SIAHA, 19 Di, 2019, Pobienoh – Atanoh dawh 1:00 Pm pa ta MADC Office tlyhmia liata MADC Office khawna cha Meeting Chairman Puhpa P. Sama, Executive Secretary chhihthana ry liata Programme ahmâpa a châ.
Rev. AZ. Beirakaw, Associate General Secretary, CCI(M) HQ: Saikao ta Devotion hneipa ta Ryhpachaneina 11:11-12 nata Mathai 2:11-12 tawhta Khazohpa Biehrai Pathaihpa bie reipapuana nata reipakawna hnei ta, Khazohpa ta a mo miah a taw pâ tahpa pahnona chô rai hria awpa nata Khazohpa china chô ta siana, adona, ngâchhihna hnei awpa ta MADC office liata hriapa zydua pasyu ta, ano lâ ta palôh paheipa ta eima moleina nata tao chheipazy pahnopa ta Khazohpa lâ palôh pahy awpa ta Khazohpa bie tawhta pasyuna a hnei. He khai tawhta MADC Office Closing Programme Khazohpa lâ pavaosana thlahchhâna a hnei.
MADC Public Works Department tawhta Opening Song, Hlapy ta hla paryh ei ta, Art & Culture Department Staff tawhta Puhpa A. Chhualai ta Solo ta hla sana a hnei hra.
Puhpa N. Zakhai, CEM, MADC biereina hnei awpa ta hruapa châ ta, ary liata palâsapazy he a biereipa tlâhpipazy a châ:-
“Ahmiatua ta Devotion miah hmâpa tuhpa Rev. AZ. Beirakaw, Associate General Secretary, CCI(M) HQ: Saikao, MADC Chairman, EM, Meeting Chairman, Officers nata Staff zydua, anaohna Samaw ei cha hlâ ei.”
“Chyhsapa hro liata Daihti athaona nata achhâna he apeimawh kawpa a châ; atakô châta Office kiapachiena noh – atanoh Office khawna noh liata avaw hlao theipa zydua chô liata alynabie ei reih.”
“Patô (May) 12, 2017 tawhta Mara zawpi chhihtha awpa ta 11th Term he Khazohpa ta keima nata ei hrialâhpazy sathaw miah thu ta, atahmâ Term he rairuna thata eima chatôhpa ta pahnopa châ hra sala, eima Awnanopa nata Marasawzy thlahchhâna zy miah chyh ei ta, atanoh taihta he MADC sawhkhâna he asie theipa a châ; Khazohpa hnoh ta alynabie ei reih hmeiseih.”
“Office hmahsie via nawpa nata eima rai apha kawpa ta eima hria thei nawpa pachâpa vâta reikah ngialeipa eima vaw hmâ hapazy a y chielie aw; atanoh kô chhâna lâ eima vaw tlô daihti liata kô 1 chhôh liata palôh palôh eimâ pasasa hapazy nata chyhsa pei eima rei tlamaw hapazy a y pathlei khiah keima nata ei hrialâhpazy vyuhpa ta ngiathaina ei châ haw ei.”
“Atanoh liata kô 1 chhôh liata eima hrialâhpa miah apahâ sai hapazy athei pi ta, ama sie saipa chhôhkhazy eima taokhei ngaita tahpa pamosana châta he Office Closing Function eima hneina daihti liata ei rei palâhâh khoh kaw; ama sie sai hapa chhôhkhazy Khazohpa ta y pâ ei sala tahpa he eima thlahchhâna a châ.”
“Christmas zy eimâ kaw hnia hapa vâta eima palôh zy Khizaw pachhatuhpa eima Bei Zisu Krista lâ palôhzy paheipa ta eima daihti zy eima hmâ awpa eimâ khokhei kaw.”
“Biephuapa 18:4 liata eima hmôpa ‘vaw pua teh u’ tahpa bie he atanoh liata eima pachâ awpa ei khoh kaw; hmopha leipa tawhta apananopa ta eima vaw pua awpa he Khazohpa ta miah â hnaw; byhnâ eima topazy vâta mo hropazy châta byhnâ châ awpa eimâ pachhuah awpa a châ; Achhyna O angai beih leipa zy ta ngai bâ ei si la, Thlahchhâ beih leipazy ta thlahchhâ bâ ei si la, Khazohpa byhnâ eima topa liata Khazohpa lâ Alynabie reina ahnei beih leipazy eima y khiah alynabie reih bâ ei si la, Daihti hmâ dâh eima thai leipa ta eimâ pahno khiah apha kawpa ta hmâh bâ awpa ta apatohpatia sila, hmo pha leipa tawhta eimâ sohsi chyu awpa a châ.”
“Atakô Christmas nata Kôthiehpa he alypa nata thapha kawpa ta ahmâ chyu awpa ta khokheina sâh chaipa ei cha hlâ ei.”
Pihnô S. Lalmuanpuii, Deputy Secretary(Finance & Accounts) nata Puhpa N. Pachhunga, Sr. R & SO zy ta MADC ry liata Department nanopa liata lymâ daotlâhpazy lymâ raina hnei ei ta, CEM & EM zyh hnoh ta MADC Office zydua vyuhpa ta alynabie reina hmosai piepa hlâna ama hnei hra.
Daihti chhâna lâ liata zawpi ta Mara KHB No. 88 (Byhnâ awpa ta) hla sapa châ ta, he khai tawhta Zisu thlahchhâ pachupa reiparaohna hneipa ta Programme he khawpa a châ.
MADC ry liata Office zydua cha atanoh târi 19 Di, 2019 pa ta atakô châta khawpa châ ta, târi 7 Nawh, 2020 pa ta pahyna Programme ahmâ heipa a châ aw.
MADC Office khaw chhôh ta Mara House, Aizawl tlô kiana kyh liata Puhpa K. Machhua, L.O and i/c Mara House, Aizawl ku liata sopa a châ.
(PRESS RELEASE No. 49/2019)
Issued by:-
Information & Publicity Office
Mara Autonomous District Council
Siaha