SIAHA, 9 Pachawh, 2020 – Puhpa Hiphei (L) ri cha atamy kha ta New Siaha Opi liata pasai leina chô ta Rev. FC. Beicho, Moderator(ECM Assembly) ta pabuna programme liata daihti zeihpa hmâpa ta pathliena nata pabuna hneipa a châ.
Pabuna programme pathao hlâta MADC nata Marasaw zydua vyuhpa ta Puhpa N. Zakhai, CEM, MADC ta Condolence Message reina hnei ta, Mizoram sawhkhâ vyuhpa ta Puhpa Bhupesh Chaudhary, IAS, DC Siaha ta a reih hra.
Marasaw tawhta MP(Rajya Sabha) nata Mizoram Speaker avaw châ paphapa Puhpa Hiphei he zâhnia târi 8-4-2020, Pakhynoh dawh 8:30 Am chhaichhyh ta Aizawl Civil Hospital liata achhaih pi ta, Aizawl Mara Welfare Committee zy ta thobyh vaw buakheipa ta Mara House liata ri paziapa a châ chhôh ta râh nôpawpazy nata Aizawl liata Marasaw nôpaw eima hneipazy ta zana pamosana châta pawpi chhao ta ama vaw pathlie chyu hra.
Ari cha dawh 10:00 Am liata Aizawl tawhta kaw siekheipa châ ta, zâcho dawh 12:30 am liata liahri tlona Mararâh – Siaha khihpi kaw tlôkheipa ta atamy dawh 7:30 Am – 9:30 Am chhôh ta a samohpa C. Beipalotla O, New Siaha liata pathliena nata pabuna programme he ahmâpa a châ.
Aizawl su tawhta ato zydua abuakhei tuhpa Minister Puhpa K. Beichhua, Siaha biatuhpa ta ari he Siaha taihta kaw zi hra ta, Puhpa KT. Rokhaw, MLA, Pala biatuhpa chhao a bia tlypa ta Siaha lia a châ no a châ vâta ari he a kiah thei hra.
Aizawl tawhta Siaha taihta ri ama kaw siekheina khi to rô liata taokheina châta pawpi & poh zy chhao ta vaw dy laih lymâpa a châ.
Lawngtlai liata Puhpa C. Ngunlianchunga, Ex-Minister, MDC (LADC) nata Awnano nôpawpazy ta vaw dy ei ta, Pupa C. Ngunlianchunga ta ri akaw zipazy châta zâ pati â vaw chhuanoh.
Maraland Gate, Kaochao East liata MTP General Headquarters nôpawpazy nata MTP Branch: Kaochao East zy abaopasupa ta Mara chei-o, paro theipa chito chhao ta arônah kawpa ta ama vaw dy.
He liata azâ dy hrapa Rev. FC. Beicho, Moderator (ECM Assembly) ta thlahchhâna hnei ta, Puhpa B. Luaha, Saikao biatuhpa MDC ta Puhpa Hiphei pasai leina, taokheina nata zana pamosana châta ri akaw zipa nata adypazy do awpa theilâpa ti âvaw tôh hra.
Amôbyuh Vaihthieh MTP Branch zy ta lâthlôh chavei chachâh liata avaw paziahpa ta zana vaw hlâ ei ta, Siaha khichhôh akaw ngiakheipa a châ tawhta Mara chei-o, meithei, paotlâ, dawkhoh, chiahmie nata paro theipa chi to chhao ta MTP Branch zy ta lâthlôh chavei nata chachâh liata avaw paziahpa ta zana nata taokheina ama vaw hnei chyu.
Ari he Siaha Vaihpi liata a sawchanô O liata ngaikhei tuapa châ ta, Siaha Vaihpi Field nata O likawh liata MTP Branch: Siaha Vaihpi zy ta ari he amâ sy hra.
Siaha Vaihpi Field tawhta New Siaha taihta Morgue Van ta phao pazaopa châta, New Siaha Vaih ama tlôkhei tawhta MTP Branch: New Siaha zy ta O taihta amâ sy.
Ri y chhôh zydua cha MYA zy ta vaw buakhei khai ei ta, Covid-19 pasana hri tawhta eimâ vaw boh thei nawpa ta atyuduana kyh zydua liata sawhkhâ bie zyna chô ta khih padei kheipa a châ.
Atamy pabuna programme hmâ khai tawhta O chhôh tawhta thlâ yna taihta MSO General Headquarters leaders zy ta amâ sy hra; he he MSO zy ta ama Headquarters 5th President avaw châ hapa Puhpa Hiphei zana ama hlâ hnôchaina pamosana châta ama taopa a châ.
Ari y chhôh zydua nata pasiena taihta MADC ahawna hawh ta NSV nata HSV Local Cable tawhta Live Broadcast taopa a châ hra.
(PRESS RELEASE No.24/2020)
Issued by:-
Information & Publicity Office
Mara Autonomous District Council
Siaha