SIAHA, 25 Chhiepa, 2020 – Atanoh dawh 11:30 Am liata Young Lai Association (YLA) Sub-Headquarters (HQ): Bualpui ‘Ng’ OB zy ta COVID-19 duty-na su tawhta pasana alapa ta miah apahâ sai hapa St. Nelson K. Beizachhi, Khopai taokheina MTP General Headquarters: Siaha Conference Hall liata ama za hnei.
Programme chyupa taopa châ ta, Puhpa PP. Zalena, MTP General HQ: Siaha ta chhihtha ta, MTP General HQ: Siaha OB avypazy hmia pahnosana a hnei.
YLA Sub-Headquarters: Bualpui ‘Ng’ lâ tawhta Puhpa K. Hrangvela, President ta hmia apahnosana nata taokheina biereina chyupa hnei ta, Nelson K. Beizachhi he eima zydua vyuhpa ta keih a chakâpa, nohâh tao tlâh a châpa nata palyupalih tlâh a châpa a châ zie reih ta, a thina kyh liata ano nata a hrialâhpazy ta ama taokhei zie a reih.
Puhpa Lalzidinga Chinzah, Secretary nata Puhpa K. Lalremruata, Treasurer zy ta biereina chyupa hnei ei ta, MTP General Headquarters ta daihti pha kawpa ama vaw taopa vâta alynabie reih ei ta, he liata ama bie reipa nata taokheina ama hneipa zydua he Nelson K. Beizachhi chhôhkhazy hmiakô liata ama taokheina hawhta apypa awpa ta ahawna ama tao pâ hra.
MTP nata YLA zy he py nanopa eima châ tarawpa ta apachhaih thai’pa châ lei pi ta, hmialâ daihti tawhta chhituh hmiatuapazy ta miah ama pasyu tyhpa hawhta apha kawpa ta hrialâh lymâ awpa eima châ zie nata, unawh eima châ zie chhao YLA Sub-Headquarters: Bualpui ‘Ng’ nôpawpazy ta ama reih hra.
COVID-19 Pandemic vâta Khopai khih lâ sie awpa âryh lei vâta MTP General Headquarters: Siaha ngiatlâh liata ama za pahniepa a châ zie chhao reina ama hnei hra.
Nelson K. Beizachhi palyupalihna nata athei thlâhna châta YLA Sub-HQ: Bualpui ‘Ng’ vyuhpa ta Puhpa N. Lalrammawia, Finance Secretary ta Puhpa PP. Zalena, President, MTP Gen. HQ hnoh ta Ryuchâ (Citation) nata Phusâ Rs.5,000/- hlâna ama hnei.
YLA Sub-HQ: Bualpui ‘Ng’ tawhta taokheina azâ hneipa OB zy:-
- K. Hrangvela, President
- Lalzidinga Chinzah, Secretary
- H. Hrangmawia, Asst. Secretary
- N. Lalrammawia, Finance Secretary
- K. Lalremruata, Treasurer
MTP General Headquarters vyuhpa ta Puhpa C. Mochono, Asst. General Secretary ta biereina chyupa hnei ta, YLA Sub-HQ: Bualpui ‘Ng’ nôpawpazy hnoh ta, ama hmopha taona nata amâ pasainazy vâta MTP General Headquarters vyuhpa ta palôh hmeiseihpa ta alyabie a reih.
(PRESS RELEASE No.52/2020)
Issued by:-
Mara Thyutlia Py
General Headquarters
Siaha.