SIAHA, 7 Nawh, 2020, Hriaheinoh – Atanoh dawh 11:00 Am liata kô 2020 châta MADC Office cha MADC Main Complex tlyhmia liata Programme taopa ta pahyna hneipa a châ.
Programme he Puhpa Pachi Hlychho, CP & R ta chhihtha ta, Rev. Dr. Laiu Fachhai, Senior Executive Secretary, ECM Assembly ta Devotion hneipa ta biereina chyupa hnei ta, MADC eima hmô chhânapa cha Mara chi nata Mara reih eima hnei vâta a châ tah ta, Mara reih alei ha khiah Mara chi chhao alei theipa a châ; Mara chi nata pho pabohsa tuh chaipa cha MADC ry liata hriatuhpazy ama châ tah ta, Mara reih adisao thei tuhpa cha English nata reih hropazy he châ leipa ta, Mizo reih he a châ tahpa ta a reih hra.
Mizo reih he ahao awpa châ leipa ta, Mizoram State chhôh liata a ypa eima châna hawh ta a reih chhao eima thai awpa a châ; anodeikua Mara reih pahleina taihta eima chei awpa deikua châ vei tahpa ta reih ta, MADC ry liata sawhkhâ hriapa zydua ta cha Mara reih nama cheih cheingei awpa a châ tahpa ta a reih.
Khazohpa bie tawhta Daniel 3:28 Khazohpa bietapa reina hnei ta, ngâchhihna, adona nata Khazohpa china chô ta sawhkhâ rai hria chyu awpa ta pasyuna bie a reih; he khai tawhta MADC ry liata râh luhpa nata rai hriapazy châta nata Marasaw zydua châta byhnâ awna thlahchhâna a hnei.
Puhpa H. Sahlo, Chairman, MADC ta biereina chyupa hnei ta, MADC he keimo Marasaw eih châ ta, a chhôh liata rai hriapazy ta azipa, ahneituhpa palôh phaona chô ta kô 2020 liata cha ahneituhpa châna palôhru thiehpa phaopa ta raihriana kyh liata tiama papua via awpa ta ahawna tao ta, Khazohpa alytlâh châ awpa ta rai hria chyu awpa ta pasyuna bie a reih.
He hleikhô ta Puhpa Sahlo chata reih ta, Khazohpa ta eima chô liata â ly khiah MADC ta biehneina lai viapa eima hiapazy cha a hlao tloh aw ta; MADC ry liata rai hriapazy ta biehneina lai viapa pie tlâh châpa ta rai eima hriama tahpa amo pasiana chô ta rai hriana kyh liata tiama papua chyu awpa ta pasyuna bie pha kawpa reina a hnei.
MADC ry liata Teacher zy chhao, kô 2020 eimâ kaw ngiana daihti liana he ta Khazohpa alytlâh châpa ta rai eima hriama tahpa eimâ mo pasia awpa apha kaw aw; pasana khiakhipa nata rairuna hro hriapa ahnei tlôh leipa, hawtizy pachuna hoh lei vâta vyuhpa ta chyhsa hropa apahriasa ngâthlâpazy eima y pathlei khiah kô 2020 tawhta ta bâsai bâ awpa ta nata rai chyu liata tiama kawpa ta hria awpa MADC ry liata Teacher zydua hnoh ta ahawna chhao a tao hra.
Daihti chhâna lâ liata zawpi ta Mara KHB No.30 sana hneipa châ ta, he khai tawhta Bei Zisu thlahchhâ pachupa reiparaohpa ta MADC Office Re-opening Fuction Programme he khawpa a châ.
(PRESS RELEASE No.1/2020)
Issued by:-
Information & Publicity Office
Mara Autonomous District Council
Siaha.