SIAHA, 15 Phiata, 2019, Hriaheinoh (MNN) – Atanoh kha MHP General Headquarters Conference Hall liata Miss Mara 2019 Contestant zy awpakhypa ta Briefing hneikheipa ama châ.
He liata Puhpa H. Vabeitha, Chairman, Miss Mara 2019 Organising Board ta chhihtha ta, Miss Mara 2019 atlyna hnei awpa liata hmo peimawhpazy nata Contestant zy pahno byuhpazy reina a hnei.
Atanoh pyly kha ta Measurement zy chhao lana hneipa châ ta, atanoh liata avaw lâ theipa Contestant zy cha MTP Branch sâ 16 tawhta châ ei ta, branch sâ 3 tawh deikua achuhaipa ama châ vâta document peimawhpazy buakheipa ta phai lâ ama y chypa vâta avaw lâ thei vei ei.
Miss Mara he kô 2016 pa ta atlyna hnei pachiepa daihti liata contestant 22 zy ta moh pangia ei ta, a chhâna atlôpa deikua manôh 17 ama châ.
Atakô liata atlyna hnei awpa liata moh apangiapa manô 19 châ ei ta, a chhâna taih ama tlô chyu nahta hnabeiseihpa ama châ.
Kô 2016 liata Miss Mara cha Laihsa KT. Gospel, Tipa Diary Vaih zuah châ ta, 2016 liata alakho (crown) daopa kha ano ta ala pâ ha aw ta, Miss Title deikua atlypatloh thiehpa hnoh ta a hlâ aw.
Atakô liata Miss atly thieh awpa deikua Lakho thiehpa piepa a châ aw. He he atakô Organising Board zy ryraona thiehpa a châ.
Miss Mara he MTP General Conference hnei daihti liata atlyna hnei tyhpa châ ta, atahmâ duahmo liata cha Miss Mara he MTP General Headquarters chhihthana ry liata Organising Board paduapa ta atlyna hnei tyhpa a châ.
Târi 26-29 Phiapi(Nov.), 2019 chhôh ta, Kiasie khih liata MTP General Conference hneipa châ aw ta, he liata Miss Mara 2019 atlyna hnei awpa a châ hleikhô ta MTP branch to tawhta vyuh tuapa manôh 6 zy ta MTP General Headquarters: Siaha chhihthatuhpa atlyna General Election ama hnei pâ aw.
Mara Thyutlia zydua, he General Conference he ahlao khai awpa ta hnabeiseihpa ama châ.
(Written by: BeiRôkhu Beitâ, Admin, MNN.)