SIAHA, 27 Thlazoh, 2021 – Atanoh dawh 2:00 PM kha ta MTP General (Gen.) Headquarters (HQ) liata Senior Adviser a chakao hai no ta miah apahâsaipa Dr. K. Rakhu ‘L’ taokheina a ma Opi, New Siaha liata hneipa a châ.
Taokheina Programme he Puhpa PP. Zalena, President, MTP Gen. HQ ta a chhihtha.
Taokheina châta 1 minute silent prayer hneipa châ ta, he khai tawhta Machâ V. Samson, Adviser ta thlahchhâna a hnei.
Rev. NC. Vabeilua, Sr. Adviser, MTP Gen. HQ ta “Adyuh locho ta molaipa zy ama pao hawhpa rimâ cha! Na su sâhpa zy liata Zawnatha ama thie haw. Ei unawhpa Zawnatha, na kyh liana heta ei nô a po na; ei chô liata pha ngaita tyh chi ta, kyh eina pachâna chi cha noâh a chhih ta, chanô kyhpachâna a khô.” (2 Samuel 1:25-26) bie hmâpa ta thlalôhna bietapa a reih.
Laihsa Golden Mary Solo, Treasurer ta taokheina hmo (Citation & Dekchi) hlâna a hnei.
Chhôhkha lâ tawhta Pihnô Mimi, w/o Dr. K. Rakhu ‘L’ ta alynabie reina hnei ta, MTP nôpawpazy ta ama chakuchaveina cha thlalôh â chhih zie reih ta, palôh hmeiseihpa ta MTP lâta alynabie a reih.
Programme chhâ tawhta Pihnô Mimi nata a chhôhkhazy ta zâpati amâ chhuahnoh vâta Puhpa PP. Zalena nata a hrialâhpazy ta alynabie ama reih.
COVID-19 hriiah a charei daihti a châ vâta sawhkhâ dâh taopa SOP zyna chô ta MTP Gen. HQ OB nata Adviser zy deita taokheina programme he ahmâpa a châ.
(Source: BeiRokhu Beita, Secretary i/c Information & Publicity, MTP Gen. HQ: Siaha.)