SIAHA, 8 Pamih, 2021 – Atliata liata Mizoram Journalist Association (MJA), Aizawl tawhta Puhpa B. Dawpho, Editor, The Time of Maraland cha Prominent Journalist châna pie ei ta, he he Puhpa K. Chhuabei, EM i/c Information & Public Relations Department, MADC ta alykhei kaw ta, â lykheina pamosana châta atanoh dawh 2:00 Pm pa ta ano office room liata alykheina programme chyupa taopa ta Ryuchâ (Citation) nata sôh tlaw 5,000 hlâna a hnei.
He raohpa he ta atliata liata B.A. a pass pa Puhpa Jeffery Khara, Editor, Moonlight chhao alykheina hneipa châ ta, Ryuchâ (Citation) nata sôh tlaw 5,000 hlâpa a châ hra.
Programme chyupa he Puhpa Beirôkhu Beitâ, I & PO, MADC ta chhihtha ta, Puhpa K. Chhuabei hleikhô ta Puhpa M. Baithai, President, MJA, Siaha District ta alykheina bie reih ta, Puhpa B. Dawpho nata Puhpa Jeffrey Khara zy chhao alynabie reina chyupa ama hnei raihrie hra.
MJA, Siaha District tawhta Editor Puhpa Lalramnghaka Chinzah (Kawl eng), Puhpa Beichhuatha Hlychho (Maraland), Puhpa Lalnunkima Pisa (HSV), Puhpa M. Baithai (Chhim Aw) zy ahlao ei ta, Puhpa Pawsa Lava, AITO, MADC chhao â hlao hra.
MJA ry liata Prominent Journalist châ awpa he ta â zaopa ta kô 30 chhôh Daily Newspaper ama papua awpa byuh ta, Puhpa B. Dawpho he Siaha Post ahneituhpa nata a tao tua tuhpa a châ hleikhô ta Mara reih ta Daily Newspaper apuapa y tlakhaihpa “THE TIMES OF MARALAND (ToM) ” Editor a châ. Prominent Journalist he Mara reih Daily Newspaper – ToM moh he a daopa a châ.
Ano chhao he ta Siaha District chhôh liata Prominent Journalist he manôh pa 3 y hai ei ta, cha nahzy cha:-
- Puhpa Hmaokô Hlychho (L) – Maraland
- Puhpa K. Thangvela – Zobawm (Tipa)
- Puhpa B. Dawpho – The Times of Maraland
Puhpa K. Chhuabei cha ta Puhpa B. Dawpho he Mararâh liata Mara reih ta Daily Newspaper puapa a y tlakhaihpa ToM Editor a châna my leipa ta atahmâ hlâ ta tiama a papua via lymâ awpa ta a haw ta, a vaw hria pasana zydua vâta alyna bie a reih; Mararâh châta byhnâ vaw tlôkhei via lymâ awpa ta pasyuna bie pha kawpa nata khokheina hlâ ta, Mara thyutliazy achuna lâ hmah eima sie via nawpa ta pahaona pha kawpa chhao ta avaw duah papua laihpa Puhpa Jeffry Khara hnoh ta alykheina nata khokheina bie pha kawpa a hlâ hra.
Daihti chhâna lâ liata Puhpa Beichhuatha Hlychho, Editor, Maraland ta thlahchhâ ta, he khai tawhta programme chyupa he khawpa a châ.
(Admin, MNN. Source: I &PO, MADC)