmahsiena sâkha a châ tah lei thei vana.”
“Cooperative Society member zy pi he, pachâna miakha – common interest hneipa ta, chyhsa pa kha hlâ hluh via apazaopakhypa ta paduapa eima châ; eima target cha sasyh ativyna nata châ ta, cha cha arâh pôpalôhpa ta economy liata hmahsiena awpa a châ. “
“Akheihawhpa sôhpaliena tlyma, ku raihriapa nie tluana kyh tlyma rai châ sala, pathao patô tua nawpa dâh sianôpa y leipa nata apatohpatiana sianôpa y leipa tao taopa liata rairuna thata y tyh ta, cha hawhpa tao awpa cha ta Training he apeimawh kawpa a châ.”
“Chavâta atanoh Training he pachâ peimawh chyu awpa ta a ei châ haw ei.”
“Atahmâ tawhta cha kô 1 liata ei 1 chhâ Training hnei tyhpa châ sala tahpa kho â chhih kaw. Keimo Department ta Training châta sôh eima hnei leipa chhao ta nâmo Society apazaopakhypazy ei chi ta eima Staff hry liata Training apie thei awpazy avaw saohiahpa ta, khati no rai aw papua theipa ama châ tahpa nama pahno awpa ta ei rei khoh kaw hra.”
“Training sianôpa eima hnei khaipa ta a châ khiah kô chhâna lâ liata Audit zy liata buana y leipa aw ta, Society member zy chhao ta hmo phapa a châ hleikhô ta thathyuna apie thei tuhpa a châ. “
“Mararâh liata Society 150 hlei hnei pi ta, he nahzy he ta ama Society chyu hmah eima pasiesa khai theipa ta a châ khiah eima khitlâh nata Mararâh zydua ta hmahsiena atlôkhei awpa a châ; cha cha sawhkhâ ta a khohpa a châ hra.”
“Mararâh liata Society zy, amô thlâh leipa ta, atanoh tawhta ahrapa ta, hmeiseihna kyh liata hmahsie achhuah chyu awpa ta khokheina ei cha hlâ ei.”
Ary liata palâsapazy he Traning Topics nata Resource Persons zy ama châ:–
- Cooperative Audit, Inspection, Accountancy & Book Keeping – N. Lalhmingmawia, SICS cum Executive Officer, SDCU, MADC.
- Cooperative History nata Coopration sie zie – K. Chatlai, CEI, SDCU, MADC.
- Cooperative Principles and Management – J. Lalthianghlima, CEI, SDCU, MADC.
He Training he atanoh no 1 chhôh châta pachhuahpanohpa châ ta, Mizoram sawhkhâ tawhta Cooperation Department, MADC lâta hlâpa a châ tawhta atahmâ tahpa he Training pachhuahpanohpa a ei 1-na a châ.
(PRESS RELEASE No.37/2019)
Issued by:
Information & Publicity Officer
Mara Autonomous District Council
Siaha