AIZAWL, 27 August, 2021, Friday (MNN) – MSO Gen. HQ chhihthatuhpa zy ta Dr. R. Lalthangliana, H&FW & H&TE Minister cha a office liata ahmôpa ta Siaha District peimawhpa nano nanopazy, Govt. Siaha College liata Science Stream sopa a châ thei n’awpa nata Tipa PHC liata Dawty Marasaw sopa a châ pazao thei n’awpa ta ahawna tao ei ta, Minister heta Govt. Siaha College liata Science Stream cha Siaha District nata Lawngtlai District ta ama hmâh phahnai thei awpa a châpa vâta ama pachâ peimawh zie nata, he kyh ta ei hluhpi biehneituhpazy amâ tyupahmaohna thâtih MSO chhihthatuhpazy hnohta chho ta, sôh duasu a zie-y via tita hlao patloh awpa amâ chhuah zie a reih pâ hra.
Tipa PHC liata Medical Officer contract ta a hria ngâhaipa a hria pazao thei n’awpa ta MSO Gen. HQ ta amâ hawna cha hlaopatloh awpa ta paryhsa ta, order deikua a concern Officer ta Office a pazao tita a vaw papuasa aw tahpa a chho hra ei.
MSO zy heta Govt. Saiha College liata Casual Employees ta pachuna rai hria ngâhaipazy Part time ta ama hria thei n’awpa nata Nursing School pahy parapa a châ thei n’awpa ta Minister hnohta ahawna ama tao pâ hra.
MSO zy heta Pp. Robert Romawia Royte, MoS Sports & Youth Services etc. cha a office liata ahmô pazi ei ta, Marasawzy Olympic liata eimâ hlao thei hra n’awpa ta Archery liata Coaching pie awpa ta Coach kaw tuapa awpa ta ahaw ei ta, hlao patlohpa â chhuah awpa zie a vaw chho ei. He hleikhô ta, Minister heta Marasawzy châta Football ataopasuana laipa MARA CUP cha hâkô 2022 liata pachhuahpanohpa a châ thei n’awpa ta MSO zy hnohta hmah vaw la chhielie awpa ta chho ta, MSO chhihthatuhpazy chhaota abyuhna hawhta hmahla ta he Football ataopasuana laipa a hlaotloh thei n’awpa ta alaichadai awpa peimawhpa zy buakhei awpa amâ ngâ zie ama reih hra.
MSO chhihthatuhpa Aizawl liata châh ngâhaipazy heta Mararâh châta hmo peimawhpazy tlôkhei awpa ta Minister hropa chhao ahmô lymâ awpa amâ chhuah.
(Source: MSO Vyhphao Info.)