SIAHA, 27 Khihpa, 2020 – Atanoh my dawh 11:00 Am liata Puhpa MH. Tiabei, Executive Member(EM) i/c Local Administration Department (LAD), MADC ta Siaha khihchhôh châta laizaih thyna su – “MADC Landfill Site”, Siaha-Tisôpi motor lâthlôh thiehpa liatahpa cha zawpi hmâ thei awpa ta a pahy.
He laizaih thyna he MADC ta a hnei tua chaipa châ ta, Siahatlâh-III VC ônah chhôh liata a ypa châ ta, tlâhpi lâthlôh tawhta Tisôpi motor lâthlôh thiehpa lâtlei khôta liata a y.
He Leizaih tyhna râh he private râhzy châ ta, he ary liata palâsapazy he ta abyuhna hawh ta hmâ awpa ta LAD, MADC ku liata ama avaw hlâ:-
- Puhpa Lianzama
- Puhpa J. Mokhu
- Puhpa HC. Chotha
Site pahyna programme chyupa taopa châ ta, Puhpa K. Beingiachhie, Sr. LAO, MADC ta chhihtha ta, Puhpa Joshua Chozah, Under Secretary (LAD) ta Devotion nata Technical Report a pie. Daihti chhâna lâ liata Puhpa Henry PL. Hnaihly, Sanitation Officer ta thlahchhâna a hnei hra.
Puhpa MH. Tiabi biereina chyuhpa ahneipa liata a bierei tlâhpi viapazy:-
- Kô vâro avaw sie hapa liata buakhei byuh leipa hawhta eima pachâ tyhpa O hmo chhia leizaih, apuapa nata ie zy cha, khizaw hmahsiena hawh ta eima Mararâh lia chhao buakhei byuhpa vaw châ ha ta, apuapa thyna cha Meisatlâh râh liata hnei pi ta, ie nata leizaih thyna deikua eima hnei thei mâh leipa a châ.
- Atanoh liata he hawh ta leizaih thyna awpa eima vaw hnei theipa he aly âchhih hmeiseih. Râh avaw pasaihtuhpazy hnoh ta palôh hmeiseihpa ta, MADC vyuhpa nata Siaha zawpi vyuhpa ta alyna bie reih na ta, LAD, MADC liata Officer nahzy nata avaih hneituhpa VC nahzy apasaina, hriapasana nata tiamana vâta atanoh he hawh ta eima vaw hnei theipa vâta chhao ama chô liata ei ly hmeiseih.
- Khizaw hmahsie viapa nata râh asosâh kawpazy ta thlâpâ lâ ama kia ngâhaino ta keimo cha apuapa, leizaih nata ie thy nawpa liata eima bua thlâh chypa a châpa he, thokha pachâ ta cha noza chhao â chhih kaw hmo chhao a châ ngyu thei; keimo châ deikua hmo thiehpa hawh ta pachâ thei awpa, hmahsiena ta miah atlôthlu laih hapa vâta MADC chhao ta a theina rakha liata hmah avaw la laih lymâ hrapa a châ.
- He leizaih thyna he, chyhsa thokha ta hmo sisaw leipa hawh ta eima vaw pachâ pathlei thei – MADC, LAD châ deikua hmo peimawh kawpa a châ – leizaih thy chakhyh lei awpa ta zawpi lâ pahnosana tao tyh pi ta, a thy nawpa su deikua vaw pahmô thei khao tyh ma pi; atahmâ tawhta cha, he su he, Siaha khichhôh liata O hmo nata lâthlôh apakawhpa, leizaih thyna ahnei leipazy ta he su liata arainao kawpa ta eima thy thei bâ awpa a châ.
- Atahmâno he Solid Waste Management lâchhâh chhao buakhei ngâ hai pi ta, Bio-Digester – hnaihny azao theipazy, lei phapa lâta papua theina, Mizoram liata LAD, MADC ta eima hnei tua chaipa he thlai ta hmâ thei awpa ta apatohpatia ngâhaipa a châ hra.
- Apuapa akâ theipa nata akâ thei leipa, azao theipa nata azao thei leipa, plastic etc. zy ano-eihta thy awpa ta zawpizy apasyupa ta ahaw pi ta, he he eima zyh chyu awpa apeimawh kaw.
- He zydua he pathaihna ta â chakaihpa hmo zy châ ta, eima O chhôh pathaih kaw tlôh, eima O nata a chheipâh a pua kaw khiah pha hlei vei; hnatlâna châ chhao ta apha lei ngaita.
- Zâhkô 2019 liata Pathaihna kyh liata Mizoram pôpalôhpa ataopasuana liata Siaha District sâ 2-na eima châ. Mark 7 ngâlâh ta sâ 1-na ei ma tloh leina a châ. Zawpi ta pathaihna kyh liata eima tiama byuh ta, sâ 1-na eimâ châ thei lei nawpa y hlei vei; vaih to liata apahrâpa zawpizy nata VC zy ta pathaihna kyh liata hmah eima la via lymâ awpa apeimawh kaw.
- India sawhkhâ ta pathaihna kyh pachâ peimawh kaw ta, sôh chhao thata a hmâ no ta, keimo MADC area liata cha Swatch Bharat sôh he DC ku liata y ha ta, Sanitation sôh he PHE, Mizoram ku liata a y ha heih. MADC he ta Pathaihna kyh liata Centre sawhkhâ tawhta direct sôh hmô vei hra sala LAD ta a theina rakha ta hmah vaw la lymâ hra ta, khihchhôh liata apuapa eima thy nawpa byh abyuhpa ta pahnopa a châ vâta Waste/Dust Bin zy vaw soh laih pi ta, Mizoram sawhkhâ chhao ta eima hmotaopa apha a tah kawpa ma a châ ma, khi/vaih to liata Waste/Dust Bin zy a vaw raih laih heih hra.
- Atakô September liata pathaihna kyh liata ataopasuana a y heih awpa châ ta, he liata Siaha khihsaw vâtlâh zydua, eima vaih chyu nata eima O compound chyu apathaih kawpa ta avao chyu awpa ta ahaw pi ta, lymâ sâ 1-na dao thei awpa ta atahmâno tawhta eimâ patohpatia chhielie awpa ta eimâ haw hmeiseih.
- LAD nata VC he khâcharâh â pazao hapa hawh ta eima VC nahzy ta eima khitlah pathaihna kyh liata tiama kawpa ta hmah la via lymâ awpa ta eimâ haw hmeiseih hra.
- Atanoh liata leizaih thyna eima vaw hnei thei hapa he, aly hmeiseih na ta, eima Mararâh khihpi Siaha Town chhôh liata apahrâpazy pi ta, leizaih thy chakhyh tlâ khao leipa ta, he athyna su raopa liana he ta thy chyu bâ awpa ta eimâ haw hmeiseih. Ei châ ly kaw ei.
He pahyna liana he ta Siahatlâh Police OC, Siahatlâh VC-I, II, III, Siahtlâh MTP Branch, MCHP: Siahatlâh nata MADC LAD Officers & Staff zy ahlao ei ta, Puhpa Beirôkhu Beitâ, I & PO, MADC nata Puhpa CZ. Hluna, Stringer (DDK) zy chhao amâ hlao thei hra.
PRESS RELEASE
No.113/2020
ISSUED BY:-
Information & Public Relations Department
Mara Autonomous District Council
Siaha